Hebreos 12:1-29
12 Chaynaqa, muyuriqninchikpim puyu hina achkallaña Diosta servikuqkuna kachkan, paykunaqa imapas yachasqankumanta utaq uyarisqankumantam willakunku*, chayraykuyá ñuqanchikpas saqisun tukuy ima llasawaqninchik kaqkunata hinaspa chaylla arwitawaqninchik huchata,+ hinaspayá mana amiruspa hinalla ñawpaqman kallpasunchik* maymi chayananchikman.+
2 Kallpasunqa Jesusta allinta qawaspayá, payqa salvasqa kananchikpaq yanapawaqninchikmi chaynataq iñisqanchik cabal kananpaq yanapawaqninchikmi.+ Jesusqa hamuq tiempopi kusisqa kananta yachaspanmi pinqaytapas qipanchakuykuspan qirupi* ñakarirqa, hinaspam Diospa trononpa alliq* lawninpi tiyaykurqa.+
3 Chaynaqa, Jesuspiyá sumaqta hinaspa allinta yuyaymanaychik chaynapi ama pisiparunaykichikpaq hinaspa ama hukmanyarunaykichikpaq, payqa huchasapa runakunapa tukuy ima kamisqantam aguantarqa,+ chayna kamisqankuqa kikinkupa contranpim karqa.+
4 Huchapa contranpi peleaspaykichikqa qamkunaqa manaraqmi yawarnikichikta chaqchunaykichikkamaqa peleankichikraqchu.
5 Chaymantapas qamkunaqa pasaypaqtam qunqarunkichik huk taytapa churinkunaman hina Diospa rimapayasusqaykichikta, qillqanmi nin: “Churilláy, amayá wischupakuychu allinnikipaq Jehova* Diospa anyasusqaykitaqa, amayá amiruychu pay qaqchasuptikiqa.
6 Jehova* Diosqa haykam kuyasqantam rimapayan*, payqa azotenmi churin kananpaq pitapas chaskisqantaqa”, nispa.+
7 Qamkunaqa sasachakuykuna aguantasqaykichikwanmi corregisqa* kachkankichik, Diosqa tayta hinam qamkunawan kachkan,+ ¿pi churitaq kanman taytanpa mana corregisqan?+
8 Diosqa churinkunatam corregin, qamkunatapas chaynata mana corregisuptikichikqa manachiki churinkunachu kawaqchik aswanqa churyapakuyllanchiki.
9 Chaymantapas tayta-mamanchikqa* sapa kutim corregiwarqanchik, ñuqanchikñataqmi kasukurqanchik, chaynaqa ¿manachu astawan tukuy sunqumanta kasukunanchik kawsakuyninchikpi atiyninwan yanapawaqninchik taytanchik Diostaqa?+
10 Tayta-mamanchikqa pisi tiempollam allinpaq rikchakapusqankuman hina imaynatapas corregiwarqanchik, Diosmi ichaqa allinninchikpaq corregiwanchik pay hina chuya kananchikpaq.+
11 Pipapas corregiwasqanchikqa manam chayllaqa kusichiwanchikchu aswanqa hukmanyachiwanchikmi*, chaymantam ichaqa corregisqa kaqkunaqa hawkayaypi tarikunku hinaspa allin ruwaqña kanku.
12 Chaynaqa, utisqa makikichikyá kallpata hapichun, mana kallpayuq muquykichiktapas kallpanchaychikyá.+
13 Maymi risqaykichik allin ñannintayá hinalla riychik,+ chaynapi wiqrukunapas* muqunkuta mana muyurachinankupaq aswanqa sanoyanankupaq.
14 Hinallayá kallpanchakuychik llapallanwan+ hawkalla kanaykichikpaq hinaspa chuyanchakunaykichikpaq,+ mana chuyanchakuspaqa señortaqa manam pipas rikunqachu.
15 Allintayá qawarikuychik, chaynapi llapallaykichik Diospa ancha kuyasqan* kanaykichikpaq, hinaptin venenoyuq sapi hina chaqwa hatarichiq qamkunapi mana rikurirunanpaq hinaspa chay sapiwan achkallaña mana venenasqa kanankupaq.+
16 Cuidakuychiktaqyá qamkuna ukupi pipas mana huchapakuq* kananpaq hinaspa Esau hina Diospa kaqninkunata mana kaqpaqpas hinata pipas mana hapinanpaq, paymi huk plato mikuyllapaq piwi* kayninta quykurqa.+
17 Yachasqaykichikpi hinapas Esauqa Diospa bendecisqan kayta munaspanpas manañam bendecisqachu karqa, maynataña waqaspanpas taytanpa tantiasqantaqa manañam cambiachiyta atirqachu.+
18 Qamkunaqa manam ninapa rupasqan+ kay pachapi urqumanchu asuykurqankichik+ nitaq yana puyumanchu, yanay-yanay tutayaymanchu, sinchi wayramanchu,+
19 cornetillapa waqayninmanchu+ nitaq Diospa rimamusqanmanchu.+ Runakunam chayta uyarispanku ruegakurqaku amaña paykunata Dios rimapayananpaq.+
20 “Animalpas chay urquman asuykuqqa wañunankamam rumiwan chuqapasqa kanqa” niq+ kamachikuywanmi Israelpa mirayninkunaqa mancharisqa kachkarqaku.
21 Chaymantapas, chay qawasqanku mancharikuypaq kasqanraykum Moises nirqa: “Llumpay mancharisqa kasqayraykum katkatatachkani”, nispa.+
22 Qamkunaqa asuykurqankichik Sion muqumanmi+ hinaspa Diospa llaqtanmanmi utaq hanaq pachapi kaq Jerusalenmanmi,+ chayqa huñunasqa chunka wara-waranqantin angelkunam
23 chaynataq Diospa piwi churin hina llapa iñiqkunam,+ paykunapa sutinmi hanaq pachapi qillqasqa kachkan. Asuykurunkichiktaqmi llapallan runapa jueznin+ Diosmanpas, Diospa atiyninwan yanapasqa allin kawsakuq hinaspa mana huchayuqña+ runakunamanpas,+
24 musuq contrato*+ ruwakunanpaq yanapaq Jesusmanpas+ chaynataq challawasqanchik yawarninmanpas, paypa yawarninqa Abelpa yawarninmantapas aswan allinraqmi.+
25 Chaynaqa yanqañataq rimapayasuqnikichikta qipanchaspa mana uyariqtukuwaqchikchu. Diospa rimasqanmanta kay pachapi willakuqta mana kasukuqkunapas castigomantaqa manam lluptirqakuchu. Hinaptinqa, ¡hanaq pachamanta rimamuqta mana kasukuspaqa aswanraqchiki castigomantaqa mana lluptisunchu!+
26 Chay tiempopim Diospa rimasqanqa kay allpatapas katkatatachirqa.+ Kunanñataqmi niwanchik: “Kaqmantam katkatatachisaq*, ichaqa manam allpa pachallatachu, aswanqa cielokunatawanmi”, nispa.+
27 “Kaqmantam” nispanqa rimachkan katkatatachisqa kaqkunata Dios wischunanmantam, chaynapi mana katkatatachisqa kaqkuna hinalla kananpaq, chay katkatatachisqa kaqkunataqa manam Dioschu ruwarqa.
28 Ñuqanchikqa Dios kamachiptinmi chaypi kasun*, chayqa mana katkatatachinam. Chaynaqa, hinallayá Diospa ancha kuyakuyninta* chaskisunchik, chaynapi Diosta hatun respetowan hinaspa manchakuywan agradaspa servinanchikpaq.
29 Diosninchikqa manchakuypaq nina hinam.+
Willakuykuna
^ Utaq: “Testigo kanku”.
^ Utaq: “Raskisunchik”.
^ Utaq: “Paña”.
^ Utaq: “Kaspipi”. Qaway “ñakarichikuq qiru” niqpa ima ninan kasqanta.
^ Qaway A5 kaq yachachikuyta.
^ Qaway A5 kaq yachachikuyta.
^ Utaq: “Corregin”.
^ Utaq: “Yachachisqa”.
^ Griego rimaypiqa nichkan: “Taytanchikkunaqa”, nispam.
^ Utaq: “Nanawanchikmi”, “llakichiwanchikmi”.
^ Utaq: “Wistukunapas”.
^ Kaypiqa rimachkan mana kuyana kachkaspa kuyasqa kaymantam.
^ Utaq: “Punta naceq churi”.
^ Huchapakuytam griego rimaypi “porneia” ninku. Qaway “huchapakuy” niq palabrapa ima ninan kasqanta.
^ Utaq: “Pacto”. Qaway kay palabrapa ima ninan kasqanta.
^ Utaq: “Taspipasaq”.
^ Griego rimaypiqa nichkan: “Gobiernota chaskisun”, nispam.
^ Kaypiqa rimachkan mana kuyana kachkaspa kuyasqa kaymantam.
