2 Cronicas 7:1-22
7 Salomon mañakuyta tukuruptillanmi+ hanaq pachamanta nina uraykamuspan+ nakasqa animalkunata ruparurqa, hinaptinmi Jehova Diospa kanchayninñataq wasiman huntarurqa.+
2 Jehova Diospa sacerdotenkunapas manam Jehova Diospa wasinman yaykuytaqa atirqakuchu, chayman Jehova Diospa kanchaynin huntarusqanrayku.+
3 Israel runakunam qawarqaku nina uraykamuqta hinaspa Jehova Diospa kanchaynin wasiman huntaykusqanta. Chaymi qunqurakuspa pampakama kumuykurqaku, hinaspam Jehova Diospa ruwasqankunamanta agradecekuspanku nirqaku: “Allin Dios kasqanraykuyá yupaychasun, payqa imaña kaptinpas wiñaypaq kuyakuqmi”, nispa.
4 Kamachiq Salomonwan llapallan runakunam Jehova Diospaq animalkunata nakapurqaku.+
5 Salomonmi nakapurqa 22.000 torokunata hinaspa 120.000 ovejakunata. Chaynatam ruwarqaku Diospa wasinta tukuruspanku.+
6 Llapallan Israel runakunam sayachkarqaku, sacerdotekunapas imam ruwananku lawpim cornetillakunata tocarqaku,+ paykunapa chimpanpiñataqmi Leviy ayllukuna karqa. Paykunam Davidpa ruwasqan kaqkunata tocarqaku. Chaykunatam Davidqa ruwarqa Jehova Diosta agradecekuspan hatunchananpaq. Jehova Diostaqa hatuncharqa: “Payqa imaña kaptinpas wiñaypaq kuyakuqmi”, nispam.
7 Chay kutipim Salomonqa wasipa ñawpaqninpi patiota Jehova Diosllapaq sapaqcharqa, chaypim Diospaq kañarqaku animalkunata,+ kawsaykunamanta qusqanku ofrendata+ hinaspa Dioswan hawkalla kasqankurayku wirata.+ Patiotaqa sapaqcharqa broncemanta ruwasqan altar+ tukuy chaykunata kañanankupaq mana haypasqanraykum.
8 Chay punchawkunam Salomonqa llapallan Israel runakunawan qanchis punchaw Diosta yupaychaspa kusikurqa.+ Chaymanmi hamurqaku Lebo-hamat llaqtamantapas*, chay llaqtaqa karqa karu-karupim. Hamurqakutaqmi Egipto wayqupi yachaqkunapas*.+
9 Pusaq kaq punchawpiñataqmi* mana qunqanapaq hina huñunakuyta ruwarqaku.+ Chay huñunakuytaqa ruwarqaku qanchis punchaw altarta Diospaq sapaqcharuspankuñam chaynataq qanchis punchawtawan kusirikuruspankuñam.
10 Chaymantam qanchis kaq killapa 23 punchawninpi Salomonqa runakunata wasinkumanña aviarqa. Paykunaqa kusisqallañam kutikurqaku+ Davidtapas, Salomontapas hinaspa Israel runakunatapas Jehova Dios kuyaspa yanapasqanrayku.+
11 Chaynatam Salomonqa Jehova Diospa wasintawan kikinpa wasin ruwayta tukururqa.+ Tantiasqanman hinataqmi ruwayta tukururqa Jehova Diospa wasinpiwan kikinpa wasinpi tukuy imakunatapas.+
12 Jehova Diosqa Salomonmanmi tuta rikuriykurqa sueñoyninpi,+ hinaspam nirqa: “Mañakuwasqaykitam uyariykuyki, kay wasitam sapaqcharuni animalkunata kañapuwanaykichikpaq.+
13 Sichu aqarway urukunawan kawsaykunata tukuchiptiy, unquywan runakunata hapirachiptiy hinaspa mana parachimuptiy,
14 sutiy apaq runaykuna+ wanakuptinkuqa+ uyariykusaqmi. Uyariykuspaytaqmi pampachaykusaq mana hatuntukuspa mañakuwaptinkuqa hinaspa mana allin ruwasqankutapas saqiptinkuqa.+ Pampachaykuspaytaqmi kawsayninkutapas qispichisaq.+
15 Kunanmantam kaypi mañakuwasqankuta uyarispay qawarisaq.+
16 Kay wasitam ñuqapaq sapaqcharuni, chaynapi sutiyta wiñaypaq riqsichinaypaq.+ Kay wasitam sapa punchaw qawasaq.+
17 Taytayki David hina allin kaqta ruwaptikiqa hinaspa tukuy ima kamachisqaykunata kasukuptikiqa,+
18 kamachiptikim yanapasqayki.+ Taytayki Davidman nisqaytam cumplisaq,+ paytam nirqani: ‘Miraynikikunam Israel runakunata haykapipas kamachinqa’, nispay.+
19 Sichu qamkuna kamachikuyniykunata mana kasukuptikichikqa chaynataq taytacha-mamachakunata qunqurakuykuspa yupaychaptikichikqa,+
20 qusqay allpamantam qalaypaq chinkachisqaykichik.+ Manañam sutiy riqsisqa kananpaq sapaqchasqay wasitapas qawarisaqñachu. Hinaptinmi huklaw runakuna mana kaqpaqpas hapisuspaykichik asikusunkichik.+
21 Kay wasiqa purmanqam. Pipas kayninta pasaqqa qawarayaspam+ ninqa: ‘¿Imanasqataq Jehova Diosqa kay allpata hinaspa wasita kaynarun?’, nispa.+
22 Hinaptinmi ninqaku: ‘Egipto nacionmanta ñawpaq abuelonkuta hurqumuqninku+ Jehova Diosta qipanchasqankuraykum.+ Paykunaqa taytacha-mamachakunata kuyaruspankum qunqurakuykuspa yupaycharqaku.+ Chaymi Diosqa tukuy kay mana allinta paykunaman aparamun’”, nispa.+
Willakuykuna
^ Utaq: “Tiyaqkunapas”.
^ Utaq: “Hamat llaqtaman yaykunamantapas”.
^ Kayqa karqa kusirikusqanku punchawkuna pasaytam, chaykamaqa 14 punchawñam pasarurqa.
