Genesis 34:1-31
34 Jacobpa churin Leapa wawan Dinam+ chay llaqtapi sipaskunaman watukuq ripayaq.+
2 Chaymi huk kutipi Hev runakunata kamachiq Hamorpa churin Sichem*+ Dinata pusaruspan abusarurqa.
3 Chaymantam Sichemqa Jacobpa churin Dinata kuyarusqanrayku kuyakuyllawanña rimapayarqa.
4 Chaymi taytan Hamorta Sichem nirqa:+ “Kay sipaswan casarakuytam munachkani, yaykupakuspayá hurqupamuway”, nispa.
5 Jacobqa yacharurqam Dinata Sichem pinqayman churarusqanta. Chaywanpas animalkuna michisqankumanta churinkuna kutimunantaraqmi suyarqa paykunaman willananpaq.
6 Sichempa taytan Hamorñataqmi Jacobwan rimaq rirqa.
7 Jacobpa churinkunañataqmi paninku Dinata Sichem abusarusqanta yacharuspanku michisqankumanta chaylla kutirqaku. Sichem chayta ruwasqanwan Israel aylluta pinqayman churarusqanraykum paykunaqa llumpayta piñakurqaku.+
8 Hinaptinmi Hamorqa paykunata nirqa: “Churiy Sichenmi panikichikta kuyarun, ama hina kaspayá paywan casarakunanpaq quykullawaychik.
9 Huk ayllullañayá kasunchik. Warmi churikichiktayá quwayku, ñuqaykupas warmi churiykutam casarakunaykichikpaq qusqaykiku.+
10 Qamkuna ñuqaykuwan yachaptikichikqa* allpaykupas qamkunapaqmi kanqa, kaypi qipaspaykichikyá negociota ruwaychik”, nispa.
11 Sichempas Jacobtawan churinkunatam nirqa: “Quykuwaptikichikqa imapas mañawasqaykichiktam qusqaykichik.
12 Hayka qullqitaña mañawaptikichikpas qusqaykichikmi,+ imapas mañawasqaykichiktam qusqaykichik. Kay sipastayá quykullawaychik casarakunaypaq”, nispa.
13 Jacobpa churinkunam ichaqa paninku Dinata pinqayman Sichem churarusqanrayku Sichemtawan taytan Hamorta sakrillawanña nirqaku:
14 “Ñuqaykuqa manam qari kayninkupi mana señalasqa* qarimanqa paniykutaqa quymankuchu,+ ñuqaykupaqqa pinqaymi chayqa.
15 Paniykutaqa quykikumanmi sichu qamkuna chaynataq qamkunapi llapallan qarikunapas ñuqayku hina qari kaynikichikpi señalachikuptikichikqa.+
16 Chaymantañam warmi churiykutaqa qusqaykiku chaynataq warmi churikichikwanpas casarakusaqku. Chaynapi huk ayllulla hinaspa huk llaqtalla kananchikpaq.
17 Nisqaykuta mana ruwaptikichikqa paniykuta pusarikuspam ripukusaqku”, nispa.
18 Señalachikunankupaq nisqankuqa allinpaqmi rikchakurqa+ Sichempaqwan taytan Hamorpaqqa.+
19 Chaymi Sichemqa Dinata kuyarusqanrayku nisqankuta chaylla ruwarqa.+ Sichemqa ayllunpi ancha riqsisqa runam karqa.
20 Hinaptinmi Hamorqa churin Sichenwan llaqtankupa punkunman rispanku llapallan qarikunata nirqaku:+
21 “Kay runakunaqa hawka kawsakuqmi kanku, allpanchikqa paykunapaqpas haypanqam. Ñuqanchikwan yachaptinkuyá imatapas rantinakusun, paykunapa warmi churinkuwanpas casarakuchwanmi, paykunapas warmi churinchikwanqa casarakunmankum.+
22 Ichaqa paykunam munanku llapallan qarikuna qari kayninchikpi señalasqa kananchikta, paykunaqa señalasqa qarikunam kanku. Chaynata ruwaptillanchiksi paykunaqa ñuqanchikwan yachanqaku.+
23 Paykunapaqa kanmi tukuy kapuqninku hinaspa animalninku. Hinaptinqa, ¿manachu chaykunapas ñuqanchikpaqña kanman? Chaynaqa niwasqanchiktayá kasukusun paykunawan kuska yachanapaq”, nispa.
24 Chaymi Sichemta hinaspa taytan Hamorta kasukusqankurayku chay llaqtapi yachaq llapallan qarikuna qari kayninkupi señalachikurqaku.
25 Hinaptinmi kimsa punchaw señalachikusqankumanta nanaywanraq kachkaptinku, Jacobpa churin Simeon hinaspa Leviy espadayuqkama llaqtaman rirqaku, paykunaqa Dinapa turinkunam karqa.+ Hinaspam yaykuruspanku qunqayllamanta lliw qarikunata wañurachirqaku.+
26 Sichemtawan taytan Hamortapas espadawanmi wañurachirqaku. Hinaspam paninku Dinata pusarikuspa kutikurqaku.
27 Jacobpa wakin churinkunapas chay llaqtamanmi rirqaku. Ichaqa qarikunata wañusqataña qawaykuspankum llaqtapi tukuy imata apakurqaku paninku Dinata pinqayman churarusqankurayku.+
28 Apakurqakuqa ovejankuta, cabrankuta, vacankuta, asnonkuta chaynataq llaqtapi hinaspa chakrapi tukuy imankutam.
29 Wasinkupi tukuy imankutapas apakurqakum, warminkutawan warmachankutapas presochaspam apakurqaku.
30 Chayta Jacob yacharuspanmi Simeontawan Leviyta nirqa:+ “Huchaykichikraykum hatun sasachakuypi kasaq, chay ruwasqaykichikraykum kunanqa Canaan runakuna hinaspa Perizita runakuna chiqniwanqa. Ñuqanchikqa aschallam kanchik, paykunaqa hukllawakuykuspankuch ñuqata hinaspa lliw wasiypi kaqkunata wañurachiwanqaku”, nispa.
31 Paykunañataqmi nirqaku: “Manam saqiymankuchu paniykuta chuchumikapaq* hina qawanankutaqa”, nispa.
Willakuykuna
^ Utaq: “Siquem”.
^ Utaq: “Tiyaptikichikqa”.
^ Utaq: “Qari kayninpa qarachan mana kuchusqa”.
^ Utaq: “Qullqipaq piwanpas kakuqta”.
