Galatas 6:1-18
6 Wawqi-panillaykuna, yaqapaschá pipas mana cuentata qukuspan pantachkanman, hinaptinqa Diospa atiyninpa yanapakuyninman hina kawsaqkunayá llampu sunqullawan allin ñanman kutirichimuychik.+ Chaytaqa ruwaychik kikikichiktapas cuidakuspayá,+ yanqañataq qamkunapas pantachisqa kawaqchik.+
2 Ima sasachakuynikichikpipas hinallayá yanapanakuychik,+ chaynata ruwaspam Cristopa* kamachikuyninta kasukuchkankichik.+
3 Sichu mana imapas kachkaspan imapas kasqanpaq hapikuq runaqa+ kikillanmi pantaypi kachkan.
4 Chaynaqa, sapakamayá qawakuchun imapas ruwasqan imayna kasqanta,+ chaynapi ama hukwan tupachikuspa kusikunanpaq aswanqa kikinpa ruwasqallanwan kusikunanpaq.+
5 Sapakamamiki imapas ruwayninchikkunataqa ruwananchik*.+
6 Diospa palabranmanta yachachisqa kaq runaqa yachachiqninpaqyá allin kaqkunata ruwachun*.+
7 Amayá pantaychikchu, Diosmantaqa manam pipas burlakunmanchu, runaqa imapas tarpusqantam cosechanqa.+
8 Aychapa munasqanman hina tarpuqqa aychaman hinallam wañuyta* cosechanqa. Diospa atiyninpa yanapasqanman hina tarpuqmi ichaqa chayman hina wiñay kawsayta cosechanqa.+
9 Chaynaqa amayá amirusunchu imapas allin ruwaytaqa, mana amiruspaqa* tiempollanpim chay allin ruwasqanchikmanta cosechasun.+
10 Chayraykuyá makinchikpi kachkaptinqa llapallankupaq allinkunata ruwasun, astawanraqyá iñiqmasinchikkunapaqqa allinkunata ruwasunchik.
11 Qawaychikyá hatun letrakunawan kikiypuni qillqamusqayta.
12 Runakunapa allin qawasqan kayta llapallan munaqkunaqa qari kaynikichikpi señalachikunaykichikpaqmi hikutasuchkankichik, chaytaqa ruwachkanku ñakarichikuq qirupi* wañuq Cristorayku ñakarichisqa kanankupaq maskasqa kayta mana munaspankum.
13 Qari kayninpi señalachikuqkunaqa manam kikinkupas Moisespa chaskisqan kamachikuytaqa kasukunkuchu,+ ichaqa señalachikunaykichiktam paykunaqa munanku, chaynapi qamkunamanta alabakunankupaq.
14 Ñuqam ichaqa mana haykapipas alabakusaqchu, alabakuspaqa alabakusaq ñakarichikuq qirupi wañuq señorninchik Jesucristollamantam,+ paynintakamam kay pachapi kaqkuna ñuqapaq wañusqaña kachkan, ñuqapas kay pachapaqmi wañusqaña kachkani.
15 Manam imananchu qari kayninpi señalasqa utaq mana señalasqa kaypas,+ ancha allinqa musuqmanta unanchasqa kaymi.+
16 Kay yachachikuyman hina llapallan kawsakuqkunapaqyá hawkayay hinaspa llakipayakuy kachun, paykunaqa kanku Diospa Israel runankunam.+
17 Kunanmanta qipamanqa amayá pipas sasachakuyta apamuwachunchu, ñuqapiqa Jesuspa serviqnin kasqaymanta marcakunam cuerpoypi kachkan.+
18 Wawqi-panillaykuna qamkunapa sunquykichikpiyá kachun señor Jesucristopa hatun kuyakuynin*. Chaynayá kachun*.
Willakuykuna
^ Utaq: “Diospa akllasqanpa”.
^ Griego rimaypiqa nichkan: “Sapakamamiki qipintaqa apanan”, nispam.
^ Utaq: “Yachachiqninmanyá imallantapas quchun”.
^ Utaq: “Ismuruyta”.
^ Utaq: “Pisiparuspaqa”.
^ Utaq: “Kaspipi”. Qaway “ñakarichikuq qiru” niqpa ima ninan kasqanta.
^ Kaypiqa rimachkan mana kuyana kachkaspa kuyasqa kaymantam.
^ Utaq: “Amen”.
