Genesis 28:1-22
28 Isaacqa churin Jacobta qayaykuspanmi nirqa: “Amam Canaan llaqtayuq warmiwanqa casarakunkichu.+
2 Padan-arampi mamaykipa taytan Betuelpa wasinman rispaykiyá mamaykipa turin Labanpa huknin warmi churinwan casarakamuy.+
3 Tukuy atiyniyuq Diosmi yanapasunki, chaynapim churikikuna kaptin miraynikikunatapas Diosqa achkayachinqa. Hinaptinmi qanmanta achkallaña ayllukuna kanqa.+
4 Abrahanta bendecisqanman hinam qamtapas hinaspa miraynikikunatapas bendecisunki,+ chaynapi Abrahanman Diospa qusqan allpa hinaspa forastero hina yachasqayki* allpa qampaqña kananpaq”, nispa.+
5 Chaynata nispanmi Isaacqa churin Jacobta nirqa Padan-aram lawman rinanpaq. Chaymi Jacobqa rirqa Padan-aram lawpi Betuelpa churin Labanpa wasinman.+ Labanqa karqa Rebecapa turinmi,+ Rebecañataqmi karqa Jacobpa hinaspa Esaupa maman.
6 Jacobman taytan Isaac tukuy chayna nisqantam Esauqa yacharurqa. Yacharurqam Padan-aram lawpi warmiwan casarakunanpaq nisqanta chaynataq “amam Canaan llaqtayuq warmiwanqa casarakunkichu” nisqantapas.+
7 Esauqa yacharurqataqmi Jacobqa tayta-mamanta kasukuspan Padan-aram lawman risqantapas.+
8 Chaynapim Esauqa musyarurqa Canaan warmikunata taytan chiqnisqanta.+
9 Chaymi Esauqa warminkuna kachkaptinpas Ismaelpa kasqanman rispan warmi churin Maalatwan casarakurqa, Maalatqa karqa Nebayotpa paninmi,+ Ismaelñataqmi karqa Abrahanpa churin.
10 Jacobqa Beer-sebamanta lluqsiruspanmi Haran lawman rirqa.+
11 Inti siqaykuptinñataqmi risqan ñanpi samananpaq allichakurqa, hinaspam rumiwan sawnakuykuspan puñuykurqa.+
12 Chaymi sueñoyninpi rikurqa kay pachamanta hanaq pachaman qispiq gradasta, rikurqataqmi chayninta Diospa angelninkuna qispiqta hinaspa uraykamuqta.+
13 Rikurqataqmi chay gradaspa tukuyninpi Jehova Dios kasqantapas. Diosmi nimurqa:
“Ñuqaqa Abrahanpawan taytayki Isaacpa yupaychasqan Jehova Diosmi.+ Kay puñusqayki allpatam qusqayki qanmanwan miraynikikunaman.+
14 Miraynikikunam ñutu allpa hina mana yupay atina kanqaku.+ Hinaspam tukuy hinastinman chiqinqaku. Kay pachapi llapallan ayllukunam qamrayku hinaspa miraynikirayku bendecisqa kanqaku.+
15 Manam saqisqaykichu, maymanña riptikipas yanapasqaykim, hinaspam kay allpaman kutichimusqayki.+ Manam saqisqaykichu tukuy nisqayta cumplinaykama”, nispa.+
16 Rikchariruspanñataqmi Jacobqa nirqa: “Chiqaptapunim Jehova Diosqa kaypi kasqa, manam yacharqanichu”, nispa.
17 Hinaspam mancharisqallaña nirqa: “¡Manchakuypaqmi kay sitioqa kasqa! Kayqa Diospa wasinmi kasqa,+ hinaspapas hanaq pachapaq punkum kasqa”, nispa.+
18 Chaymi Jacobqa tutapayta hatarispan sawnakusqan rumita sayaykachirqa, hinaspam aceiteta talliykurqa.+
19 Chayraykum chaylawta suticharqa Betelwan*, chay llaqtatam ñawpaqta suticharqaku Luzwan.+
20 Chaymantam Jacobqa kaynata nirqa: “Diosnilláy, hinalla yanapawaptikiqa, illasqaypi waqaychawaptikiqa, mikunaypaq tantata hinaspa pachakunaypaq pachata quwaptikiqa
21 chaynataq taytaypa wasinman allinllata kutichiwaptikiqa chiqaptapunim yachasaq Jehova Diosniy kasqaykita.
22 Diosnilláy, kay sayachisqay rumim wasiki kanqa,+ hinaspapas tukuy ima quwasqaykimanta wakintam* qusqayki”, nispa.
Willakuykuna
^ Utaq: “Tiyasqayki”.
^ “Betel” ninanqa: “Diospa wasin”, ninanmi.
^ Utaq: “Sapa chunkamanta huknintam”.
