Ester 7:1-10
7 Kaqmantam kamachiq Asueroqa Hamanpiwan+ Esterpa mikuy ruwachisqanman kutirqaku.
2 Chay punchawmi mikuruspanku vinota tomachkaptinku kamachiq Asueroqa kaqmanta Esterta nirqa: “¿Imanantaq Ester? ¿Imatataq mañakuwanki? Niykuway, ñuqaqa qusqaykim kamachisqay nacionpa partentapas”, nispa.+
3 Esterñataqmi nirqa: “Kamachiqlláy, ñuqatawan llaqtamasiykunatayá wañuymanta harkaykullawayku.+
4 Llaqtamasiykunatawan ñuqatam rantikuruwanku*+ wañuchisqa kanaykupaq.+ Hukkunapa serviqnin kanaykupaq rantikuruwaptinkuqa manach imatapas niymanchu. Kay pasakusqanqa manam allinchu. Qamtam sasachasunkiman kamachiqlláy”, nispa.
5 Chaynata niptinmi kamachiq Asueroqa Esterta nirqa: “¿Pitaq chayqa? ¿Maypitaq kachkan chayta ruway munaq runaqa?”, nispa.
6 Esterñataqmi nirqa: “Chiqniwaqniyku mana allin ruwaq runaqa kay Hamanmi”, nispa.
Chaynata niptinmi Hamanqa mancharikurqa.
7 Chaymantam kamachiq Asueroqa piñakuruspan huertaman lluqsirurqa. Hamanñataqmi Asuero wañurachinanta yacharuspan Esterman asuykurqa wañunanmanta libraykunanpaq.
8 Lluqsisqanmanta Asuero kutiramuptinmi Hamanqa Esterpa tiyasqanman hapikuykuspan kachkasqa. Chaymi qaparispan nirqa: “¿Wasiypipunichu warmiy Esterta abusayta munarqanki?”, nispa. Chaynata niykuptillanmi Hamanpa uyanta taparurqaku.
9 Chaymantapas, kamachiqpa wasinpi llamkaq Harbonam+ nirqa: “Hamanqa wasinpim 22 metro masnin* sayayniyuq qiruta* sayarachirqa Mardoqueota+ warkuchinanpaq. Mardoqueoqa mana wañuchisqa kanaykipaqmi yanapasurqanki”, nispa.+ Hinaptinmi kamachiq Asueroqa nirqa: “¡Chaynaqa kikin Hamantayá chay qirupi warkumuychik!”, nispa.
10 Chaymi Hamantaña warkururqaku Mardoqueota warkunanpaq sayachisqan qirupi. Chayraqmi kamachiq Asueroqa hawkayarurqa.
Willakuykuna
^ Utaq: “Venderuwanku”.
^ Utaq: “50 kuchus”. Qaway B14 kaq yachachikuyta.
^ Utaq: “Kaspita”.
