2 Samuel 7:1-29
7 Kamachiq Davidqa sumaq wasinpiñam yacharqa*,+ hinaspapas Jehova Dios yanapaptinmi chiqniqninkunapa manaña imanasqan kawsakurqa.
2 Chaymi Davidqa Diosmanta willakuq* Natanta+ nirqa: “Ñuqaqa cedromanta ruwasqa sumaq wasipim yachachkani.+ Diospa baulninñataqmi carpallapi kachkan”, nispa.+
3 Natanñataqmi Davidta nirqa: “Sunquykipa nisqantayá ruway, Jehova Diosmi yanapasunki”, nispa.+
4 Chay tutam Natanta Jehova Dios nirqa:
5 “Yupaychaqniy Davidtayá nimuy: ‘Jehova Diosmi nisunki: “Manam qamchu yupaychawanankupaq wasitaqa ruwanki.+
6 Egipto nacionmanta Israel runaykunata hurqumusqay punchawmanta kunankamaqa manam wasipichu yupaychawarqaku,+ aswanqa apaykachasqanku carpallapim.+
7 Israel runaykunata yanapasqay punchawkunapiqa paykunata yanapananpaqmi sapa ayllumanta runakunata akllarqani, chay akllasqay runakunataqa manam haykapipas nirqanichu wasita ruwapuwanankupaqqa. Manam haykapipas nirqanichu: ‘¿Imanasqataq cedro sachamanta wasita mana ruwapuwankichikchu?’”’, nispaqa.
8 Yupaychawaqniy Davidtaqa nimuytaqyá: ‘Angelkunata kamachiq Jehova Diosmi nisunki: “Oveja michiq kachkaptikim+ ñuqaqa akllarqayki Israel runaykunapa kamachiqnin kanaykipaq.+
9 Ñuqaqa qanwanmi kasaq mayta riptikipas.+ Qawachkaptikim chiqnisuqniki runakunata chinkachisaq.+ Hinaspaymi yanapasqayki ancha riqsisqa+ runakuna hina kanaykipaq.
10 Israel runaykunamanmi sumaq allpata qusaq. Chaypim pipapas manaña imanasqan yachanqaku. Manañam chiqniqnin runakunapas ñawpaqpi hinaqa ñakarichinqachu.+
11 Chiqniqnin runakunaqa juezkunata churasqay+ tiempomantaraqmi ñakarichirqaku. Chiqnisuqniki runakuna manaña imanasunaykipaq yanapaptiymi hawkaña kawsakunki.+
Chaymantapas, ñuqa Jehova Diosmi yanapasqayki qampas chaynataq miraynikikunapas kamachiq kanaykichikpaq. Ñuqa Jehova Diosmi chaynata niki.+
12 Ñawpaq abueloykikuna hina wañukuptikipas+ kikikipa churikitam kamachiq kananpaq churasaq, hinaspam yanapasaq.+
13 Paymi wasita ruwapuwanqa sutiy hatunchasqa kananpaq.+ Ñuqañataqmi yanapasaq kamachikuynin wiñaypaq kananpaq.+
14 Ñuqam taytan kasaq, payñataqmi churiy kanqa.+ Mana allinta ruwaptinqa churinta azotechkaq tayta hinam azotesaq.+
15 Paytaqa manataqmi Saulta hinachu qipanchasaq*,+ Saultaqa qarqururqani paypa rantinpi qamta churanaypaqmi.
16 Qampas chaynataq miraynikikunapas wiñaypaqmi kamachinkichik. Wiñaypaq takyachisqam kanqa kamachiq kasqaykipas”’”, nispa.+
17 Natanqa Diospa kayna nisqankunatawan musquypi hina* qawasqankunatam Davidman willarqa.+
18 Chaymi kamachiq Davidqa tiyaykuspan Jehova Diosta mañakurqa: “Llapallan kamachiq Jehova Dioslláy, ¿pitaq ñuqaqa kani? ¿Pitaq aylluypas kunankama yanapawanaykikupaqqa?+
19 Manataqmi chayllachu. Llapallan kamachiq Jehova Dioslláy, qamqa niwankiraqmi mirayniykuna unay kamachinanmantapas. Llapallan kamachiq Jehova Dioslláy, chayna kasqantam lliw runakuna yachanqaku.
20 Llapallan kamachiq Jehova Dioslláy, ¿imataraqtaq ñuqallayqa nikiman? Qamqa allintapunim riqsiwanki.+
21 Qamqa ñawpaqmantaraq nisqaykiraykum chaynataq munasqaykiraykum tukuyta ñuqapaq ruwarqanki, hinaspam willaykuwanki.+
22 Chayraykum llapallan kamachiq Jehova Dioslláy, ancha atiyniyuq kanki.+ Manam qam hinaqa pipas kanchu,+ uyarisqaykupi hinapas qamllam Diosqa kanki.+
23 ¿Yaqachu Israel runaykikuna hina kanman huk runakuna?+ Diosnilláy, qanmi paykunataqa runaykikuna kananpaq ñakarichisqa kasqankumanta hurqumurqanki.+ Paykunarayku manchakuypaq kaqkunata ruwaspaykim+ ancha riqsisqa karqanki.+ Egiptomanta hurqumusqayki runaykikunaraykum huklaw llaqtayuq runakunatapas taytacha-mamachantinta qarqurqanki.
24 Qanmi Israel runakunata wiñaypaq runaykikuna kananpaq akllaykurqanki.+ Jehova Dioslláy, qanmá paykunapa Diosninqa kanki.+
25 Chaynaqa, Jehova Diosnilláy, ñuqamanta hinaspa mirayniykunamanta rimasqaykiman hinayá nisqaykiqa wiñaypaq kachun.+
26 Sutikiqa wiñaypaqyá hatunchasqa kachun,+ runakunapas nichunkuyá: ‘Angelkunata kamachiq Jehova Diosqa Israel runakunapa Diosninmi’, nispa. Kay yupaychaqnikipa mirayninkunaqa qampa yanapakuynikiwanyá wiñaypaq kachun.+
27 Israel runakunapa Diosnin hinaspa angelkunata kamachiq Jehova Dioslláy, qanmi niwarqanki: ‘Qampas chaynataq miraynikikunapas kamachiqmi kankichik’, nispayki.+ Chayraykum kallpanchakullani chaynata mañakamunaypaq.
28 Llapallan kamachiq Jehova Dioslláy, qamllam Diosqa kanki, qamqa mana llullakuq Diosmi kanki.+ Kay yupaychaqnikimanmi allin kaqkunata willaykuwanki.
29 Chaynaqa, qampa bendicionnikiwanyá mirayniykunaqa wiñaypaq kachun.+ Llapallan kamachiq Jehova Dioslláy, qanmi chaynata nirqanki. Qampa bendicionnikiwanyá mirayniykunaqa wiñaypaq bendecisqa kachun”, nispa.+
Willakuykuna
^ Utaq: “Tiyarqa”.
^ Utaq: “Profeta”. Qaway kay palabrapa ima ninan kasqanta.
^ Kaypiqa rimachkan imaña kaptinpas hinalla kuyananmantam.
^ Utaq: “Revelacionninpi”.
