2 Reyes 16:1-20
16 Israel nacionta 17 wataña Remaliaspa churin Peka kamachichkaptinmi kamachiq Jotanpa churin Acaz+ Juda nacionta kamachiyta qallaykurqa.
2 Acazqa 20 watanpi kachkaspam kamachiyta qallaykurqa. Jerusalen llaqtamantam 16 wata kamachirqa. Payqa manam ñawpaq abuelon David hinachu Jehova Diospa munasqanman hina allin kaqkunata ruwarqa.+
3 Aswanqa Israel nacionta kamachiqkuna hinam mana allinkunata ruwarqa.+ Acazqa Israel runakunapa qayllanmanta Jehova Diospa qarqusqan runakuna hinam+ churintapas kañarqa.+
4 Chaymantapas yupaychana patakunapim,+ kallmasapa sachakunapa sikinpim+ hinaspa muqukunapim kañaspan qusnichiq.
5 Chay punchawkunapim Siria nacionta kamachiq Rezinwan Israel nacionta kamachiq Remaliaspa churin Peka Jerusalenman rirqaku kamachiq Acazwan peleanankupaq.+ Llaqtata muyuriruspankupas manam yaykurqakuchu.
6 Siria nacionta kamachiq Rezinmi Elat llaqtata+ Juda runakunamanta qichururqa, hinaspam Juda runakunata qarquruspan Edom runakunaman chay llaqtataqa kutichipurqa. Chaymi Edom runakunaqa kunankama chaypi yachachkanku*.
7 Chayraykum Acazqa Asiria nacionta kamachiq Tiglat-pileserman+ willachirqa: “Taytalláy, ñuqaqa runaykim kallani. Hamuspaykiyá harkaykuway Siria nacionta kamachiqmanta hinaspa Israel nacionta kamachiqmanta”, nispa.
8 Hinaspam Acazqa huñururqa Jehova Diospa wasinpi chaynataq kikinpa wasinpi llapallan quri-qullqita. Hinaspanmi Asiria nacionta kamachiqman apachirqa.+
9 Asiria nacionta kamachiqñataqmi quri-qullqita chaskirurqa, hinaspam Damasco llaqtata rispan munaychakururqa. Runakunatapas presocharuspanmi Kir lawman+ pusachirqa, hinaspam kamachiq Rezinta wañurachirqa.+
10 Chaymantam kamachiq Acazqa Damasco llaqtata rirqa kamachiq Tiglat-pileserta qawaq. Chaypim altarta rikururqa, hinaspam imayna kasqanta dibujaspan sacerdote Uriyaman apachirqa.+
11 Kamachiq Acazpa apachisqanman hinam Uriyaqa+ altarta ruwarqa.+ Hinaspam Damasco llaqtamanta Acaz manaraq kutimuchkaptin ruwayta tukururqa.
12 Kutiramuspanmi kamachiq Acazqa Uriyapa ruwasqanpi animalkunata kañarqa.+
13 Chaypiqa hinallam animalkunata hinaspa kawsaymanta ofrendata kañaspan qusnichirqa, chaymanqa tallirqataqmi vinotapas, challarqataqmi animalkunapa* yawarnintapas.
14 Chaymantam altar ruwachisqanta churarurqa broncemanta altarpa hichpanman.+ Chay broncemanta altarqa Jehova Diospa wasinpa ñawpaqninpim karqa. Chaytam Jehova Diospa wasinpa waqtanman* asurachirqa.
15 Kamachiq Acazmi sacerdote Uriyata+ nirqa: “Ruwachisqay altarpiyá animalta nakaspa achikyaqman kañay,+ inti siqaykuytañataqyá kawsaymanta ofrendata kañaspa qusnichiy.+ Qusnichiytaqyá qusqay animaltawan kawsaymanta ofrendatapas. Qusnichiytaqyá llapallan runakunapa qusqanku animaltapas, kawsaymanta ofrendatapas hinaspa vinotapas. Chaymanqa challaytaqyá kañana animalpa yawarnintapas chaynataq wakin nakasqa animalkunapa yawarnintapas. Broncemanta altarwan imata ruwanaypaqqa ñuqañam tantiasaq”, nispa.
16 Sacerdote Uriyaqa kamachiq Acazpa nisqanman hinam ruwarqa.+
17 Kamachiq Acazqa carretakunapa tableronkunatapas kuchuparurqam,+ hurqururqataqmi hawanpi kaq hatun lavatoriokunatapas.+ Ruyru estanquetapas hurquruspanmi pampaman* tiyarachirqa.+ Chay estanqueqa broncemanta torokunapa wasanpim tiyarqa.+
18 Jehova Diospa wasinmantaqa hurqurachirqataqmi samana punchawpi* purinankupaq hatarichisqankutapas, chayqa karqa qatasqam. Wichqarachirqataqmi Diospa wasinman kamachiqpa yaykunantapas. Chaykunataqa ruwarurqa Asiria nacionpa kamachiqninta manchakuspanmi.
19 Acazpa imayna kawsakusqanmanta hinaspa imakunata ruwasqanmantaqa Juda nacionta kamachiqkunamanta willakuq libropim qillqasqa kachkan.+
20 Acaz wañukuptinmi pamparurqaku ñawpaq abuelonkunapa pampakusqan Davidpa llaqtan sutiyuq llaqtapi. Hinaptinmi churin Ezequiasña*+ kamachirqa.
Willakuykuna
^ Utaq: “Tiyachkanku”.
^ Hebreo rimaypiqa nichkan: “Dioswan hawkalla kasqanrayku qusqan animalkunapa”, nispam.
^ Utaq: “Norte lawninman”.
^ Hebreo rimaypiqa nichkan: “Rumikunawan churasqa pampaman”, nispam.
^ Utaq: “Sabadopi”.
^ “Ezequias” ninanqa: “Jehova Diosmi kallpanchaq”, ninanmi.
