Exodo 27:1-21
27 Chaymantapas Diosqa nirqam: “Acacia tablamantam altarta ruwanki.+ Chayqa cajon hina tawa waqtayuqmi kanan, sapa waqtanmi kanan iskay metro masnin*, sayayninñataqmi kanan huk metro masnin*.+
2 Chaymantapas chay altarpa tawan esquinanpim ñawchirayaq waqrakunata+ ruwanki, chay waqrakunaqa huk piezallamantam kanan. Hinaspam altarta broncewan llusinki.+
3 Broncewantaqmi ruwanki uchpa huqarinapaq baldekunatawan palakunatapas, tazonkunatapas, trinchekunatapas chaynataq sansa apanakunatapas.+
4 Ruwankitaqmi altarpa tawan esquinanpi broncemanta tawa rinrinkunatapas chaynataq broncemanta malla hina rejillatapas.
5 Hinaspam chay rejillataqa ukunman churanki, hinaptinmi chay rejillaqa kanqa yaqa chawpipi.
6 Chaymantapas altarta apanaykichikpaqmi acacia sachamanta kaspikunata ruwanki, hinaspam broncewan llusinki.
7 Chay kaspikunataqa altarta apanaykichikpaqmi iskay lawninpi rinrinkunaman ustuchinki.+
8 Chay altarqa tablakunamanta ruwasqa mana pampayuqmi kanan. Chaytaqa ruwanki kay urqupi willasqayman hinam.+
9 Chaymantapas carpapa muyuriqninpim patio+ kanan. Chay patiopa alliq* lawninmi kanan 44 metro parten*,+ tukuy chaytam sirasqa hatun telakunawan harkachinki. Chay telakunaqa kawpusqa linaza llañu qaytumanta ruwasqam kanan.
10 Chaypaqmi broncemanta ruwasqa 20 qirukunata sayachinki broncemanta ruwasqa tuquyuq 20 tiyanakunapi. Chay qirukunapa puntanpi clavokunaqa hinaspa rinrinkunaqa qullqimanta ruwasqam kanan.
11 Carpapa ichuq* lawnin patiotapas 44 metro parten sayayniyuq sirasqa telawanmi harkachinki. Chaypipas broncemanta ruwasqa 20 qirukunatam sayachinki broncemanta ruwasqa tuquyuq 20 tiyanakunapi. Chay qirukunapa puntanpipas clavokunaqa hinaspa rinrinkunaqa qullqimanta ruwasqam kanan.
12 Carpapa qipan patiotapas 22 metro masnin* sayayniyuq sirasqa telawanmi harkachinki, kanantaqmi chunka qirukunawan tuquyuq chunka tiyanakunapas.
13 Carpapa ñawpaqninpi patiopas 22 metro masninmi* kanan, carpapa ñawpaqninqa intipa qispimunan lawmanmi qawanan.
14 Patiopa punkun lawpa huknin waqtanpi sirasqa telaqa yaqa qanchis metrom* kanan, kanantaqmi kimsa qirukunawan tuquyuq kimsa tiyanakunapas.+
15 Huknin waqtanpi sirasqa telapas yaqa qanchis metrotaqmi* kanan, chaypipas kananmi kimsa qirukunawan tuquyuq kimsa tiyanakuna.
16 Patiopa punkunpi cortinañataqmi yaqa isqun metro* kanan. Chay hatun mantelqa ruwasqa kanan azul llañu qaytumanta, morado qaytumanta, puka llañu qaytumanta hinaspa kawpusqa linaza llañu qaytumantam.+ Chay punkupiqa tawa qirukunam tuquyuq tawa tiyanayuqkama kanan.+
17 Carpapa muyuriqnin patiopi qirukunaqa lliwmi qullqimanta ruwasqa clavoyuqkama hinaspa rinriyuqkama kanan, tuquyuq tiyanankunam ichaqa broncemanta ruwasqa kanan.+
18 Patiopa waqtanmi 44 metro parten* kanan,+ huknin waqtanñataqmi 22 metro masnin* kanan, sayayninñataqmi iskay metro masnin* kanan. Carpapa muyuriqninta wichqanayki telakunaqa kawpusqa linaza llañu qaytumantam kanan, hinaspapas broncemanta tuquyuq tiyanayuqmi kanan.
19 Carpapi serviciokunaqa lliwmi broncemanta kanan, muyuriqninpi qirukunata hapiq estacakunapas hinaspa carpata hapiq estacakunapas broncemantam kanan.+
20 Chaymantapas Israelpa mirayninkunatam kamachinayki aceitunasllamanta aceiteta* apamunankupaq, chaytaqa apamunanku achki hinalla ratananpaqmi.+
21 Aaronwan churinkunam carpapi kaq achki hinalla ratananpaq qawananku, ñuqa Jehova Diosta yupaychawanaykichik chay achkiqa tukuy tutam hinalla ratanan,+ chay candelabroqa kachkan baulniyta+ rakiq cortinapa ñawpaqninpim. Kayqa una-unaypaq kamachikuymi kanqa qamkunapaq hinaspa miraynikichikkunapaqpas”, nispa.+
Willakuykuna
^ Utaq: “Kimsa kuchus”.
^ Utaq: “Pichqa kuchus”. Qaway B14 kaq yachachikuyta.
^ Utaq: “Paña”.
^ Utaq: “100 kuchus”.
^ Utaq: “Lluqi”.
^ Utaq: “50 kuchus”.
^ Utaq: “50 kuchusmi”.
^ Utaq: “15 kuchusmi”.
^ Utaq: “15 kuchustaqmi”.
^ Utaq: “20 kuchus”.
^ Utaq: “100 kuchus”.
^ Utaq: “50 kuchus”.
^ Utaq: “Pichqa kuchus”.
^ Chay aceitetaqa hurquqku aceitunasta chamchaspam.
