Ester 8:1-17
8 Chay punchawllam kamachiq Asueroqa Hamanpa+ tukuy imanta Esterman quykurqa. Hamanqa Juda runakunata chiqniq runam karqa.+ Estermi kamachiq Asueroman chayraq willaykurqa Mardoqueopa ayllun kasqanta, chaymi Mardoqueoqa kamachiqman asuykurqa.+
2 Hinaptinmi kamachiq Asueroqa Hamanmanta qichusqan sellanan anillota Mardoqueomanña quykurqa.+ Esterñataqmi Mardoqueota churarurqa Hamanpa tukuy imanmanta cuentallikunanpaq.+
3 Chaymantam Esterqa kamachiq Asueroman kaqmanta asuykurqa. Payqa ñawpaqninpi qunqurakuykuspanmi waqarqa, hinaspanmi mañakurqa Juda runakuna wañuchisqa kanankupaq Agag kasta Hamanpa kamachikuy hurqusqanta chinkachinanpaq.+
4 Hinaptinmi kamachiq Asuero qurimanta tawnanta haywariykuptin Esterqa+ sayariykurqa.
5 Hinaspanmi nirqa: “Kamachiqlláy, ama hina kaspayá huk kamachikuyta qillqaspa llaqtakunaman apachiy. Chaynapi Agag+ kastamanta Hamedatapa churin Hamanpa+ kamachikuy hurqusqan chinkachisqa kananpaq. Paymi llapallan llaqtakunapi Juda runakuna wañuchisqa kanankupaq cartakunata aparachirqa.
6 ¿Ima nispataq qawayman llaqtamasiykunapa ñakarisqanta? Maynatach llakikuyman aylluykunapa wañusqanta qawaspayqa”, nispa.
7 Chaymi kamachiq Asueroqa Estertawan Mardoqueota nirqa: “Ester, Hamanpa tukuy imantam quykuykiña.+ Hinaspapas Hamantaqa warkurachiniñam+ Juda runakunata wañuchiy munasqanrayku.
8 Juda runakuna wañuchisqa kanankupaq kamachikuytaqa manam chinkachiyta atiymanchu anilloywan sellasqa kasqanrayku. Chaynaqa, Juda runakuna allin kanankupaqyá huk kamachikuyta qillqaychik. Hinaspayá anilloywan sellaychik”, nispa.+
9 Chaymi sivan sutiyuq kimsa kaq killapa 23 punchawninpi kamachiqpa secretarionkunata qayachirqaku. Paykunam Mardoqueopa tukuy kamachisqanta qillqarqaku Juda runakunaman. Qillqarqakuqa imaynam qillqasqankuman hinam hinaspa rimayninkuman hinam. Qillqarqakutaqmi kamachiqpa yanapaqninkunamanpas*+ chaynataq Indiamanta qallaykuspa Etiopiakama 127 llaqtakunapi kaq kamachiqkunamanpas.+ Qillqarqakuqa imaynam qillqasqankuman hinam hinaspa rimayninkuman hinam.
10 Chaynapimá Mardoqueoqa cartakunata qillqarachirqa kamachiq Asueropa sutinpi, hinaspanmi sellarachirqa kamachiqpa anillonwan.+ Chay cartatam allin kallpaq caballokunawan chiqichimurqaku. Chay caballokunam karqa kamachiqpaq uywasqa.
11 Chay cartakunapim rimarqa sapa llaqtapi Juda runakuna huñunakuspanku contranpi hamuqkunawan peleanankupaq Asueropa kamachisqan. Chaynapi wañuchiy munaqninkuta warmikunatapas warmakunatapas wañuchispanku tukuy imankuta hapikuykunankupaq.+
12 Chaytaqa llapallan llaqtakunapim ruwananku karqa adar killapa 13 punchawninpi. Chayqa karqa 12 kaq killam.+
13 Chaytaqa willanankupunim karqa llapallan llaqtakunapi hinaspa llaqtachakunapipas. Chaynapi listo kaspanku chiqniqnin runakunawan Juda runakuna peleanankupaq.+
14 Asueropa kamachisqanman hinam willakuqkunaqa utqayman kallpaq caballokunawan chaylla lluqsirqaku. Chay kamachikuyqa willasqataqmi karqa Susa llaqtapipas.+
15 Kamachiq Asueropa qayllanmantam Mardoqueoqa lluqsirqa kamachiqpa churakunan azul hinaspa yuraq pachayuq, qurimanta coronayuq hinaspa moradoniraq sumaq capayuq.+ Susa llaqtapi yachaqkunañataqmi* kusikuymanta qaparirqaku.
16 Llapallan Juda runakunamá hawka hinaspa ancha kusisqa tarikurqaku.
17 Llapallan llaqtakunapi kaq Juda runakunam chay kamachikuyta yacharuspanku ancha kusisqallaña tarikuspanku mikuykunata ruwarqaku. Juda runakunata manchakuspankum huklaw llaqtayuq achka runakunapas paykunamanña hukllawakurqaku.+
