Apocalipsis 20:1-15
20 Chaymantam rikurqani hanaq pachamanta uraykamuchkaq huk angelta, uraykamuchkasqaqa uku-uku uchkupa llaventa+ aparikuspam chaynataq hatu-hatun cadenata aparikuspam.
2 Chay angelmi manchakuypaq culebrata hapiruspan+ cadenawan watarurqa 1.000 watapaq, chay manchakuypaq culebraqa diablowan+ hinaspa satanaswan+ sutichasqa ñawpaqmantaraq kaq culebram.+
3 Wataruspanmi uku-uku uchkuman wischuykurqa,+ hinaspam wichqaruspan suma-sumaqta segurarurqa, chaynapi 1.000 wata tukurunankama nacionkunata ama pantachinanpaq. 1.000 wata tukuruptinmi ichaqa pisi tiempolla kacharisqa kanqa.+
4 Rikurqanitaqmi tronokunatapas, chaypi tiyaqkunañataqmi atiyta chaskirqaku juzganankupaq. Chaymantapas rikurqanim Jesusmanta willakusqankurayku hinaspa Diosmanta rimasqankurayku wañuchisqa* kaqkunatapas. Paykunaqa kawsariramuspankum Cristowan* 1.000 wata kamachinqaku,+ paykunaqa manam yupaycharqakuchu manchakuypaq animaltapas nitaq imagennintapas, paykunaqa manataqmi urkunkupipas nitaq makinkupipas marcasqachu karqaku.+
5 Paykunaqa punta kawsarimuqkunam.+ Wakin wañuqkunaqa 1.000 wata tukuruptinñam kawsarqaku.+
6 Ancha kusisqa hinaspa chuyay-chuyaymi punta kawsarimuqkunaqa,+ iskay kaq wañuyqa+ manañam paykunapiqa munaychakunchu,+ aswanqa Diospa chaynataq Cristopa sacerdotenkunam kanqaku,+ paykunaqa Cristowanmi 1.000 wata kamachimunqaku.+
7 Ichaqa 1.000 wata tukuruptinmi satanasqa presochasqa kasqanmanta kacharisqa kanqa,
8 hinaspam lluqsimunqa kay pachapa tawan cantonkunapi kaq nacionkunata utaq Gogtawan Magogta pantachiq, chaynapi guerrapaq paykunata kaqmanta huñumunanpaq. Chay huñumusqankuqa lamar quchapa patanpi aqu hina achkallañam.
9 Paykunam enteron kay pachaman rispanku muyurirunqaku Diospa runankunapa yachanan* carpakunata hinaspa Diospa kuyasqan llaqtata. Ichaqa hanaq pachamanta nina wichiykamuspanmi paykunataqa ruparunqa.+
10 Paykunata pantachiq diablopas azufreyuq ninapa rupasqan quchamanmi wischusqa kanqa, chay quchapim kachkarqaña manchakuypaq animal+ hinaspa Diosmanta willakuqtukuq*,+ chaypim tuta-punchaw wiña-wiñaypaq presochasqa kanqaku*.
11 Rikurqanitaqmi hatu-hatun yuraq tronotapas, rikurqanitaqmi chaypi tiyaqtapas.+ Paypa ñawpaqninmantam kay pachapas chaynataq hanaq pachapas chinkarurqa,+ chaymi paykunapa kananpaq hinaqa manaña maypas karqachu.
12 Chaymantapas wañusqakunatam rikurqani, riqsisqakunapas hinaspa mana ancha riqsisqakunapas tronopa ñawpaqninpim sayachkasqaku, hinaptinmi wankukuq qillqakuna kichakururqa. Kichakururqataqmi huk wankukuq qillqapas, chay qillqaqa kawsakuyta tarinapaq wankukuq qillqam.+ Wañusqakunaqa imapas ruwasqankuman hinam chaynataq wankukuq qillqakunapa nisqanman hinam juzgasqa karqaku.+
13 Hinaptinmi lamar quchaqa chaypi wañuqkunata qumurqa, wañuypas hinaspa wañusqakunapa kasqanpas* chaypi kaq wañusqakunatam qumurqa, hinaptinmi chay wañusqakunaqa ruwasqankuman hina sapakama juzgasqa karqaku.+
14 Wañuypas chaynataq wañusqakunapa kasqanpas* rupachkaq quchamanmi wischusqa karqaku.+ Rupachkaq quchaqa+ iskay kaq wañuy ninanmi.+
15 Chaymantapas Diospa libronpi sutinku mana qillqasqa kaqkunaqa+ chay rupachkaq quchamanmi wischusqa karqaku.+
Willakuykuna
^ Griego rimaypiqa nichkan: “Hachawan wañuchisqa”, nispam.
^ Utaq: “Diospa akllasqanwan”.
^ Utaq: “Tiyanan”.
^ Utaq: “Profetatukuq”.
^ Griego rimaypiqa nichkan: “Ñakarichisqa kanqaku”, nispam. Bibliapi ‘ñakarichisqa’ nispaqa rimanmantaqmi wichqasqa utaq presochasqa kasqanmanta. Qaway Mateo 8:29 hinaspa Lucas 8:28, 31.
^ Griego rimaypiqa nichkan: “Hadespas”, nispam. Qaway kay palabrapa ima ninan kasqanta.
^ Griego rimaypiqa nichkan: “Hadespas”, nispam.
