Galatas 2:1-21
2 14 watamantam Bernabeywan+ kuska huktawan rirqani* Jerusalen llaqtaman, pusarqanitaqmi Titotapas.+
2 Rirqaniqa señorninchik niwaptinmi, hinaspam chaypi iñiqkunaman mana pipa yachasqallanta willarqani huklaw nacionniyuqkunaman willasqay sumaq willakuyta. Willarqaniqa Jerusalenpi allin riqsisqa iñiqkunallamanmi, chaynapi ñawpaqmantaraq kunankama chay ruwasqay mana yanqapaq kasqanta allinta ñuqa yachanaypaq.
3 Ichaqa ñuqawan riq Titoqa+ Grecia nacionniyuq kachkaspanpas manam hikutasqachu karqa qari kayninpi señalachikunanpaqqa.+
4 Chaymi sasachakuy karqa iñiqtukuqkuna mana musyachikuspalla yaykuramuptinku,+ paykunaqa yaykuramurqaku+ Jesucristopa* qatiqnin kasqanchikrayku hawkaña* kasqanchikta sasachanankupaqmi, paykunaqa munarqaku kaqllamanta Moisespa chaskisqan kamachikuykunapa serviqnin hina kananchiktam.+
5 Chaywanpas paykunataqa manam haykapipas kasukurqanikuchu,+ chaynapi chiqap sumaq willakuy qamkunawan hinalla kananpaq.
6 Chay allin riqsisqapaq hapisqanku runakunapas+ utaq respetasqa kaqkunapas ñuqamanqa manam ima musuq yachachikuytapas willawarqachu, ñawpaqpi paykunapa imayna kasqankumantaqa manam imapas qukuwanchu, Diosqa manam hawallanta qawaspanchu runataqa juzgan.
7 Paykunam yacharurqaku imaynam qari kayninku señalasqa kaqkunaman Pedro sumaq willakuyta willakunanpaq kamachisqa kasqanman+ hina ñuqapas mana señalachikuqkunaman willakunaypaq kamachisqa kasqaymanta,
8 señalasqa kaqkunapa apostolnin kananpaq Pedrota kamachiqmi, ñuqatapas kamachiwarqa huklaw nacionniyuqkunapa apostolnin kanaypaq.+
9 Chaymantapas paykunaqa Diospa ancha kuyawasqantam* riqsikurqaku,+ hinaptinmi ñuqaman hinaspa Bernabeyman+ alliq* makinkuta haywariwaspanku+ Santiago, Pedro* hinaspa Juan niwarqaku: “Qamkunam huklaw nacionniyuqkunaman rinkichik, ñuqaykuñataqmi señalasqa kaqkunaman”, nispanku. Paykunaqa karqaku allin riqsisqa runakunam*.
10 Paykunaqa niwarqakutaqmi wakchakunata ama qunqanaykupaqpas, chayta ruwanaypaqpas ñuqaqa tukuy sunquywanmi kallpanchakurqani.+
11 Ichaqa Antioquia+ llaqtaman Pedro*+ hamuruptinmi uyanpipuni nirqani mana allin ruwasqanmanta.
12 Santiagopa kachamusqan runakuna manaraq chayamuchkaptinqa+ huklaw nacionniyuq runakunawanmi payqa mikurqa,+ chay runakuna chayaramuptinmi ichaqa huklaw nacionniyuqkunawan manaña mikuspan karunchakururqa, chaytaqa ruwarqa señalasqa kaqkunata manchakuspanmi.+
13 Wakin judiokunapas Pedropa ruwasqanta qatipakuspankum iskay uya rikurirurqaku. Bernabeypunipas paykuna hinam iskay uya rikurirurqa.
14 Chaymi chiqap sumaq willakuyman hina mana ruwasqankuta qawaspay+ llapallankupa qayllanpi Pedrota nirqani: “Qamqa judio kachkaspaykim huklaw nacionniyuqkuna hina ruwachkanki, manam judiokuna hinachu. Hinaspaykiqa, ¿imaynamá huklaw nacionniyuq runakunataqa hikutawaq judiokunapa costumbrenman hina ruwanankupaqqa?”, nispay.+
15 Ñuqanchikqa nacesqanchikmantapunim judio kanchik, manam huklaw nacionniyuq huchasapa runakuna hinachu,
16 ñuqanchikqa kaytam yachanchik: Runaqa manam Moisespa chaskisqan kamachikuykunapa nisqanta ruwaspachu Diospaqqa mana huchayuqña kanqa, aswanqa Jesucristopi iñisqanraykullam. Ñuqanchikqa Jesucristopi+ iñisqanchikraykum+ Diospaqqa mana huchayuqña kanchik, manam Moisespa chaskisqan kamachikuykunapa nisqanta ruwaspachu, chay kamachikuykunaman hina ruwaspanqa manam pipas allin ruwaqpaqqa chaskisqachu kanman.+
17 Cristorayku manaña huchayuq kananchikpaq kallpanchakuspanchikpas hinallam huchayuq kachkanchik, ¿chaychu nichwan Cristoqa huchallikunanchikpaq tanqawasqanchikta? ¡Manamá!
18 Sichum ñawpaqpi tuñirachisqay kaqkunata kaqllamanta hatarichispayqa, Moisespa chaskisqan kamachikuykunata mana kasukusqaytam qawachichkani.
19 Ñuqaqa chay kamachikuykunatam kasukurqani, chayraykum chay kamachikuykunapaqqa wañusqa hinaña kachkani,+ chaynapi Diospaqña kawsakunaypaq.
20 Cristowan kuskam qirupi* clavowan takasqa kachkani.+ Manañam ñuqañachu kawsani,+ aswanqa Cristoñam ñuqawan huklla kawsachkan. Aycha cuerpopi kunan kawsaspayqa Diospa churinpi iñisqayraykum kawsachkani,+ paymi kuyawaspan ñuqarayku wañurqa.+
21 Manam wischupakunichu Diospa ancha kuyakuynintaqa*,+ sichu pipas Moisespa chaskisqan kamachikuykunata kasukuspan allin ruwaqpaq chaskisqa kaptinqa Cristoqa yanqapaqchiki wañurqa.+
Willakuykuna
^ Utaq: “Qispirqani”.
^ Griego rimaypiqa nichkan: “Cristo Jesuspa”, nispam.
^ Utaq: “Libreña”.
^ Utaq: “Pilar hina kaqkunam”.
^ Griego rimaypiqa nichkan: “Cefas”, nispam. Chaynam Pedropa huknin sutin.
^ Utaq: “Paña”.
^ Kaypiqa rimachkan mana kuyana kachkaspa kuyasqa kaymantam.
^ Griego rimaypiqa nichkan: “Cefas”, nispam. Chaynam Pedropa huknin sutin.
^ Utaq: “Kaspipi”.
^ Kaypiqa rimachkan mana kuyana kachkaspa kuyasqa kaymantam.
