Filemon 1:1-25
1 Kuyasqayku hinaspa yanapawaqniyku Filemon, Jesucristorayku* preso kaq+ ñuqa Pablom iñiqmasinchik Timoteopiwan+ qillqamuykiku,
2 qillqamunikutaqmi paninchik Apfiamanpas hinaspa ñuqayku hina Jesucristopa soldadon Arquipomanpas+ chaynataq wasikipi huñunakuq iñiqkunamanpas.+
3 Qamkunapaqyá kachun taytanchik Diospa hinaspa señor Jesucristopa ancha kuyakuynin* chaynataq hawkayaynin.
4 Tukuy tiempom Diosta agradecekuni qampaq mañakuspay.+
5 Ñuqaqa uyarichkanim señor Jesuspi iñisqaykimanta hinaspa payta chaynataq Diospa llapallan runankunata kuyasqaykimanta.
6 Diostam mañakuchkani wawqi-panikunapa hina iñisqayki yanapasuptiki Cristorayku* tukuy allin kaqkuna chaskisqanchikmanta sumaqta entiendenaykipaq.
7 Kuyakuq kasqaykimanta uyarispaymi ancha kusisqa hinaspa kallpanchasqa kachkani. Qamqa wawqilláy Diospa runankunapa sunquntam tiyaykachirqanki.
8 Cristopa apostolnin* kasqayrayku allin kaqta ruwanaykipaq mana manchakuspa kamachiyta atispaypas,
9 kuyakuq kasqaykita yachaspaymi ruegakamuyki. Ñuqa Pabloqa yuyaqñam kani, kunanñataqmi Jesucristorayku preso kachkani.
10 Churiy hina kaq Onesimopaqmi+ mañakamuyki, presochasqa* kachkaspaymi paypaqa taytan+ hina karqani.
11 Ñawpaqtaqa manam allin yanapaqnikichu karqa, kunanmi ichaqa qamtapas ñuqatapas allintaña yanapawachkanchik.
12 Ancha kuyasqay Onesimotam qanman kutichimuchkani.
13 Munaymanmi ñuqawan qipakunanta chaynapi sumaq willakuyta willakusqayrayku preso kasqaypi qampa rantikipi yanapawananpaq,+
14 ichaqa manam imatapas ruwayta munanichu manaraq “arí” niwachkaptikiqa, chaynapi mana obligasqa hina mañakusqayta ruwanaykipaq, aswanqa sunquykimanta ruwanaykipaq.+
15 Ichapas Onesimoqa pisi tiempollapaq qanmanta karunchakururqa, chaynapi kaqmanta wiñaypaqña qampa makikipi kananpaq,
16 ichaqa manaña sirviente hinañachu,+ aswanqa allin kuyasqayki wawqiki hinaña kananpaq.+ Onesimoqa ñuqapaqmi kuyasqay wawqiy, aswanraqchá qampaqqa, paytaqa kuyanki kaqmanta kuska kasqaykichikraykum chaynataq señorta serviq wawqiki kasqanraykum.
17 Chaynaqa, amistadnikipaq hapiwaspaykiqa ñuqata hinayá kuyakuywan paytapas chaskiykuy.
18 Chaymantapas, sichum ima mana allintapas ruwasurqanki utaq imamantapas debekusunki hinaptinqa ñuqañayá pagapusqayki.
19 Ñuqa Pablom kikiypuni qillqamuchkayki, debesusqaykitaqa ñuqam pagapusqayki, qampas yachankim vidaykimanta debewasqaykitaqa.
20 Arí wawqilláy, señorninchikpa qatiqnin kasqanchikraykuyá kay nisqayta uyariykullaway. Chayta ruwaspaykiqa Cristopa qatiqnin kasqaykiraykum sunqullayta kusiykachinki.
21 Ñuqaqa manam iskayrayanichu nimusqayta ruwanaykimantaqa, chaymi qillqamuyki nimusqaymantapas mastaraq ruwanaykita yachaspay.
22 Mañakusqayta ruwaspaykipas, samakunaypaqyá cuartochaykita allichaykapuway, ñuqaqa Diosta mañapuwasqaykichikwanmi qamkunaman* kaqmanta hamuyta munachkani.+
23 Cristo Jesusrayku presomasiy Epafrasmi saludamusunki.+
24 Saludamusunkitaqmi Marcospas, Aristarcopas,+ Demaspas+ hinaspa Lucaspas.+ Paykunaqa llamkaqmasiykunam kanku.
25 Señor Jesucristopa ancha kuyakuyninyá* qamkunawan kachun Diospa munasqanman hina piensasqaykichikrayku.
Willakuykuna
^ Griego rimaypiqa nichkan: “Cristo Jesusrayku”, nispam.
^ Kaypiqa rimachkan mana kuyana kachkaspa kuyasqa kaymantam. Qaway “mana kuyana kachkaspa kuyasqa kay” niqpa ima ninan kasqanta.
^ Utaq: “Diospa akllasqanrayku”.
^ Utaq: “Kachasqan runa”.
^ Griego rimaypiqa nichkan: “Cadenasqa”, nispam.
^ Utaq: “Kachariwaptinku qamkunaman”.
^ Kaypiqa rimachkan mana kuyana kachkaspa kuyasqa kaymantam.
