Exodo 18:1-27
18 Moisespa suedron Jetrom yacharurqa Moisespaq Jehova Dios imakuna ruwasqanta, yacharurqataqmi Israelpa mirayninkunata Egipto nacionmanta Dios imayna hurqusqantapas.+ Madianpim Jetroqa sacerdote* karqa.+
2 Moisesmi warmin Ziporata nirqa suedron Jetropa wasinman rinanpaq, hinaptinmi Jetroqa nanachikurqa Ziporamanta chaynataq
3 Moisespa iskaynin churinkunamanta.+ Moisesqa huknin churintam suticharqa “Guersom*” nispa,+ chaynataqa suticharqa: “Kaypiqa huklaw llaqtayuq runam kani”, nispam.
4 Huknin churintañataqmi suticharqa Eliezerwan*, chaynataqa suticharqa: “Taytaypa Diosninmi yanapaqniyqa, paymi Egipto nacionta kamachiq* espadawan wañurachiwananmanta harkaykuwarqa”, nispam.+
5 Chaymantam Jetroqa Moisespa kasqan chunniq qichwaman rirqa paywan tupaykunanpaq, chaymanqa rirqa Moisespa warminta hinaspa churinkunata pusarikuspanmi. Chay tupananku sitioqa karqa Diospa urqunpa waqtan lawñam.+
6 Jetroqa Moisesmanmi willachimurqa: “Ñuqa suedroyki Jetrom+ warmikipiwan hinaspa iskaynin churikikunapiwan hamuchkani”, nispa.
7 Hinaptinmi Moisesqa chaylla taripaykuspan kumuykurqa, hinaspanmi rimakuykuspan muchaykurqa. Imayna kasqankumanta rimaruptinkuñataqmi Moisesqa carpanman pusaykurqa.
8 Moisesqa suedronmanmi willarqa Egiptota kamachiqtawan runankunata Jehova Dios tukuywan ñakarichisqanmanta.+ Willarqataqmi hamusqankupi ima sasachakuykunapi kasqankumantapas+ chaynataq Jehova Dios imayna yanapasqanmantapas.
9 Jetroñataqmi anchata kusikurqa Israelpa mirayninkunata Egiptomanta hurqumuspan Jehova Diospa imakunapas ruwasqanwan.
10 Hinaspam Jetroqa nirqa: “Jehova Diosyá hatunchasqa kachun. Paymi Egiptomanta pusamusurqankichik hinaspa Egipto nacion kamachiqmanta libraykamusurqankichik. Paytaqmi Israelpa mirayninkunata yanapaykurqa Egipto runakuna amaña ñakarichinanpaq.
11 Diosqa ñakarichirqam hatuntukuspa runankuna ñakarichiqkunataqa. Chaywanmi yachani Jehova Dioslla aswan atiyniyuq Dios kasqanta”, nispa.+
12 Hinaspanmi Moisespa suedron Jetroqa Diospaq animalta nakaspan kañapurqa, wakintañataqmi nakaylla-nakapurqa. Hinaptinmi Aaronwan Israelpa mirayninkunapi lliw punta apaqkunaqa Jetrowan mikuq rirqaku, paykunaqa mikurqaku Dios qawachkaptinmi.
13 Paqarintinñataqmi Moisesqa sapa kuti ruwasqanman hina tiyaykurqa Israelpa mirayninkunapa sasachakuyninkuta allichananpaq. Tukuy punchawmi runakunaqa Moisesman asuykuqku.
14 Israelpa mirayninkunapaq Moisespa tukuy ruwasqanta qawaspanmi suedronqa nirqa: “¿Imanasqataq runakunapa sasachakuyninkunataqa tukuy punchaw sapallayki allichachkanki? ¿Imanasqataq chaynataqa ruwachkanki?”, nispa.
15 Moisesñataqmi suedronta nirqa: “Dios yanapaykunanta munaspa runakuna hinalla hamusqankuraykum.
16 Ima sasachakuyninkupas kaptinqa ñuqamanmi hamunku, hinaptinmi ñuqa allichani. Chaymantapas Diospa nisqantam hinaspa kamachisqantam paykunaman willani”, nispa.+
17 Chaymi suedronqa Moisesta nirqa: “Manam allintachu ruwachkanki.
18 Qampas chaynataq kaypi kaq runakunapas aminakuruwaqchikmi. Chay ruwasqaykiqa llumpay sasam, manam sapallaykiqa ruwawaqchu.
19 Diosqa manam saqisunkichu,+ chaywanpas kay nisqayta uyariykuway. Qamqa kay runakunapa rantinpim Dioswan rimanayki,+ hinaspam imapas sasachakuyninkutaqa Diosman willanayki.+
20 Hinaspapas paykunamanmi yachachinayki Diospa kamachikuyninkunata,+ imayna kawsakunankumanta hinaspa imakuna ruwanankumanta.
21 Akllaytaqyá Israelpa mirayninkunamanta runakunatapas. Chay runakunaqa kananku allin yachayniyuqmi,+ Diosta kasukuqkunam, imam kaqta rimaqkunam hinaspa apuyaylla mana maskaqkunam.+ Wakintam churanki 1.000 runakunata yanapananpaq, wakintañataq 100 runakunata yanapananpaq, wakintañataq 50 runakunata yanapananpaq hinaspa wakintañataq chunka runakunata yanapananpaq.+
22 Paykunam yanapasunki, mana llumpay sasa kaqtaqa paykunalla allichachunku, sasa kaqllatañam qamqa allichanayki.+ Hinaptinmi chaykuna allichaypiqa manaña llumpaytaqa sasachakunkichu.+
23 Nisqayman hina ruwanaykipaq Dios munaptinqa manam aminkichu. Runakunapas hawkam carpankuman kutikunqaku”, nispa.
24 Hinaptinmi Moisesqa suedronpa nisqanman hinaña ruwarqa.
25 Israelpa mirayninkunamantam Moisesqa chaypaq hina runakunata akllarqa, hinaspam churarqa 1.000 runata wakin yanapananpaq, wakinñataq 100 runata yanapananpaq, wakinñataq 50 runata yanapananpaq hinaspa wakintañataq chunka runata yanapananpaq.
26 Paykunañam runakunapa sasachakuynintaqa allichaqku. Sasa kaqllantañam Moisesmanqa chayachiqku,+ wakintam ichaqa paykunalla allichaqku.
27 Chaymantam Moisesqa suedronta aviarurqa,+ hinaptinmi suedronqa llaqtanman kutikurqa.
Willakuykuna
^ Ichapas Dios yupaychaq karqa.
^ “Guersom” ninanqa: “Wak allpapi huklaw llaqtayuq”, ninanmi.
^ “Eliezer” ninanqa: “Yanapakuqmi Diosniyqa”, ninanmi.
^ Utaq: “Faraon”.
