Genesis 8:1-22
8 Diosqa manam qunqarqachu Noeytaqa, paywan kuska hatun buquepi* kaq purun animalkunataqa nitaq uywa animalkunatapas.+ Chaymi Diosqa kay pachaman wayrata pukuchimurqa, hinaptinmi yakuqa asllayayta qallaykurqa.
2 Hanaq pachamanta achkallay-achka tuqyamuq hinaspa tallikamuq yakupas manañam tallikamurqachu, chaymi paraqa usyarurqa.+
3 Hinaptinmi kay pachapi yakuqa pisi-pisimanta asllayarqa. 150 punchaw pasaytaqa astawanmi asllayarqa.
4 Chaymantam qanchis kaq killapa 17 kaq punchawninpi hatun buqueqa Ararat urqupi takyarurqa.
5 Chunka kaq killapa punta kaq punchawninpiñataqmi urqukunaqa rikukurqaña+ yaku hinalla asllayasqanrayku.
6 Hinaptinmi 40 punchaw pasaruptin Noeyqa wasi hina hatun buquepa ventananta kicharqa.+
7 Hinaspam alton pawaq cuervota kacharirqa, chaymi cuervoqa sapa kuti pawaspa kutiq kay allpa pacha manaraq chakisqanrayku.
8 Chaymantam Noeyqa palomataña kacharirqa kay allpa pachapi yaku asllayasqanta yachananpaq.
9 Kay allpa pachata yaku pamparusqanraykum+ palomaqa mana tarirqachu maypi tiyananpaqpas, chaymi buqueman kutirqa. Hinaptinmi Noeyqa makinta haywarirqa palomata buqueman yaykuchinanpaq.
10 Chaymantam qanchis punchawtawan suyarqa, hinaspam kaqmanta kacharirqa.
11 Palomañataqmi tardeykuqta kutiykurqa. Hinaptinmi aceitunas sachapa llaqinta* tuspanpi apamusqanta Noey qawarqa. Chaywanmi Noeyqa yacharurqa kay allpa pachapi yaku asllayasqanta.+
12 Chaywanpas qanchis punchawtawan suyaspanmi kaqmanta palomata kacharirqa, chay kutipim ichaqa manaña palomaqa kutimurqachu.
13 Punta kaq killapa punta kaq punchawninpim kay pachapi qucharayaq yakuqa manaña karqachu, Noeyqa 601 watanpiñam karqa.+ Chaymi Noeyqa yaku manaña qucharayasqanrayku buquepa qatanta kicharqa, qawaykuptinmi allpaqa ña chakichkasqaña.
14 Chaymantam iskay kaq killapa 27 kaq punchawninpi allpaqa chakiña karqa.
15 Chaymi Diosqa Noeyta nirqa:
16 “Buquemanta lluqsiy warmikiwan, churikikunawan hinaspa llumchuynikikunapiwan.+
17 Lluqsichiytaq alton pawaq animalkunatapas, tawa chakiyuq animalkunatapas chaynataq qasqunpa puriq animalkunatapas.+ Chaynapi achkallataña miraspa kay allpa pachapi achka kanankupaq”, nispa.+
18 Chaymi Noeyqa buquemanta lluqsirqa warminwan, churinkunawan+ hinaspa llumchuyninkunawan.
19 Lluqsichirqataqmi qasqunpa puriq animalkunatawan alton pawaq animalkunatapas. Llapallan animalkunam lluqsirqa kastanman hina.+
20 Chaymantam Noeyqa altarta* ruwarqa+ Jehova Diospaq, hinaspam kañanapaq animalkunamantawan alton pawaqkunamanta+ wakinta nakapuspa Diospaq kañapurqa.+
21 Chay kañapusqanpa miskillaña asnayninmi Jehova Diosman chayarurqa. Chaymi Jehova Diosqa sunqullanpi nirqa: “Manañam haykapipas kay allpataqa runakunaraykuqa ñakasaqñachu,+ runakunapa sunqunqa warma kasqanmantam mana allinllaña.+ Manañam kaynataqa haykapipas chinkachisaqchu llapallan kawsaqkunataqa.+
22 Kunanmantaqa kay allpa pachapim kanqa tarpuywan cosecha, chiriwan rupay, chiraw tiempowan puquy tiempo hinaspa tutawan punchaw”, nispa.+
