Apocalipsis 2:1-29
2 Efeso+ llaqtapi huñunakuq iñiqkunaman willaq angelman+ kaynata qillqay: Alliq* makinpi qanchis lucerokuna hapiq hinaspa qurimanta qanchis candelabrokunapa chawpinpi puriqmi kaynata nin:+
2 ‘Yachanim ruwasqaykita, llamkasqaykita, sasachakuykunawan mana hukmanyasqaykita hinaspa mana allin ruwaq runakunata mana aguantasqaykita. Yachanitaqmi “apostolmi* kani”+ niqkunamanta allinta yachaykuspayki llulla kasqanta hayparusqaykita, paykunaqa manam apostolkunachu.
3 Qamqa tukuy imatam aguantachkanki,+ sutiyraykum mana pisipaspa hinalla kallpanchakuchkanki.+
4 Chaywanpas kuyakuynikiqa manañam ñawpaqta hinañachu.
5 Chaynaqa, imam saqirusqaykita yuyarispayá wanakuy hinaspayá qallariypi ruwasqaykikunata ruway. Mana ruwaptikiqa qanmanmi hamusaq hinaspam candelabroykita+ maymi kasqanmanta asurachisaq. Mana wanakuptikiqa+ chaytamá ruwasaq.+
6 Ichaqa kaytam allinta ruwachkanki: Qamqa chiqninkim Nicolaspa+ qatiqninkunapa ruwasqankunata, ñuqapas chaytaqa chiqninim.
7 Pipas rinriyuqqa iñiqkunaman chuya espiritupa* nisqantayá uyarichun:+ Pipas venceqqa+ mikunqam kawsachikuq sachamanta,+ chay sachaqa Diospa sumaq huertanpim kachkan’, nispa.
8 Esmirna llaqtapi huñunakuq iñiqkunaman willaq angelman kaynata qillqay: Wañusqa kachkaspan kawsarimuq+ ‘punta kaqwan qipa kaqmi’+ kaykunata nisunki:
9 ‘Ñuqaqa yachanim ñakarisqaykita hinaspa wakcha kasqaykita, ichaqa apum kanki.+ Yachanitaqmi “judiom kani” niqkunapa insultasusqaykitapas, paykunaqa manam judiochu kanku, aswanqa satanaspa qatiqninkunam.+
10 Amayá manchakuychu tukuy imawan ñakarinaykimantaqa,+ diabloqa hinallam wakiqnikichikta presochachisunkichik, chaynapi sunquykichikpi ima kasqan yachakunanpaq, hinaptinmi chunka punchaw ñakarinkichik. Ichaqa wañukunaykikamam qaqa hina sayanayki, hinaptinqa kawsakuytam pagota hina chaskinki.+
11 Pipas rinriyuqqa uyarichunyá+ iñiqkunaman chuya espiritupa nisqanta: Pipas venceqqa+ iskay kaq wañuypiqa manapunim wañunqachu’, nispa.+
12 Pergamo llaqtapi huñunakuq iñiqkunaman willaq angelman kaynata qillqay: Iskay lawnin filoyuq hatun espadayuqmi kaynata nin:+
13 ‘Ñuqaqa yachanim maypi yachasqaykita*, qamqa yachanki satanaspa trononpim, chaywanpas qamqa ñuqaman hapipakuspam+ Antipas sutiyuq confianapaq testigoypa+ tiemponpipas ñuqapi iñisqaykimanta mana karunchakurqankichu,+ payqa qamkunapa kasqaykichik llaqtapim wañuchisqa karqa,+ chayqa satanaspa yachanan llaqtam.
14 Ichaqa contraykipim kaykunalla ninay kachkan: Qamqa Balaampa+ yachachisqanman hapipakuqkunawanmi kachkanki, Balaamqa Balactam+ yachachirqa Israel runakunapa mirayninkunata huchallichinanpaq chaynataq taytacha-mamachakunaman qusqa kaqkunata mikunankupaq hinaspa huchapakunankupaq*.+
15 Qanwantaqmi kachkan Nicolaspa+ yachachisqanman hapipakuqkunapas.
16 Chayraykuyá huchaykimanta wanakuy. Mana wanakuptikiqa qanman chaylla hamuruspaymi paykunawan peleasaq simiymanta lluqsimuq hatun espadawan.+
17 Pipas rinriyuqqa iñiqkunaman chuya espiritupa nisqantayá uyarichun:+ Pipas venceqmanqa+ “maná”+ nisqa sutiyuq pakasqa mikuytam qusaq, qusaqtaqmi yuraq rumichatapas, chay rumichapim mana pipapas yachasqan suti qillqasqa kachkan, chaytaqa yachan chaskiqllam’, nispa.
18 Tiatira+ llaqtapi huñunakuq iñiqkunaman willaq angelman kaynata qillqay: Rawrachkaq nina+ hina ñawiyuq hinaspa lluchkayachisqa bronce hina chakiyuq Diospa churinmi kaynata nin:+
19 ‘Ñuqaqa yachanim ruwasqaykikunata, kuyakuq kasqaykita, Diospi iñiq kasqaykita, Dios servisqaykita hinaspa sasachakuykunapi mana hukmanyasqaykita. Yachanitaqmi qipa ruwasqaykikuna punta ruwasqaykikunamantaqa aswanraq kasqantapas.
20 Ichaqa contraykipim kayta ninay kachkan: Qanwan kuska kaq Jezabeltam qamqa mana imatapas ninkichu, payqa “Diosmanta willakuqmi kani” nispanmi serviqniykunata+ yachachispan pantachichkan, chaynapi huchapakunankupaq*+ hinaspa taytacha-mamachakunaman qusqanku animalpa aychanta mikunankupaq.
21 Jezabeltaqa wanakunantam suyarqani, ichaqa manam huchapakusqanmanta* wanakuyta munanchu.
22 Kunallanmi paytaqa unqurachisaq mana hatariy atinankama, paywan pierdekuqkunatapas* llumpaytam ñakarichisaq, chaynam kanqaku chay warmipa huchallichisqan huchamanta mana wanakuspankuqa.
23 Wawankunatapas mana hampiy atina unquywanmi wañuchisaq, chaynapim achka hawaqpi huñunakuq lliw iñiqkuna yachanqaku runapa sunqunta hinaspa imam piensasqankuta riqsisqayta, qamkunamanmi sapakamaman ruwasqaykichikman hina pagasqaykichik.+
24 Ichaqa Tiatira llaqtapi wakinnikichik Jezabelpa yachachisqanta mana kasukuqkunata hinaspa satanaspa pantay yachachikuyninkunata+ mana yachaqkunatam nikichik: Manam huk sasa ruwaytachu kamachimuchkaykichikqa.
25 Qamkunapam kachkan allin kaqkuna, chaykunamanyá hamunaykama allinta hapipakuychik.+
26 Pipas venceqmanqa hinaspa tukupaykama kamachisqaykunata kasukuqmanqa nacionkunata kamachinanpaqmi atiyta qusaq,+
27 kamachinaypaq atiyta taytaymanta chaskisqayman hina. Chaymi pipas venceqqa runakunata kamachinqa* fierromanta tawnawan,+ hinaptinmi allpamanta ruwasqa vaso hina ñutupasqa kanqaku.
28 Paymanqa qusaqtaqmi achikyaq lucerotapas.+
29 Pipas rinriyuqqa uyarichunyá iñiqkunaman chuya espiritupa nisqanta’, nispa.
Willakuykuna
^ Utaq: “Paña”.
^ Utaq: “Kachasqan runam”.
^ Qaway “chuya espiritu” niqpa ima ninan kasqanta.
^ Utaq: “Tiyasqaykita”.
^ Qaway kay palabrapa ima ninan kasqanta.
^ Qaway kay palabrapa ima ninan kasqanta.
^ Huchapakuytam griego rimaypi “porneia” ninku. Qaway “huchapakuy” niq palabrapa ima ninan kasqanta.
^ Utaq: “Waqllikuqkunatapas”.
^ Griego rimaypiqa nichkan: “Michinqa”, nispam.
