Esdras 9:1-15
9 Chaykuna ruwayta tukuruptiykum kamachiqkuna asuykamuwaspan niwarqa: “Israel runakunaqa, sacerdotekunaqa hinaspa Leviy ayllukunaqa manam rakikunkuchu hichpankupi yachaq* millakuypaq kaqta ruwaq runakunamantaqa.+ Aswanmi paykunapa ruwasqankuta qatipakuchkanku. Chay runakunam kanku: Canaan runakuna, Het runakuna, Perizita runakuna, Jebus runakuna, Ammon runakuna, Moab runakuna, Egipto runakuna+ hinaspa Amorreo runakuna.+
2 Paykunapas chaynataq churinkupas chay llaqtayuq warmikunawanmi casarakurunku.+ Chaynapimá Diospaq sapaqchasqa runankunaqa+ huklaw llaqtayuq runakunawan hukllawakurunku.+ Wakin kamachiqkunawan yanapaqninkunam chay hucha ruwaytaqa qallaykurqaku”, nispa.
3 Chayta uyariykuspaymi pachayta llikirurqani, chukchaytawan barbaytapas chutakuspaymi llakisqa tiyarqani.
4 Preso kutimuqkuna huchallikusqankuraykum Diosta kasukuqkuna ñuqapa kasqayman huñunakamurqaku. Ñuqaqa inti siqaykuyta kawsaymanta ofrendata kañana horakamam llakisqa tiyarqani.+
5 Inti siqaykuyta kawsaymanta ofrendata kañana hora chayaramuptinmi+ llakisqa tiyasqaymanta hatarirqani. Hinaspam makiyta haywarispay llikisqa pachayuq qunquraykuspa Jehova Diosta mañakurqani.
6 Kaynatam mañakurqani: “Diosnilláy, pinqakuymantam qanman asuykamuyta mana atillanichu. Diosnilláy, mana allin ruwasqaykum llumpayta mirarun, huchaykupas hanaq pachakamam chayarun.+
7 Ñawpaq abueloykupa punchawninmanta kunankamam llumpayta huchallikuruniku.+ Chaymi kamachiqkunapas, sacerdotekunapas, ñuqaykupas huklawpi kamachiqkunaman qusqa karqaniku. Hinaptinmi wañuchisqa,+ preso apasqa,+ suwasqa,+ chaynataq pinqayman churasqa karqaniku. Chaynam kunankamapas kachkaniku.+
8 Chaywanpas Jehova Dioslláy, llakipayariykuwarqankikum. Chaymi wakiqniyku kutimurqaniku chuya allpaykiman,+ chaypi hawka hinaspa kusisqa kawsanaykupaq. Diosnilláy, hukkunapa makinpi kachkaptiykupas kallpanchaykuwarqankikum.
9 Diosnilláy, chayna kachkaptiykupas+ qamqa manam saqiwarqankikuchu. Aswanqa imaña kaptinpas hinallam kuyawarqankiku, hinaspam Persia nacionta kamachiqkunawan+ yanapawarqankiku purmasqa wasikita kaqmanta hatarichinaykupaq.+ Hinaspam Juda nacionpi hinaspa Jerusalenpi waqaychaykuwarqankiku.
10 Chaywanpas manam kamachikuynikikunataqa kasukurqanikuchu. Chaynaqa, ¿imataraqtaq nikikuman Diosllayku?
11 Qanmi willakuq runaykikunawan* niwarqankiku: ‘Yaykunaykichik allpaqa qanrachasqa hinam kachkan runakuna mana allinkunallataña ruwasqankurayku. Paykunaqa millakuypaq kaqkunata ruwaspankum allpataqa kuchun-kuchun qanrachasqata hina ruwarunku.+
12 Chaynaqa, amayá churi-wawaykichiktaqa paykunapa churi-wawankuwanqa casarachiychikchu.+ Amataqyá paykunapa hawka kawsakusqankutawan tukuy imankutaqa munapayaychikchu.+ Chaynapi allin kanaykichikpaq, allpapa allinnin rurunta mikunaykichikpaq, churi-wawaykichikpaq allpanku wiñaypaq kananpaq’, nispa.
13 Diosllayku, qamqa manam huchaykuman hinachu ñakarichiwarqankiku,+ aswanqa yanapaykuwarqankikum.+ Huchaykurayku tukuy mana allinkunawan ñakarichkaspaykuqa,
14 ¿kaqmantachu kamachikuynikikunata mana kasukusaqku? ¿Kaqmantachu millakuypaq kaqkunata ruwaq runakunawan casarachinakusaqku?+ ¿Manachu chaynata ruwaptiykuqa piñakuspayki llapallaykuta chinkarachiwankikuman?
15 Israelpa yupaychasqan Jehova Diosllayku, qamllam allin ruwaqqa kanki,+ yanapaykuwaptikikum kunankama kawsachkanikuraq. Qayllaykipiqa huchasapam kallaniku. Tukuy mana allinkunata ruwasqaykuraykum mana qanman asuykunaykupaq hinachu kaniku”, nispa.+
