Ester 5:1-14
5 Kimsa punchawmantam+ Esterqa kamachinan pachawan churakuruspan Asueropa kasqanman rirqa. Hinaspanmi hawa lawpi sayaykurqa. Asueroqa tiyananpim tiyachkasqa punku lawman qawamuspan.
2 Esterta rikuruspanmi kusirikurqa, hinaspanmi qurimanta tawnanta haywariykurqa.+ Esterñataqmi asuykuspan tawnanpa puntanta llachpaykurqa.
3 Kamachiq Asueroñataqmi Esterta nirqa: “¿Imanantaq Ester? ¿Imatataq mañakuwanki? Niykuway, ñuqaqa qusqaykim kamachisqay nacionpa partentapas”, nispa.
4 Esterñataqmi nirqa: “Kamachiqlláy, munaymanmi ruwachisqay mikuyman Hamanwan+ kuska hamunaykita”, nispa.
5 Chaymi kamachiq Asueroqa runankunata nirqa: “Esterpa nisqanman hinayá kunallan Hamanta qayamuychik”, nispa. Chaynapimá kamachiq Asueroqa Hamanpiwan Esterpa ruwachisqan mikuyman rirqaku.
6 Mikuruspanku vinota tomachkaptinkum kamachiqqa Esterta nirqa: “¿Imatataq mañakuwanki? Niykuway, kamachisqay nacionpa partentapas qusqaykim”, nispa.+
7 Esterñataqmi nirqa: “Kamachiqlláy,
8 paqarinmi kaqmanta mikuyta ruwachisaq. Chaymanyá Hamanpiwan kutimunkichik. Paqarinñam nisqayki ima munasqaytaqa”, nispa.
9 Chay punchawmi Hamanqa kusisqallaña kutichkaspan Mardoqueota rikururqa kamachiqpa wasin punkupi tiyachkaqta. Mardoqueoqa manam hatarirqapaschu nitaq manchakurqapaschu. Hinaptinmi Hamanqa llumpayta piñakururqa.+
10 Chaywanpas mana imatapas nispam wasinman pasakurqa. Chaymantam qayachirqa riqsinakusqan runakunata chaynataq warmin Zerestapas.+
11 Hinaspam Hamanqa hatunchakurqa kapuqninkunarayku, achka churiyuq kasqanrayku+ hinaspa llapallan runankunapa kamachiqnin kananpaq Asuero churasqanrayku.+
12 Hamanqa nirqaraqmi: “Esterqa ñuqallatam niwarqa ruwachisqan mikuyman kamachiqwan rinaypaqqa,+ paqarinpas kutisaqkum.+
13 Chaywanpas, kamachiqpa wasin punkupi Mardoqueo tiyasqanta qawasqaywanmi mana hawkachu kani”, nispa.
14 Chaymi warmin Zeres hinaspa riqsinakusqan runakuna Hamanta nirqaku: “Kamachiy 22 metro masnin* sayayniyuq qiruta* sayachinankupaq. Hinaspayá kamachiqta paqarin niy chaypi Mardoqueota warkunankupaq,+ chaynapim qamqa kusisqaña Esterpa mikuy ruwachisqanman rinki”, nispa. Chayna nisqanku Hamanpaq allin rikchakuptinmi kamachirqa qiruta sayachinankupaq.
