Filipenses 2:1-30
2 Cristowan* kuska kasqaykichikraykuyá kallpanchanakuychik, kuyakuywan hukkunapa sunqunta tiyaykachiychik, qamkunapura kuskalla kaychik*, kuyanakuychik hinaspa llakipayanakuychik.
2 Chayta ruwaspaqa anchatam kusichiwankichik. Qamkunaqa huk umalla imatapas ruwaspayá kuyanakuspa kawsakuychik, huk sunqulla imatapas ruwaspayá tukuy imapi hukllata piensaychik.+
3 Amayá imatapas ruwaychikchu atipanakuspaqa+ utaq kikillaykichikpaq imatapas munaspaqa,+ aswanqa ama hatuntukuspayá qamkunamantapas aswan allinpaqraq wakinkunata qawaychik,+
4 chaymantapas amayá kikillaykichikpa allinnikichiktachu maskaychikqa,+ aswanqa wakiqnikichikpa allinnintayá.+
5 Jesucristopa imayna piensasqanman hinayá piensaychik,+
6 Jesucristoqa Dios hina kachkaspanpas+ manam piensayllapas-piensarqachu Diospa rantinpi churakuytaqa,+
7 aswanqa imayna kasqanta saqispanmi sirviente hinaña rikurirurqa.+ Payqa ñuqanchik hina runañam karqa.+
8 Chaymantapas aswanraqmi payqa ñuqanchik hina runaña kaspam humillakuykurqa, hinaspam wañunankama kasukuq karqa,+ arí ñakarichikuq qirupim* wañukurqa.+
9 Chayraykum Diosqa ñawpaqpi imayna kasqanmantapas astawanraq hatuncharun,+ hinaspam Diosqa sumaq sunqu kasqanrayku hukkunamantapas aswan atiyniyuq kananpaq churaykun*,+
10 chaynapi Jesuspa sutinpi hanaq pachapi kaqkunapas, kay pachapi kaqkunapas chaynataq allpa ukupi kaqkunapas* qunqurakunankupaq.+
11 Chaynallataq Jesucristo señor+ kasqanta llapallan runakuna sutillata rimanankupaq, chaynataqa rimanqaku Dios tayta hatunchasqa kananpaqmi.
12 Chaynaqa kuyasqay wawqi-panillaykuna, qamkunawan kaptiymi tukuy tiempo kasukurqankichik, qamkunawan mana kachkaptiypas aswanraqmi kasukuchkankichik, chaynaqa manchakuywan hinaspa respetowanyá hinalla kallpanchakuychik Dios salvasunaykichikpaq.
13 Diosmi qamkunataqa munayninman hina kallpanchasuchkankichik, chaymi qamkunaqa paypa munasqan ruwayta munankichik, ruwanaykichikpaqpas atiytam qusunkichik.
14 Hinallayá tukuy imatapas ruwaychik ama rimapakuspa+ hinaspa ama kutipakuspa.+
15 Chaynapi kay tiempopi mana allin ruwaq runakunapa kasqanpi+ Diospa churinkuna+ hina mana huchayuq hinaspa chuya sunqu kanaykichikpaq. Qamkunaqa achki hinam runakunapa kasqanpi kancharichkankichik,+
16 kancharichkankichikqa kawsay qukuq palabraman allinta hapipakuspam.+ Chayna kaptikichikqa Cristopa juzganan punchawpim kusikusaq, ñuqaqa kusikusaq kallpasqay hinaspa anchata llamkasqay mana yanqapaq kasqanmanta yachaspaymi.
17 Diosninchikpaq animalta kañasqankupa+ hawanman tallisqanku vino+ hinam ñuqaqa qamkunapaq kachkani, chayna kaptinpas ñuqaqa qamkunawan kuskam kusikuni iñisqaykichikrayku Diosta servinaykichikpaq kallpanchakusqaykichikmanta.
18 Chaynatam qamkunapas kusikunaykichik, arí ñuqawanyá kusikuychik.
19 Señorninchik Jesus munaptinqa manapas unaymantam Timoteota+ kachamusqaykichik qamkunamanta imallatapas uyarispay kallpanchasqa kanaypaq.
20 Manam pipas pay hinaqa kanchu, payqa qamkunamantam tukuy sunqunwan anchata llakikusunkichik.
21 Wakinqa kikinkupa allinnillantam maskachkanku manam Jesucristopa allinnintachu.
22 Qamkunaqa yachankichikmi Timoteopa tukuy imapi allin kasqanta, imaynam churipas+ taytanta yanapan, chaynam payqa sumaq willakuy aswan willakusqa kananpaq tukuy imata ruwaspan ñuqawan llamkarqa.
23 Chaynaqa, imapas ruwasqaykuna imayna kasqanmanta yachaykuspallaymi paytaqa kachamusqaykichik.
24 Señorninchikpa munaynin kaptinqa qamkunamanmi kikiypuni manapas unaymanta hamusaq.+
25 Ichaqa iñiqmasinchik Epafroditotam kunan qamkunaman kachamuchkaykichik, payqa llamkaqmasiymi, kuyasqay wawqiymi, hinaspapas ñuqa hina Jesucristopa soldadonmi, paytam imapipas yanapawananpaq qamkuna kachamuwarqankichik.+
26 Payqa llapallaykichikta qawaykuytam munachkan, llakisqataqmi kachkanpas unqurusqanmanta yacharusqaykichikrayku.
27 Payqa unquruspanmi yaqalla wañururqapas ichaqa Diosmi llakipayaykurqa, manamá payllatachu ñuqatapas llakipayaykuwarqam, chaynapi llakipi sapa kuti mana tarikunaypaq.
28 Chayraykum Epafroditotaqa chaylla kachamuchkani paywan tupaykuspaykichik kaqmanta kusikunaykichikpaq chaynataq ñuqapas manaña ancha llakisqa kanaypaq.
29 Chaynaqa kusikuywanyá chaskiykuychik imaynam señorninchikpa qatiqninkunata chaskisqaykichikman hina, kuyaychikyá pay hina runakunataqa.+
30 Epafroditoqa Cristopaq llamkasqanraykum yaqalla wañuytapas tarirqa, payqa wañuypa patanpim tarikurqa, chaynapi karupi kasqaykichikrayku qamkunapa rantikichikpi yanapawananpaq.+
Willakuykuna
^ Utaq: “Diospa akllasqanwan”.
^ Utaq: “Ama qunqanakuychikchu”.
^ Utaq: “Kaspipim”. Qaway “ñakarichikuq qiru” niqpa ima ninan kasqanta.
^ Griego rimaypiqa nichkan: “Lliw sutimantapas aswan sumaq sutita quykun”, nispam.
^ Utaq: “Kawsarimuqkunapas”.
