Exodo 33:1-23
33 Chaymantapas Jehova Diosqa Moisestam nirqa: “Egiptomanta pusamusqayki Israelpa mirayninkunawanyá qunay allpaman riy. Abrahanman, Isaacman hinaspa Jacobmanmi nirqani: ‘Miraynikikunamanmi chay allpataqa qusaq’, nispay.+
2 Ñawpaqnikita rinanpaqmi angelniyta kachamusaq,+ hinaspam qarqusaq Canaan runakunata, Amorreo runakunata, Het runakunata, Perizita runakunata, Hev runakunata hinaspa Jebus runakunata.+
3 Chay rinayki allpaqa tukuy imapa kanan allpam*.+ Ñuqam ichaqa mana qamkunawanqa risaqchu, llumpay mana kasukuq+ kasqaykichikraykum wañurachikichikman”, nispa.+
4 Diospa chayna nisqanta uyarispankum Israelpa mirayninkunaqa llumpay llakisqa kaspa manaña alaqankutapas churakurqakuchu.
5 Jehova Diosñataqmi Moisesta nirqa: “Israelpa mirayninkunatayá niy: ‘Qamkunaqa llumpay mana kasukuq runakunam kankichik,+ ñawi qimchiyllapim qamkunataqa chinkarachikichikman.+ Chaymi alaqaykichiktaqa ama churakunkichikchu qamkunawan ima ruwanayta tantianaykama’”, nispa.
6 Chaymi Israelpa mirayninkunaqa Horeb urqupi kasqankumantapacha alaqankutaqa manaña churakurqakuchu.
7 Chaymantam Moisesqa Israelpa lliw mirayninkunapa samasqankumanta karuniqman carpanta aparqa, hinaspam “huñunakuna carpa” nispa suticharqa. Chay carpamanñataqmi Jehova Dioswan rimay munaqkuna+ riqku.
8 Chay carpaman Moises sapa kuti riptinmi Israelpa mirayninkunaqa llapallanku carpankupa punkunpi sayarqaku. Paykunaqa carpaman Moises yaykunankamam qawaqku.
9 Carpaman Moises yaykuruptinñataqmi sayanpa puyuqa+ carpapa punkunpi tiyaykuq, chaypim puyuqa hinalla karqa Moiseswan Dios rimanankama.+
10 Chay carpapa punkunpi puyuta qawaspankum Israelpa llapallan mirayninkunaqa carpanku punkupi qunqurakuspa kumuykuqku.
11 Moisesqa kuyasqan runawan rimachkanmanpas hinam Jehova Dioswanqa rimaq*.+ Israelpa mirayninkunaman Moises kutimuptinñataqmi Nunpa churin yanapaqnin Josueyqa+ carpamanta mana suchuriqchu.
12 Chaymantam Moisesqa Jehova Diosta nirqa: “Qamqa niwachkankim: ‘Runaykunatayá pusay’, nispa. Ichaqa manam niwankiraqchu pi riysiwanantaqa. Niwarqankitaqmi: ‘Ñuqam akllarqayki, hinaspapas ñuqapa kuyasqaymi kanki’, nispa.
13 Kuyawaspaykiqa riqsichillawayá imayna kasqaykita,+ chaynapi hinalla kuyasqayki kanaypaq. Amayá qunqaruychu Israelpa mirayninqa runaykikuna kasqanta”, nispa.+
14 Hinaptinmi Dios nirqa: “Kikiypuni qanwan riptiymi+ hawka kanki”, nispa.+
15 Moisesñataqmi nirqa: “Sichu ñuqaykuwan mana rinayki kaptinqa amayá kaymanta lluqsinaykupaqqa niwaykuchu.
16 ¿Imaynatam yachaymanku ñuqapas hinaspa runaykikunapas qampa kuyasqayki kasqaykuta? Ñuqaykuwan riptikiqa+ manam kay pachapi runakuna hinachu kasaqku”, nispa.+
17 Jehova Diosñataqmi Moisesta nirqa: “Chay niwasqaykitapas ruwasaqmi kuyasqay hinaspa akllasqay kasqaykirayku”, nispa.
18 Moisesñataqmi nirqa: “Kanchaynikitayá qawaykachillaway”, nispa.
19 Diosñataqmi nirqa: “Allin sunquyuq kasqaytam qawachisqayki, hinaspapas Jehova niq sutiy ima ninan kasqantam willasqayki.+ Yanapay munasqaytam yanapasaq, llakipayay munasqaytam llakipayasaq”, nispa.+
20 Diosqa nirqataqmi: “Manam uyaytaqa rikuwaqchu, pipas uyayta rikuqqa manam kawsanmanchu”, nispa.
21 Chaymantapas Jehova Diosqa nirqataqmi: “Kay waqtaypi hatun rumipa hawanpiyá sayay.
22 Kanchayniytam qawachisqayki, chay kanchayniy mana imanasunaykipaqñataqmi rumipa kakllunman churaspay makiywan harkasqayki.
23 Chaymantam makiyta suchuchiptiy wasallaytaña rikunki, uyaytam ichaqa mana rikunkichu”, nispa.+
Willakuykuna
^ Hebreo rimaypiqa nichkan: “Lechepa hinaspa mielpa kanan allpam”, nispam.
^ Hebreo rimaypiqa nichkan: “Uyapura rimaq”, nispam.
