Genesis 6:1-22
6 Runakunam kay allpa pachapi mirayta qallaykurqaku, paykunapam karqa warmi churinku.
2 Chay warmikuna kuyayllapaq kasqankuta angelkuna*+ qawaspankum munasqanku warmikunawan casarakuyta qallaykurqaku.
3 Chaymi Jehova Dios nirqa: “Aychapa munasqanman hinalla runakuna kawsasqanraykum unay kawsanankutaqa mana saqisaqchu.+ Chaymi runaqa kawsanqa 120 watallaña*”, nispa.+
4 Chay tiempopaqqa hinaspa qipakunamanpas karqañam kay pachapi hatunkaray runakuna*. Chayna runakunaqa karqa runakunapa warmi churinkunawan angelkuna kakusqanraykum. Chaynapim warmikunaqa angelkunapa churinta wachakurqaku, hinaptinmi wawankuqa kallpasapa hinaspa riqsisqa runakuna karqaku.
5 Jehova Diosmi qawarqa kay pachapi runakuna pasaypaq mana allinkunallataña ruwasqankuta chaynataq mana allin ruwayllapiña umayuq kasqankutapas.+
6 Chaymi Jehova Diosqa llumpayta llakikurqa+ runata kay pachapi unanchasqanmanta.
7 Hinaspam Jehova Dios nirqa: “Kay pachapi unanchasqay runakunatam chinkachisaq, chinkachisaqtaqmi uywa animalkunatapas, qasqunpa puriq animalkunatapas chaynataq alton pawaqkunatapas. Chaykuna unanchasqaymantam ñakakuni”, nispa.
8 Noeymi ichaqa Jehova Diospa kuyasqan runa karqa.
9 Kaymi Noeymanta willakuy.
Noeyqa allin ruwaq runam karqa.+ Payqa karqa runamasinkunamantapas mana huchallikuspa kawsaqmi. Payqa Diospa munasqanman hinam kawsakurqa.+
10 Watakuna risqanman hinam Noeypa kimsa churinkuna karqa, paykunam karqa Sem, Cam hinaspa Jafet.+
11 Chaymantam Diosqa qawarqa kay pachapi runakuna pasaypaq mana allinkunallataña ruwasqankuta.
12 Arí, Diosqa kay pachapi runakunapa pasaypaq mana allinkunallataña ruwasqankutam qawarqa.+ Lliw runakunam llumpay huchallapiña kawsarqaku.+
13 Chaymi Diosqa Noeyta nirqa: “Tantiarunim kay pachapi llapallan runakunata chinkarachinaypaq, chaytam ruwasaq llumpay mana allinkunallataña ruwasqankurayku. Chaymi kay pachapi tukuy imata chinkachisaq,+ hinaptinmi allpapas manaña kunan hinachu kanqa.
14 Chayraykuyá ruway cipres sachamanta wasi hina hatun buqueta*.+ Ukunpiñataq cuartokunata ruway hinaspa ukuntawan hawanta breawan+ llusiy.
15 Buquepa largonmi kanqa 134 metro*, anchonñataqmi kanqa 22 metro*, sayayninñataqmi kanqa 13 metro masnin*.
16 Iskay altusniyuqtam ruwanki, qatanmanta yaqa parte metro* urayninpim achki yaykunanpaq ventanata ruwanki, punkuntañataqmi waqtanpi ruwanki.+
17 Ñuqañataqmi nisyullay-nisyuta parachimusaq+ kay allpa pachaman huntanankama, hinaptinmi allpa pachapi llapallan kawsaqkuna tukunqa. Manam chullapas puchunqachu.+
18 Kunanmi qanwan contratota* ruwani. Qanmi chay ruwasqayki hatun buqueman yaykunki warmikiwan, churikikunawan hinaspa llumchuynikikunawan.+
19 Yaykuchinkitaqmi tukuy rikchaq animalkunatapas+ urquntin-chinantinta,+ chaynapi mana wañunanpaq.
20 Qampa kasqaykimanmi hamunqa parisnintin tukuy rikchaq alton pawaqkuna, parisnintin tukuy rikchaq uywa animalkuna hinaspa parisnintin tukuy rikchaq qasqunpa puriqkuna, chaynapi mana wañunanpaq.+
21 Huñunkitaqmi mikunapaq kaqkunatapas,+ chaymi kanqa qampaq chaynataq animalkunapaqpas”, nispa.
22 Noeyqa Diospa tukuy ima nisqantam ruwarqa. Diospa kamachisqanman hinamá ruwarqa.+
Willakuykuna
^ Utaq: “Diospa churinkuna”.
^ Kaypiqa rimachkan mana allin ruwaqkuna chinkananpaq nisyullay-nisyu para 120 watallamantaña chayamunanmantam.
^ Utaq: “Nefilimkuna”.
^ Utaq: “Arcata”. Hebreo rimaypiqa nichkan: “Baulta”, nispam. Kayqa karqa hatu-hatun cajonmi.
^ Utaq: “300 kuchus”. Qaway B14 kaq yachachikuyta.
^ Utaq: “50 kuchus”.
^ Utaq: “30 kuchus”.
^ Utaq: “Huk kuchus”.
^ Utaq: “Pactota”. Qaway kay palabrapa ima ninan kasqanta.
