2 Cronicas 26:1-23
26 Llapallan Juda runakunam Amasiaspa churin Uziasta+ kamachiq kananpaq churarqaku, Uziasqa karqa 16 watanpim.+
2 Taytan Amasias wañukuptinmi Uziasqa Elot llaqtata+ kaqmanta hatarichirqa, hinaptinmi Elot llaqtaqa kaqmanta Juda nacionpaq karqa.+
3 Uziasqa+ 16 watanpim kamachiyta qallaykurqa. Payqa Jerusalen llaqtamantam Juda nacionta 52 wata kamachirqa. Mamanmi karqa Jerusalen llaqtayuq Jecolias.+
4 Uziasqa taytan Amasias hinam Jehova Diospa munasqanman hina allin kaqkunata ruwarqa.+
5 Uziasqa Zacariaspa kawsakusqan punchawpim Jehova Diosta yupaycharqa. Chay tiempopim paytaqa Dios yanaparqa allin kawsakunanpaq. Uziastaqa Zacariasmi Diosta kasukunanpaq yachachirqa.+
6 Filistea runakunawan+ peleaspanmi Uziasqa pirqanta tuñirachispan yaykururqa Gat llaqtaman,+ Jabne llaqtaman+ hinaspa Asdod llaqtaman.+ Chaymantam Asdod llaqtapiwan Filistea runakunapa allpanpi llaqtakunata hatarichirqa.
7 Uziastaqa hinallam Diosqa yanaparqa Filistea runakunawan, Gurbaal lawpi yachaq* Arabia runakunawan+ hinaspa Meunim runakunawan peleaptin.
8 Ammon runakunapas+ Uziaspa mañakusqantam quqku. Hinaptinmi munayniyuq kasqanmantaqa Egipto nacionpipas yacharurqaku.
9 Uziasqa ruwachirqataqmi Jerusalen llaqtapi allin pirqayuq torrekunatapas,+ chay torrekunatam ruwachirqa Esquina sutiyuq punkupi,+ wayquman qawaq punkupi+ hinaspa pirqa takyachiqpa waqtanpi.
10 Ruwachirqataqmi chunniqpi, Sefela muqukunapi chaynataq pampakunapi torrekunatawan+ achka pozokunatapas*. Chaytaqa ruwachirqa achka animalniyuq kasqanraykum. Uziaspaqa karqam Carmelo urqupiwan huk urqukunapi chakrapi llamkapuqninkuna.
11 Chaymantapas, Uziaspaqa karqam peleay yachaq soldadonkuna, paykunam peleaq lluqsiqku imayna rakisqa kasqankuman hina. Paykunapa sutintam qillqarqa+ kamachiqpa secretarion Jeiel+ hinaspa kamachiqpa yanapaqnin Maaseya. Chay soldadokunapa kamachiqninmi karqa kamachiypi yanapakuq Hananias.
12 Ayllunkupi kamachiqkunam karqa 2.600, paykunaqa soldadokunata kamachiqkunam karqaku.
13 Paykunaqa kamachirqaku 307.500 soldadokunatam, chay kallpasapa soldadokunam kamachiq Uziasta peleaysiqku.+
14 Paykunapaqmi kamachiq Uzias ruwachirqa harkachikunankuta, lanzankuta,+ casconkuta, qasqu harkachikunankuta,+ flechankuta. Qurqataqmi warakanankupaq rumikunatapas.+
15 Chaymantapas Jerusalen llaqtapim yachayniyuq runakunawan ruwachirqa hatun carretakunata, chaywanmi flechakunata kachariqku hinaspa hatun rumikunata chamqaqku. Chaytaqa torrekunapiwan+ pirqapa esquinankunapim churarurqaku. Uziasqa Diospa yanapakuyninwanmi ancha riqsisqa rikurirurqa.
16 Chayna munayniyuq rikuriruspanmi Uziasqa hatuntukuspan sasachakuyman wichiykurqa. Payqa Jehova Diosta mana kasukuspanmi Jehova Diospa wasinman* yaykururqa inciensota* quntichinanpaq.+
17 Paypa qipallantam yaykurqaku Azariaswan 80 runakuna. Paykunaqa Jehova Diospa sacerdotenkunam karqaku.
18 Paykunam kamachiq Uziasta nirqaku: “¡Uzias, manam qamchu kañapunayki Jehova Diospaq inciensotaqa!+ Aaronpa mirayninkunallam inciensotaqa kañaymanku.+ Ñuqaykum chayta ruwanaykupaq sapaqchasqaqa karqaniku. Diospa wasinmanta lluqsiy, mana kasukuspa kayta ruwasqaykiraykum Jehova Diosqa mana yanapasunkichu”, nispa.
19 Hinaptinmi Uziasqa llumpayta piñakururqa+ sacerdotekunapaq, chaymi quntichinanpaq miski asnaq apasqanta hapikuykuspa kachkaptin urkunpi* lepra unquy rikurirurqa.+ Payqa kachkarqa Jehova Diospa wasinpim incienso kañana altarpa waqtanpi.
20 Ancha riqsisqa sacerdote Azarias qawaykuptinmi Uziaspa urkunpi lepra kachkasqa. Chaymi Diospa wasinmanta chaylla lluqsichirqaku. Chay lepra unquyta Jehova Dios rikurirachisqanraykum utqayman lluqsirqa.
21 Uziasqa wañukunankamam lepra unquywan ñakarirqa. Payqa sapaq wasipim yacharqa,+ manam Jehova Diospa wasinman riytaqa atirqachu. Chaynapim churin Jotanña wasinmanta nanachikurqa, hinaspapas payñam Israel runakunapa quejanta allicharqa.+
22 Uziaspa imayna kawsakusqanmantaqa Diosmanta willakuq* Isaiasmi+ qillqarqa, payqa Amozpa churinmi karqa.
23 Uzias wañukuptinmi pamparurqaku ñawpaq abuelonkunapa pampakusqan sitiopi, chay allpaqa karqa kamachiqkunapa pampakunan allpam. Sapaqpiqa pamparurqaku: “Lepra unquyniyuqmi”, nispankum. Hinaptinmi churin Jotanña+ kamachirqa.
Willakuykuna
^ Utaq: “Tiyaq”.
^ Ichapas pozokunataqa rumipi uchkuchirqa.
^ Kayqa karqa miski asnaq kutacha hinam.
^ Utaq: “Templonman”.
^ Utaq: “Piqanpi”.
^ Utaq: “Profeta”.
