Ester 1:1-22
1 Asuerom* kamachirqa 127 llaqtakunata.+ Chay llaqtakunam karqa India lawmanta Etiopia* lawkama.
2 Asueropa wasinmi karqa Susa llaqtapi.+
3 Kimsa wata kamachichkaspanmi achka mikuyta ruwachirqa. Chaypim karqaku llapallan runankuna. Hamurqakutaqmi Persia+ chaynataq Media+ soldadokunapa kamachiqninkunapas, ancha riqsisqa runakunapas, sapa llaqtapi kamachiqkunapas.
4 Chaypim Asueroqa qawachirqa munayniyuq kasqanta hinaspa tukuy ima kapuqninkunata, chayqa karqa yaqa suqta killam.
5 Chaymanta qipatam kamachiq Asueroqa wasinpa pationpi qanchis punchaw mikuyta ruwachirqa. Chaymanmi qayachirqa aputapas wakchatapas.
6 Chay patiom karqa linomanta, algodonmanta hinaspa azul telamanta ruwasqa cortinayuq. Watunkunañataqmi karqa morado qaytukunamanta sumaq awasqa. Chay watunkunam qullqimanta anillokunapa ukunta pasarqa, hinaspam marmolmanta pilarkunaman watasqa karqa. Tiyanakunapas quri-qullqimantam karqa, pampanñataqmi karqa sumaq chiqchi rumiwan, yuraq rumiwan, llipipipiq alaqa rumiwan hinaspa yana rumiwan.
7 Qurimanta tukuy rikchaq vasokunapim vinota tomaqku. Vinotaqa kamachiq Asuerom achka-achkata apachimuq.
8 Chay kutipim kamachiqwan yanapaqninkuna tantiarurqaku munasqanta pipas tomakunanpaq, manataqmi pitapas hikutanankuchu karqa.
9 Asueropa warmin Vastipas+ warmikunapaqmi mikuyta ruwachirqa.
10 Qanchis punchawmantam kamachiq Asueroqa vinota tomakuspan kusisqallaña kachkarqa, hinaspam yanapaqninkunawan rimarqa. Paykunam karqaku Meuman, Bizta, Harbona,+ Bigta, Abagta, Zetar hinaspa Carcas.
11 Paykunatam kamachirqa warmin Vastita sumaq allichasqata pusamunankupaq. Chaynapi lliw runakuna hinaspa kamachiqkuna kuyayllapaq kasqanta qawanankupaq.
12 Ichaqa achka kutikama willachiptinpas Vastiqa manam kasukurqachu. Hinaptinmi kamachiq Asueroqa llumpayta piñakururqa.
13 Hinaspanmi nacionpa kamachikuyninkunamanta allin yachaqkunata hinaspa queja allichaqkunata tapurqa. Chaynatam chay punchawkunapi kamachiqkunaqa ruwaqku.
14 Kamachiqpa chay tapukusqan runakunam karqa kuyasqan hinaspa ancha riqsisqa yanapaqninkuna. Paykunam karqa+ Carsena, Setar, Admata, Tarsis, Meres, Marsena hinaspa Memucan. Paykunaqa Persia hinaspa Media lawkunapi kamachiqkunam karqaku.
15 Paykunatam Asuero nirqa: “Kamachikuyman hinaqa, ¿imatataq warmiy Vastita ruwayman mana kasuwasqanmanta?”, nispa.
16 Hinaptinmi Memucanñataq nirqa: “Kamachiqlláy, warmikipa mana kasukusqanwanqa manam qamllachu pinqaypiqa kanki,+ llapallan kamachiqkunapas chaynataq kamachisqayki runakunapas pinqaypim kaniku.
17 Warmikipa ruwasqanta yacharuspankum llapallan warmikunapas manaña qusankuta kasukunqakuchu. Hinaspam ninqaku: ‘Vastiqa manataq kasukunchu kamachiq Asuero qayachiptinpas’, nispa.
18 Persia hinaspa Media lawpi kamachiqkunapa warminkupas warmiki Vastipa mana kasukusqanmanta yacharuspankuchá qusankuwan rimanqaku. Chayqa pinqaypaqmi kanqa.
19 Chaynaqa kamachiqlláy, warmiki Vasti manaña haykapipas asuykamusunaykipaqyá kamachikuyta hurquy. Hinaspapas chayqa Persia hinaspa Media nacionpa kamachikuyninman yapasqayá kachun. Chay kamachikuykunataqa manam pipas chinkachinmanchu.+ Chaymantapas, Vastipa rantinpiyá aswan allin warmita akllay.
20 Chay kamachisqaykita yacharuspankum llapallan warmikuna qusankuta kasukunqaku”, nispa.
21 Memucanpa rimarisqanmi kamachiqpaq chaynataq yanapaqninkunapaq allin rikchakurqa, chaymi kamachiq Asueroqa Memucanpa nisqanman hina ruwarqa.
22 Hinaspanmi kamachisqan lliw llaqtakunaman cartata apachirqa.+ Apachirqaqa sapa llaqtapa imayna qillqasqankuman hinam hinaspa rimayninkuman hinam. Chay cartapim nirqa qarikuna warminkuwan kasuchikunankupaq hinaspa paykunapa rimayninta ayllunkupi rimanankupaq.
