Exodo 17:1-16
17 Israelpa lliw mirayninkunam Sin sutiyuq chunniqmanta huklawmanña rirqaku.+ Paykunaqa sama-samarispam Jehova Diospa kamachisqanman hina rirqaku.+ Chaymantam chayarurqaku Refidinmanña*, hinaspam chaypi kaqmanta samarqaku.+ Chayqa karqa mana yakupa kananmi.
2 Chaymi runakunaqa piñakuspa Moisesta nirqaku:+ “Yakutayá quwayku”, nispa. Moisesñataqmi nirqa: “¿Imanasqataq piñakuwankichik? ¿Imanasqataq Jehova Diosmanta rimaspa iskayrayachkankichik?”, nispa.+
3 Israelpa mirayninkunaqa yakumantam wañuruchkarqakuña, chaymi hinalla rimaspa Moisesta nirqaku:+ “¿Imapaqtaq Egiptomanta pusamuwarqankiku? ¿Yakumanta ñuqaykupas chaynataq churiykupas wañunaykupaqchu? Yakumantachiki animalniykupas wañurunqa”, nispa.
4 Hinaptinmi Moisesqa Jehova Diosta mañakuspan nirqa: “¿Imatataq paykunawan ruwasaq? ¡Hawkam paykunaqa rumiwanpas tukuruwanqa!”, nispa.
5 Jehova Diosñataqmi Moisesta nirqa: “Israelpa mirayninkunatayá ñawparuy punta apaqkunawan kuska, apaytaqyá Nilo mayuman haywarisqayki tawnaykitapas.+ Chayta aparikuspayá ñawparuy.
6 Ñuqaqa Horeb sitiopim ñawpaqnikipi hatun rumipa hawanpi kasaq, chay rumita waqtaptikim Israelpa lliw mirayninkunapaq yaku lluqsinqa”, nispa.+ Chaymi Moisesqa punta apaqkuna qawachkaptin rumita waqtarqa.
7 Hinaspam chaylawta suticharqa Meribawan*+ Israelpa mirayninkuna paypaq piñakusqanrayku. Masa*+ nispañataqmi suticharqa Jehova Diosmanta rimaspa iskayrayasqankurayku.+ Paykunam nirqaku: “¿Jehova Diosqa ñuqanchikwanchu kachkan, ichapas mana?”, nispa.
8 Amalec runakunañataqmi+ Israelpa mirayninkunapa kasqan Refidinman wañuchinankupaq hamurqaku.+
9 Hinaptinmi Moisesqa Josueyta nirqa:+ “Wakin qarikunata akllaspayá Amalec runakunata wañuchiq riy. Paqarinmi muqupi kasaq Diospa quwasqan tawnata huqarispay”, nispa.
10 Chaymi Josueyqa Moisespa nisqanman hina akllasqan runakunawan Amalec runakunata wañuchiq rirqa.+ Moisesñataqmi Aaronwan hinaspa Hurwan+ kuska muquman rirqaku.
11 Chay muqupim Moisesqa tawnanta huqarispa hapirayarqa, hinaptinmi Israelpa mirayninkunaqa Amalec runakunata wañuchiqku. Moisespa makin utiruptin manaña llumpayta huqariptinñataqmi Amalec runakunaña Israelpa mirayninkunata wañuchiqku.
12 Llumpayta makin utiruptinñataqmi Moisestaqa rumipi tiyachirqaku. Hinaptinmi huknin makinta huqariysirqa Aaron, huknin makintañataq Hur. Chaynatam paykunaqa inti siqaykuykama Moisesta huqariysirqaku.
13 Chaynapim Josueyqa Amalec runakunata espadawan wañuchirqa.+
14 Chaymantam Jehova Diosqa Moisesta nirqa: “Ama qunqasqa kananpaqyá kayta huk libropi qillqay, hinaspayá Josueyta niy: ‘Amalec runakunatam kay pachamanta pasaypaqta chinkachisaq, manam pipas paykunataqa yuyarinqachu’, niqta.+ Chaynatayá Josueymanpas niy”, nispa.
15 Chaymantam Moisesqa altarta* pirqaruspan suticharqa “Jehova-nisi*” nispa.
16 Chaynataqa suticharqa kayna nisqanraykum: “Jehova*+ Diosta Amalec runakuna mana kaqpaqpas hapisqankuraykum Jehova Diosqa Amalec runakunata qipa punchawkunapas wañuchinqa”, nispa.+
Willakuykuna
^ Utaq: “Refidim sitiomanña”.
^ “Meriba” ninanqa: “Piñanakuy” utaq “liryay”, ninanmi.
^ “Masa” ninanqa: “Yachay munay”, ninanmi.
^ Qaway kay palabrapa ima ninan kasqanta.
^ “Nisi” niq palabraqa hebreo rimaypi “señalpaq posteymi” niqmantam hamun.
^ Kaypi Jehova sutitaqa Jah nispapas nichwanmi.
