Exodo 5:1-23
5 Chaymantam Moiseswan Aaronqa Egipto nacionta kamachiqpa* qayllanman rispanku nirqaku: “Israelpa mirayninkunapa yupaychasqayku Jehova Diosmi nin: ‘Runaykunatayá kachariy chunniqman rispa yupaychamuwananpaq’”, nispa.
2 Kamachiqñataqmi nirqa: “¿Pitaq chay Jehova Diosqa+ kasukunaypaqqa hinaspa Israelpa mirayninkunata kacharinaypaqqa?+ Manamá Jehova Diostaqa riqsinichu, manataqmi Israelpa mirayninkunataqa kacharisaqchu”, nispa.+
3 Moiseswan Aaronñataqmi nirqaku: “Ñuqayku Hebreo runakunaqa Diosniykuwanmi rimaruniku. Kimsa punchaw puriytayá chunniqman rirullasaqku Jehova Diosniykupaq animalkunata wañuchipamunaykupaq.+ Manachayqa ima unquywanpas payqa ñakarichiwanmankum, utaq pipas espadawan wañuchiwaptinkum mana harkaykuwanmankuchu”, nispa.
4 Hinaptinmi kamachiqqa nirqa: “Yaw Moiseswan Aaron, ¿imanasqataq runakuna pusayta munachkankichik? ¡Llamkaynikichikmanyá kutiychik!”, nispa.+
5 Nirqataqmi: “Kaypiqa achkallañamá qamkuna kastaqa kachkankichik. ¡Imaynamá llamkaynikichikta saqiruspaqa pasakuwaqchik!”, nispa.
6 Hina chay punchawtaqmi Egiptota kamachiqqa llamkaypi kamachiq piñallaña runakunatawan yanapaqninkunata nirqa:
7 “Kunanmantaqa amañam adobe chutaqkunamanqa pajata qunkichikñachu,+ kikinkuñayá huñukamuchunku.
8 Ichaqa ñawpaqta hayka adobe ruwasqankuta hinam ruwachinkichik, amam asllataqa ruwachinkichikchu. Paykunaqa qillakuspankum nichkanku: ‘¡Diosniykupaq animalta wañuchipunaykupaqmi riyta munaniku!’, nispa.
9 Astawanyá llamkachiychik, chaynata llamkaspankuqa manam yanqa rimaykunataqa uyarinqakuchu”, nispa.
10 Chaymi llamkaypi kamachiq piñallaña runakunaqa+ hinaspa yanapaqninkunaqa Israelpa miraynin runakunata nirqaku: “Egiptota kamachiqmi nin: ‘Manañam pajataqa qusqaykichikñachu,
11 kikikichikñayá maymantapas pajataqa huñukamuychik. Ichaqa hayka adobe ruwasqaykichikman hinam ruwanaykichik’”, nispa.
12 Chaymi Israelpa miraynin runakunaqa Egipto nacionpa tukuy lawninpi pajata maskarqaku adobeta ruwanankupaq.
13 Llamkaypi kamachiqkunañataqmi hikutaspa niqku: “Imaynam pajata chaskispa ruwasqaykichikman hinam kunanpas chaynallata sapa punchaw ruwanaykichik”, nispa.
14 Hinaspam Israel runakunamanta kaq yanapaqnin runakunata maqapaspa nirqaku: “¿Imanasqataq qayna punchawpas kunanpas mana ñawpaqta hinachu adobetaqa achkata ruwachirqankichik?”, nispa. Chay maqasqanku runakunaqa Israelpa mirayninkunamanta akllasqankum karqa, paykunataqa hina kikinkum akllarqaku kastamasinkunata kamachinankupaq.+
15 Hinaptinmi Israel runakunamanta kaq yanapanankupaq churasqa runakunaqa Egiptota kamachiqman rispa nirqaku: “¿Imanasqataq kaynataña ñakarichiwankiku?
16 Manataq runaykikunaqa pajata quwankuchu, aswanqa maqawaspankuraqmi niwachkanku adobeta hinalla achkata ruwanaykupaq. Imaynatamá runaykikuna pajata mana quwaptinkuqa ruwaymanku”, nispa.
17 Kamachiqñataqmi nirqa: “¡Llapa qilla runakuna!+ Qamkunaqa qilla kaspaykichikmi nichkankichik: ‘Jehova Diosniykupaq animalta wañuchipunaykupaqmi riyta munaniku’, nispa.+
18 ¡Kaymanta pasawaychik! ¡Imam ruwanaykichikta hinalla ruwamuychik! Manañam pajataqa pipas qusunkichikchu, chaywanpas puntata hinam adobetaqa achkata ruwanaykichik”, nispa.
19 “Puntata hinam adobetaqa achkata ruwanaykichik” nispa Egiptota kamachiq niykuptinmi chay yanapaq runakunaqa aswan llakipi tarikurqaku.
20 Chaymantañataqmi kamachiqwan rimasqankumanta lluqsiruspanku Moiseswan hinaspa Aaronwan tuparurqaku, Moiseswan Aaronqa hawapim paykunata suyachkarqaku.
21 Hinaptinmi kamachiqkunapa Israel runakunamanta kaq yanapaqninqa Moisestawan Aaronta nirqaku: “Jehova Diosyá ruwasqaykichikman hina qamkunata ñakarichisunkichik. Qamkunapa huchaykichikpim kamachiqpas hinaspa runankunapas chiqniruwanku, kunanqa wañurachiwanqakuchá”, nispa.+
22 Hinaptinmi Moisesqa Jehova Diosta mañakuspan nirqa: “Jehova Dioslláy, ¿imanasqataq kay runaykikuna ñakariqta qawanki? ¿Imanasqataq Egiptota kamachiqman kachamuwarqanki?
23 Qampa sutikipi rimasqaymantapacham+ kamachiqqa runaykikunata astawan ñakarichichkan.+ Qamqa manamá runaykikunataqa librankiraqchu”, nispa.+
Willakuykuna
^ Utaq: “Faraonpa”.
