2 Cronicas 6:1-42
6 Salomonmi nirqa: “Jehova Diosmi nirqa tutayay puyu ukupi kananmanta.+
2 Paypaqmi suma-sumaq wasita ruwarapuni chaypi wiñaypaq yachananpaq*”, nispa.+
3 Chaymantam Salomonqa muyuriykamuspan chaypi sayaq llapallan Israel runakunapaq Diosta mañakuspan bendeciykurqa.+
4 Salomonmi nirqa: “Israelpa yupaychasqan Jehova Diosyá hatunchasqa kachun. Payqa taytay Davidman nisqantam cumplirqa. Diosmi nirqa:
5 ‘Israel runaykunatam Egiptomanta hurqumurqani. Chay punchawmantaqa manam mayqin llaqtatapas akllarqanichu sutiy hatunchasqa kananpaq wasita ruwapuwanankupaqqa.+ Manataqmi pitapas akllarqanichu Israel runaykunata kamachinanpaqqa.
6 Kunanmi Jerusalen llaqtata akllaruni+ sutiy hatunchasqa kananpaq. Davidtañataqmi akllaruni Israel runaykunata kamachinanpaq’, nispa.+
7 Taytay Davidmi tukuy sunqunwan Israelpa yupaychasqan Jehova Diospaq wasi ruwayta munarqa, chaynapi Diospa sutin hatunchasqa kananpaq.+
8 Jehova Diosmi ichaqa taytay Davidta nirqa: ‘Tukuy sunquykiwanmi sutiy hatunchasqa kananpaq wasita ruwapuwayta munanki, chay munasqaykiqa allinpunim.
9 Ichaqa manam qamchu wasitaqa ruwapuwanki. Manaraq naceq churikim sutiy hatunchasqa kananpaq wasitaqa ruwapuwanqa’, nispa.+
10 Jehova Diospa nisqanman hinam+ taytay Davidpa tiyananpi tiyachkani Israel runakunata kamachinaypaq.+ Hinaspam Israelpa yupaychasqan Jehova Diospaq wasita ruwarapuni sutin hatunchasqa kananpaq. Chaynatamá Jehova Dios nirqa.
11 Chay wasipim kachkan Jehova Diospa baulnin, chaypa ukunpim kachkan iskay tabla rumikuna.+ Chay rumikunapim qillqasqa kachkan Israel runakunawan Diospa contrato* ruwasqan”, nispa.
12 Chaymantam Salomonqa Jehova Diospa altarninpa ñawpaqninpi sayaykurqa, hinaspam makinta hanaq pachaman haywarirqa. Chaypim Israel runakunaqa huñunasqa kachkarqaku.+
13 Sayananpaqmi Salomonqa broncemanta ruwachisqan cajonta patiopi churachirqa.+ Largonmi karqa iskay metro masnin*, anchonpas karqa iskay metro masninmi, sayayninñataqmi karqa huk metro masnin*, chaypa hawanmanmi Salomonqa qispirurqa. Hinaspam huñunasqa Israel runakunapa qayllanpi qunqurakuykuspan hanaq pachaman makinta haywarirqa.+
14 Hinaspam mañakurqa: “Israelpa yupaychasqan Jehova Dioslláy, manam qam hina Diosqa kanchu hanaq pachapipas nitaq kay pachapipas. Qamqa rimasqaykiman* hinam ruwanki, hinaspapas tukuy sunqunkuwan kasukuq runaykikunatam imaña kaptinpas kuyanki.+
15 Taytay Davidman nisqaykiman hinam cumplirunki.+ Kunanmá nisqaykiman hina cumplirunki.+
16 Israelpa yupaychasqan Jehova Dioslláy, qanmi taytay Davidta nirqanki: ‘Sichum churikikuna ñuqapa munasqayman hina kawsaspanku+ qam hina kasuwaptinkuqa, miraynikikunam Israel runakunata haykapipas kamachinqa’, nispa. Chayna nisqaykiman hinayá cumpliy.+
17 Israelpa yupaychasqan Jehova Dioslláy, kunanyá Davidman nisqayki cumplikuchun.
18 Dioslláy, ¿yaqachu runakunawan kay pachapi yachawaq?+ Hanaq pacha hatu-hatun kachkaspanpas manam kamasunkichu.+ Chaynaqa, ¿imaynataq kay wasi ruwasqayqa kamasunkiman?+
19 Jehova Diosnilláy, qampa qayllaykipi kunan mañakusqaytayá uyariykullaway. Kay yupaychaqnikipa qayakamullasqaytayá uyariykullaway.
20 Qanmi nirqanki kay wasipi sutiki hatunchasqa kananmanta.+ Tuta-punchawyá kay wasikita qawamuy, chaynapi kay wasi lawman qawamuspa mañakamuptiy uyariwanaykipaq.
21 Uyariykuwankimá yanapawanaykipaq mañakullasqayta, uyariykunkitaqmi Israel runaykikuna kaylawta qawamuspa mañakamuptinkupas.+ Hanaq pachapi kasqaykimanta uyariykamullawayku+ hinaspa pampachaykullawayku.+
22 Sichu pipas runamasinta mana allinta ruwarunman hinaspa jurachiptinku ninman: ‘Ñuqaqa manam chaytaqa ruwarqanichu, llullakuspayqa ñakasqayá kasaq’, nispa. Chayta nispan kay altarman hamuptinqa,+
23 qanmi hanaq pachamanta uyariykamuspa jueznin kanki. Mana allin ruwaqmanqa mana allin ruwasqanman hinam kutichipunki.+ Allin ruwaqmanñataqmi allin ruwasqanman hina kutichipunki.+
24 Israel runaykikuna huchallikusqankurayku chiqniqninkunapa makinpi kaspa+ hinaspa wanakuspanku kay wasipi+ sutikita hatunchaspa+ mañakuptinkuqa,+
25 hanaq pachamanta uyariykamuspa+ Israel runaykikunata pampachaykuy hinaspa ñawpaq abuelonkuman qusqayki allpaman kutichimuy.+
26 Runaykikuna huchallikusqankurayku+ mana parachiptiki+ kaylawman qawamuspa mañakamusuptikiqa, sutikita hatunchaptinkuqa hinaspa ñakarichisqaykimanta wanakuptinkuqa,+
27 hanaq pachamanta uyariykamuy, pampachaykuy, allinta kawsanankupaq yachachiy+ hinaspa qusqayki allpaman parachimuy.+
28 Sichu runaykikunapa allpanpi muchuy*,+ unquy,+ llumpay quni wayra kaptinqa utaq kawsaykuna chakiptinqa,+ aqarway urukuna+ tarpukusqankuta tukuptinqa, chiqniqnin runakuna mayqan llaqtatapas muyuriruptinqa,+ ima unquypas utaq ima sasachakuypas kaptinqa,+
29 sunqunpi ima llakiyuq kasqanman hina sapakama mañakamusuptikipas,+ pi runaña mañakamusuptikipas+ utaq llapallan Israel runaykikuna kay wasiman makinkuta haywarimuspa mañakamusuptikipas,+
30 hanaq pachapi yachasqaykimanta+ uyariykamuspa pampachaykuy.+ Qamllam sapakamapa sunquntaqa riqsinki, chaymi ruwasqankuman hina kutichipunki,+
31 chaynapim paykunaqa ñawpaq abueloykuman qusqayki allpapi kawsaspanku kasukusunki.
32 Dioslláy, huklaw llaqtayuqkunam mana Israelpa miraynin kachkaspankupas karu llaqtamanta sutikirayku hamunqaku.+ Paykunaqa sutikimanta hinaspa tukuy atiyniyuq kasqaykimantam uyarinqaku. Paykuna hamuspanku kay wasiki lawman qawamuspa mañakusuptikiqa,+
33 hanaq pachapi yachasqaykimanta uyariykamuy hinaspa paykunapa mañakusqanman hina ruwaykapuy. Chaynapi llapallan runakuna sutikimanta yachaspanku+ Israel runaykikuna hina manchakusunaykipaq chaynataq kay ruwasqay wasipi sutiki hatunchasqa kasqanta yachanankupaq.
34 Dioslláy, runaykikuna chiqniqninkunawan peleaq maymanpas rispanku+ akllasqayki llaqtata utaq qampa sutikirayku ruwasqay wasi lawta+ qawamuspa mañakamusuptikiqa,+
35 hanaq pachamanta uyariykamuspayá yanapaykuy.+
36 Dioslláy, lliwpas huchallikuqmi kallaniku. Sichu runaykikunata huchallikusqankurayku+ piñakuspayki chiqniqninkunaman quykunki, hinaptin karu llaqtaman preso apasqa kaspanku,+
37 chay llaqtapi kaspa qanman kutirikamuspa qayakamusunkiman: ‘Mana allinkunata ruwaspam huchallikuruniku’, nispanku.+
38 Chay presochasqanku llaqtamanta+ tukuy sunqunkuwan hinaspa tukuy vidankuwan* qanman kutirikamuspanku+ ñawpaq abuelonkuman qusqayki allpaman, akllasqayki llaqtaman+ chaynataq sutikirayku ruwachisqay wasiman qawamuspanku mañakamusuptikiqa,
39 hanaq pachapi yachasqaykimantayá uyariykamuy hinaspa yanapaykuy. Runaykikunata pampachaykuy.+ Tukuy imapi pantasqankutapas pampachaykuyá.
40 Chaynaqa Dioslláy, qawariykamuspaykimá kaypi mañakusqaykuta uyariykamullanki.+
41 Jehova Dioslláy kay wasipiyá samaykuy,+ kaypitaqyá atiynikita qawachiq baulnikipas kachun. Jehova Dioslláy, sacerdotekunapas runaykikunata waqaychaq kasqaykitayá qawachichunku, qanman sunqu kaqkunapas kuyakuq kasqaykiraykuyá kusikuchunku.+
42 Jehova Dioslláy, amayá akllasqayki runataqa qipanchaychu.+ Amayá qunqaychu yupaychaqniki Davidpaq allin kaqkuna ruwasqaykitaqa*”, nispa.+
Willakuykuna
^ Utaq: “Tiyananpaq”.
^ Utaq: “Pacto”. Qaway kay palabrapa ima ninan kasqanta.
^ Utaq: “Pichqa kuchus”. Qaway B14 kaq yachachikuyta.
^ Utaq: “Kimsa kuchus”.
^ Utaq: “Pacto ruwasqaykiman”.
^ Utaq: “Yarqay”.
^ Utaq: “Qamllapaqña kawsakunankupaq”.
^ Kaypiqa rimachkan imaña kaptinpas hinalla kuyasqanmantam.
