Genesis 42:1-38
42 Egipto nacionpi kawsaykuna kasqanta yacharuspanmi+ Jacobqa churinkunata nirqa: “¿Imatam qawanakunkichik mana imata ruwaspa?”, nispa.
2 Nirqataqmi: “Uyarirqanim Egiptopi kawsaykuna kasqanta. Chaynaqa rispayá kawsaykunata rantimuychik yarqaymanta mana wañurunanchikpaq”, nispa.+
3 Chaymi Joseypa chunka wawqinkunaqa+ Egipto nacionta rirqaku kawsayta rantimunankupaq.
4 Jacobmi ichaqa mana munarqachu Joseypa sullkan Benjamin wawqinkunawan rinantaqa.+ Manaqa munarqachu: “Yanqañataq imapas pasaramuptin wañurapamuwanman”, nispam.+
5 Hinaptinmi Israelpa churinkunaqa huk runakunawan kuska Egiptota rirqaku kawsaykuna rantimuq, yachasqanku* Canaan allpapipas muchuy* kasqanrayku.+
6 Joseyqa Egiptopi nanachikuqmi karqa,+ paymi lliw runakunaman kawsayta rantikuq*.+ Chayraykum wawqinkunaqa Joseypa kasqanman rirqaku, hinaspam ñawpaqninpi qunqurakuykuspa pampakama kumuykurqaku.+
7 Chaymi Joseyqa qawariykuspan wawqinkuna kasqanta riqsirurqa, Joseymi ichaqa manaraq riqsichikurqachu.+ Chaymi piñakuspan tapurqa: “¿Maymantataq hamuchkankichik?”, nispa. Paykunañataqmi nirqaku: “Canaan lawmantam hamuchkaniku kawsaykuna rantiq”, nispa.+
8 Arí, Joseyqa wawqinkuna kasqantam riqsirurqa. Wawqinkunam ichaqa mana riqsirqachu.
9 Chaymi Joseyqa wawqinkunamanta sueñokusqanta yuyarirurqa,+ hinaspanmi nirqa: “¡Llaqtayku qawaqmi qamkunaqa hamurunkichik! ¡Kay llaqtaman imayna yaykumunaykichikpaq qawaqmi hamurunkichik!”, nispa.
10 Paykunañataqmi nirqaku: “Manam taytáy, ñuqaykuqa mikunaykupaq kawsay rantiqllam hamurqaniku.
11 Huk taytapa churillanmi llapayku kaniku. Mana llullakuq runam kaniku, ñuqaykuqa manam kay llaqtata qawaqchu hamurqaniku”, nispa.
12 Joseyñataqmi nirqa: “¡Lullakuchkankichikmi! ¡Kay llaqtaman imayna yaykumunaykichikpaq qawaqmi qamkunaqa hamurqankichik!”, nispa.
13 Paykunañataqmi nirqaku: “Manam taytáy, ñuqaykuqa 12 wawqikunam kaniku.+ Canaan lawmantam huk taytapa churillan llapallayku kaniku.+ Sullka kaq wawqiykuqa taytaykuwanmi kachkan,+ hukniykuñataqmi manaña kanchu”, nispa.+
14 Joseymi ichaqa nirqa: “¡Qamkunaqa kay llaqta qawaqmá hamurqankichik!
15 Mana chayman hamusqaykichikta yachanaypaqyá sullka kaq wawqikichikta kayman pusamuychik, manachayqa manam lluqsinkichikchu kaymantaqa.+
16 Wakiqnikichik carcelpi kanankamayá huknikichik rispan sullka kaq wawqikichikta pusamuchun. Chaynapim yachasaq mana llullakuwasqaykichikta. Manachayqa kay llaqta qawaq hamusqaykichikpaqmi hapisqaykichik”, nispa.
17 Chaynata nispanmi kimsa punchaw llapankuta carcelpi wichqarachirqa.
18 Kimsa punchawmantam Joseyqa paykunata nirqa: “Ñuqaqa Diosta manchakuq runam kani, chaynaqa kay nisqaytayá ruwaychik mana wañunaykichikpaq.
19 Mana llullakuq kaptikichikqa huknikichikyá carcelpi qipachun, wakiqnikichikñataqyá kawsayta apachun aylluykichik imallatapas mikuykunanpaq.+
20 Hinaspayá sullka wawqikichikta pusamuwaychik, chaynapi mana llullakusqaykichikta yachanaypaq, hinaptinqa manam wañunkichikchu”, nispa. Chaymi paykunañataq “allinmi” nirqaku.
21 Chaymantam kikinkupura ninakurqaku: “Tukuy kaykunaqa pasawachkanchik wawqinchik Joseyta ñakarichisqanchikraykum.+ Waknataña waqaspan llakipayaykunanchikpaq mañakuwaptinchikpas manam llakipayarqanchikchu. Chayraykum kay sasachakuypi kachkanchik”, nispa.
22 Rubenñataqmi nirqa: “¿Manachu nirqaykichik: ‘Sullkanchiktaqa ama imanaychikchu’, nispa?+ Qamkunam ichaqa mana uyariwarqankichikchu. Chayraykum kunan ñakarichkanchik”, nispa.+
23 Ichaqa manam yacharqakuchu rimasqanku rimayta Josey entiendesqantaqa. Joseyqa huk rimaypim wawqinkunataqa rimapayarqa, hinaptinmi huk runa rimayninkupi wawqinkunaman willarqa.
24 Chaywanmi Joseyqa huklawchaman rispan waqallarqa.+ Chaymantam paykunapa kasqanman kutispan qayllankupi Simeonta watarachirqa.+
25 Hinaspam Joseyqa serviqninkunata kamachirqa wawqinkunapa wayqankuman kawsayta huntachimunankupaq hinaspa sapakamapa qullqinkuta wayqankuman hinamunankupaq. Quchirqataqmi ñanpi mikunankupaq quqawninkutapas. Chaynatam Joseypa kamachisqanman hina ruwarqaku.
26 Chaymantam wawqinkunaqa asnonkuman kawsaykunata churkuykuspanku kutikurqaku.
27 Samananku sitioman chayaruptinkum hukkaqninku wayqanta kichaykurqa asnonman mikuchinanpaq, kichaykuptinñataqmi chaypi qullqin kachkasqa.
28 Chaymi wawqinkunata mancharisqallaña nirqa: “¡Qawaychik! ¡Qullqiyta kutirachimuwasqa! ¡Wayqaypim qullqiy kasqa!”, nispa. Hinaptinmi llapanku mancharikurqaku, katkatatastinmi ninakurqaku: “¿Imatataq kaytaqa Diosqa ruwaruwanchik?”, nispanku.
29 Canaan allpaman chayaruspankuñataqmi taytanku Jacobman tukuy ima pasasqankuta willarqaku. Nirqakum:
30 “Egiptota kamachiqmi piñakuspa rimapayawarqaku+ llaqta qawaq risqaykupaq hapiwaspanku.
31 Ñuqaykuñataqmi nirqaniku: ‘Mana llullakuq runam kaniku, ñuqaykuqa manam kay llaqtata qawaqchu hamurqaniku.+
32 12 wawqikunam kaniku,+ huk taytapa churillanmi llapayku kaniku. Hukniykuqa manañam kanchu,+ sullka kaq wawqiykuñataqmi taytaykuwan Canaan allpapi qiparamun’, nispa.+
33 Ichaqa Egiptota kamachiqmi niwarqaku: ‘Mana llullakuq runakuna kasqaykichiktaqa yachasaq kay nisqayta ruwaptikichikmi. Huknikichikyá kaypi qipachun,+ wakiqnikichikñataq kawsayta aylluykichikman apaychik mikunankupaq.+
34 Hinaspayá sullka kaq wawqikichikta pusamuwaychik mana llullakusqaykichikta yachanaypaq. Chayñam kaypi qipaq wawqikichiktaqa kacharisaq, hinaptinmi munasqaykichikta kaypi rantinkichik’”, nispa.
35 Chaymantam wayqankumanta kawsayta taqtaspanku qullqinkutaqa hina kipusqata sapakama tarirurqaku. Chaymi qullqinkuta qawaykuspanku paykunapas hinaspa taytankupas mancharikurqa.
36 Hinaptinmi taytanku Jacobqa qaparispan nirqa: “¡Qamkunam churiykunata qichuwachkankichik!+ ¡Joseyqa manam ñuqanchikwanñachu,+ Simeonpas manañam ñuqanchikwanñachu!+ ¡Kunanñataqmi Benjaminta pusayta munachkankichik! ¡Kaykunawanqa ñuqam ñakarichkani!”, nispa.
37 Hinaptinmi taytanta Ruben nirqa: “Benjamintayá pusarusaq, allinllatam kutichipamusqayki.+ Mana kutichimuptiyqa iskaynin churiytachiki wañurachinki”, nispa.+
38 Jacobñataqmi nirqa: “Churiytaqa manam kacharisaqchu qamkunawan rinanpaqqa, wawqin wañukuptinmi payllaña kapuwachkan.+ Risqanpi imapas pasaruptinqa waqasqallaypim kay yuyaq taytaykichikqa wañurusaq*”, nispa.+
