Genesis 11:1-32
11 Chaykamaqa kay allpa pachapi lliw runakunam huk rimayniyuqlla karqaku, hinaspapas chaynallatam rimarqaku.
2 Chaymantam intipa qispimunan lawman rispanku Sinar+ lawpi sumaq pampata tarirurqaku, hinaspam chaypi yacharqaku*.
3 Chaypim ninakurqaku: “¡Hamuychik! Ladrillota ruwaspa kañasunchik”, nispa. Chaymi rumikunapa rantinpi ladrillokunata servichikurqaku, mitumantañataqmi breata servichikurqaku.
4 Ninakurqakutaqmi: “Wasikunata ruwaspayá llaqtata hatarichisunchik, pirqasuntaqyá hanaq pachaman haypaq hatu-hatun torretapas. Chaynapim ancha riqsisqa kaspa tukuy hinastinmanqa mana chiqisunchu”, nispa.+
5 Jehova Diosmi runakunapa llaqta hatarichisqankuta hinaspa hatu-hatun torre ruwasqankuta qawarqa.
6 Hinaspam Jehova Diosqa nirqa: “Huk llaqtayuqlla hinaspa huk rimayniyuqlla+ kasqankuraykum tukuyta ruwachkanku. Chaymantaqa imapas munasqankutam ruwayta qallaykunqaku.
7 Chaynaqa rimayninkutayá pantarachisun,+ chaynapi mayqanninkupas rimasqankuta mana entiendenakunankupaq”, nispa.
8 Chaynatam Jehova Diosqa runakunata chiqirachirqa tukuy hinastinman,+ chaymi llaqta hatarichisqankutapas pisi-pisimanta saqirurqaku.
9 Chayraykum chay llaqtataqa suticharqaku Babelwan*+ chaypi lliw runakunapa rimayninta Jehova Dios pantarachisqanrayku, chaypim Jehova Diosqa runakunata tukuy hinastinman chiqirachirqa.
10 Kaymi Sem+ sutiyuq runamanta willakuy.
Nisyullay-nisyu para kasqanmanta iskay wata qipatam Semqa 100 watanpi karqa, chay watapim churin Arpaksad+ nacerqa.
11 Churin Arpaksad nacesqanmantam Semqa 500 watatawanraq kawsarqa. Chay watakunapim churinkunaqa karqaraq qaripas warmipas.+
12 Arpaksad 35 watanpi kachkaptinmi churin Sela+ nacerqa.
13 Churin Sela nacesqanmantam Arpaksadqa 403 watatawanraq kawsarqa. Chay watakunapim churinkunaqa karqaraq qaripas warmipas.
14 Sela 30 watanpi kachkaptinmi churin Eber+ nacerqa.
15 Churin Eber nacesqanmantam Selaqa 403 watatawanraq kawsarqa. Chay watakunapim churinkunaqa karqaraq qaripas warmipas.
16 Eber 34 watanpi kachkaptinmi churin Peleg+ nacerqa.
17 Churin Peleg nacesqanmantam Eberqa 430 watatawanraq kawsarqa. Chay watakunapim churinkunaqa karqaraq qaripas warmipas.
18 Peleg 30 watanpi kachkaptinmi churin Reu+ nacerqa.
19 Churin Reu nacesqanmantam Pelegqa 209 watatawanraq kawsarqa. Chay watakunapim churinkunaqa karqaraq qaripas warmipas.
20 Reu 32 watanpi kachkaptinmi churin Serug nacerqa.
21 Churin Serug nacesqanmantam Reuqa 207 watatawanraq kawsarqa. Chay watakunapim churinkunaqa karqaraq qaripas warmipas.
22 Serug 30 watanpi kachkaptinmi churin Nacor nacerqa.
23 Churin Nacor nacesqanmantam Serugqa 200 watatawanraq kawsarqa. Chay watakunapim churinkunaqa karqaraq qaripas warmipas.
24 Nacor 29 watanpi kachkaptinmi churin Tarey+ nacerqa.
25 Churin Tarey nacesqanmantam Nacorqa 119 watatawanraq kawsarqa. Chay watakunapim churinkunaqa karqaraq qaripas warmipas.
26 Tarey 70 watayuq kachkaptinmi nacerqa churin Abran,+ Nacor+ hinaspa Haran.
27 Kaymi Tareymanta willakuy.
Tareypa churinkunam karqa: Abran, Nacor hinaspa Haran. Haranpa churinñataqmi karqa Lot.+
28 Haranqa taytan Tarey kawsakuchkaptinraqmi wañukurqa nacesqan Caldea+ law Ur+ llaqtapi.
29 Abranmi Saraiwan+ casarakurqa, Nacorñataqmi Milcawan casarakurqa.+ Haranqa karqa Milca hinaspa Isca sutiyuq warmikunapa taytanmi.
30 Qulluq kasqanraykum+ Saraiqa mana wawayuq karqa.
31 Caldea lawpim karqa Ur sutiyuq llaqta, chay llaqtamantam Tareyqa lluqsirqa churin Abranwan, willkan Lotwan+ hinaspa llumchuynin Saraiwan Lotqa Haranpa churinmi karqa. Paykunawanmi rirqa Canaan lawman,+ chayman risqanpim Haran llaqtaman+ chayaruspanku chaypi yacharqaku.
32 Tareyqa 205 watanpim Haran llaqtapi wañukurqa.
