Genesis 9:1-29
9 Diosqa Noeytawan churinkunata bendecispanmi nirqa: “Achka churi-wawayuq kaspayá kay allpa pachaman huntaychik.+
2 Qamkunatam manchakusunkichik kay pachapi llapallan animalkuna, alton pawaqkuna, qasqunpa puriqkuna chaynataq lamar quchapi challwakunapas. Chay animalkunaqa lliwmi makikichikpi kanqa.+
3 Mikuwaqchikmi tukuy rikchaq animalkunata*.+ Imaynam kawsaykunatapas mikunaykichikpaq qurqaykichik, chaynam animalkunatapas mikunaykichikpaq quykichik.+
4 Ichaqa yawarwan kawsasqanraykum ama mikunkichikchu yawarniyuq aychataqa.+
5 Runapa yawarnin chaqchuqtaqa yawarninta chaqchusqanraykum ñuqapas wañuchisaq. Sichu runata ima animalpas wañurachispanqa wañuchisqam kanqa, runamasillan wañurachispanpas wañuchisqam kanqa.+
6 Sichu pipas runamasinta wañurachiptinqa, paytapas huk runam wañuchinqa+ runata kikinman rikchakuqta Dios unanchasqanrayku.+
7 Qamkunaqa achka churi-wawayuq kaspayá allpaman huntaychik”, nispa.+
8 Chaymantam Noeytawan churinkunata Dios nirqa:
9 “Kunanmi contratota* ruwani qamkunawan+ hinaspa miraynikichikkunawan,
10 alton pawaqkunawan, tawa chakiyuq animalkunawan chaynataq kay pachapi tukuy rikchaq animalkunawanpas.+
11 Contrato ruwasqayqa kaymi: ‘Manañam haykapipas nisyullay-nisyu parawanqa chinkachisaqchu kay allpa pachapi llapallan kawsaqkunataqa’”, nispa.+
12 Diosqa nirqataqmi: “Qamkunawan hinaspa llapallan kawsaqkunawan contrato ruwasqayqa wiñaypaqmi kanqa.
13 Puyupim chirapata rikurichisaq. Chayta qawaspankum yachanqaku kay pachapi kawsaqkunawan contrato ruwasqayta.
14 Kay allpa pachapa hawanpi puyuta rikurichiptiymi chay puyupi chirapa rikurinqa.
15 Chaywanmi qamkunawan hinaspa llapallan kawsaqkunawan contrato ruwasqayta sapa kuti yuyarisaq. Yakuwanqa manañamá haykapipas kay pachapi kawsaqkunataqa chinkachisaqñachu.+
16 Puyupi chirapa rikuriptinmi, sapa kuti qawaspay yuyarisaq kay allpa pachapi llapallan kawsaqkunawan wiñaypaq contrato ruwasqayta”, nispa.
17 Diosqa kaqmantam Noeyta nirqa: “Chay chirapam kay allpa pachapi llapallan kawsaqkunawan contrato ruwasqayta yuyarichiwanqa”, nispa.+
18 Hatun buquemanta* lluqsiq Noeypa churinkunam karqa Sem, Cam hinaspa Jafet.+ Chaymantam Campa churin karqa Canaan.+
19 Noeypa kimsan churinkunamantam kay allpa pachapi runakuna mirarqa.+
20 Noeymi chakrapi llamkayta qallaykuspan uvasta tarpurqa.
21 Huk kutipim Noeyqa vinota tomaruspan sinkarurqa, hinaspam carpan ukupi pachanta llatanakuruspan qalalla kachkarqa.
22 Hinaptinmi Canaanpa taytan Cam rikururqa taytan Noey qalalla kasqanta, hinaspam hawapi kaq wawqinkunaman willaykurqa.
23 Chaymi Jafetwan Semqa pachata hombronku lawpi hapiykuspanku qipanpalla asuykurqaku, hinaspam huklawta qawaspa taytanta qataykurqaku, chayraykum taytan qalalla kasqantaqa mana rikurqakuchu.
24 Noeyqa mallaqyaruspanmi rikcharirurqa, hinaspam sullka kaq churinpa ruwasqanta yacharurqa.
25 Chaymi nirqa:
“Ñakasqayá Canaanqa kachun.+
Payqa wawqinkunapa serviqninpapas serviqninyá kachun”, nispa.+
26 Noeyqa nirqataqmi:
“Sempa yupaychasqan Jehova Diosqa hatunchasqayá kachun.
Canaanñataqyá paypa serviqnin kachun.+
27 Jafetmanñataqyá Diosqa hatun allpata quchun,Jafetqa Sempa carpanpitaqyá yachachunpas*.
Canaanqa Jafetpa serviqnintaqyá kachun”, nispa.
28 Nisyullay-nisyu para qipatam Noeyqa kawsakurqa 350 watatawanraq.+
29 Chaymantam Noeyqa 950 watanpi wañukurqa.
Willakuykuna
^ Utaq: “Kawsaq animalkunata”.
^ Utaq: “Pactota”. Qaway kay palabrapa ima ninan kasqanta.
^ Utaq: “Arcamanta”.
^ Utaq: “Tiyachunpas”.
