Hebreos 13:1-25
13 Wawqi-panintin hinayá hinalla kuyanakuychik.+
2 Samaykachikuqllaña* kasqaykichiktapas amayá qunqaruychikchu,+ chayna samaykachikuq kaspankum wakinqa mana yachachkaspanku angelkunata samaykachirqaku.+
3 Presochasqa* kaqkunatayá yuyariychik,+ imaynam qamkunapas paykunawan preso kachkawaqchikpas hina.+ Ñakariqkunatapas yuyariychikyá, imaynam qamkunapas paykunawan ñakarichkawaqchikpas hina.
4 Casado vidataqa llapallankuyá ancha valorniyuqta qawachunku, casadokunaqa amayá hukwanqa pierdekuchunkuchu*,+ Diosqa hukwan pierdekuqkunatawan huchapakuqkunataqa* juzganqam.+
5 Amayá qullqilla maskaymanqa qukuruychikchu,+ aswanqa imam kapusuqnikichikwanyá hawka kawsakuychik.+ Diosmi nirqa: “Manapunim haykapipas saqisqaykichu nitaqmi qunqasqaykichu”, nispa.+
6 Hinaptinqa, mana manchakuspam kaynata nichwan: “Jehova* Diosmi ñuqapa yanapawaqniyqa, manam manchakusaqchu ¿imanawanmantaq runaqa?”, nispanchik.+
7 Diospa palabranta yachachispa pusasuqnikichikkunataqa amayá qunqaychikchu.+ Tukuy ima ruwasqankurayku allin kawsakusqankuta qawaspayá paykuna hina Diospi iñiyniyuq kaychik.+
8 Jesucristoqa ñawpaqtapas, kunanpas hinaspa wiñaypaqpas hina kaqllam.
9 Tukuy rikchaq hinaspa hukman yachachikuykunawanqa amayá pantaychikchu, sunqunchikpas kallpanchasqaqa kanan manam mikuymanta kamachikuykunawanchu, aswanqa Diospa ancha kuyawasqanchikwanmi*. Mikuymanta kamachikuykunallapi afanakuyqa manam yanapanchu chaykunallapiña kaqkunataqa.+
10 Ñuqanchikpaqa huk altarmi kapuwachkanchik, chay altarmantaqa manam mikunmankuchu Diosta carpapi serviqkunaqa.+
11 Hucharayku animalkunapa yawarnintam sacerdotekunapa kamachiqnin Chuyay-chuyay cuartoman apaykuspa Diosman qurqa. Chay animalpa aychanñataqmi samasqankumanta hawa lawpi kañasqa karqa,+
12 chaynataqmi Jesuspas llaqtapa* hawa lawninpi wañukurqa+ chaynapi kikinpa yawarninwan runakunata chuyanchananpaq.+
13 Chaynaqa, maymi samasqanchikmantayá hawa lawman lluqsisunchik Jesuspa kasqanman, lluqsisunqa payta hina kamiwaptinchikpas aguantaspayá.+
14 Ñuqanchikqa yachanchikmi una-unaypaq takyaq llaqta kaypi mana kapuwasqanchikta, chaymi ñuqanchikqa chayraq rikurimuq llaqtata anchata kallpanchakuspa maskachkanchik.+
15 Jesuspi iñispam tukuy tiempo Diosta hatunchananchik,+ Diospa sutinmantam hukkunapa qayllanpi rimananchik,+ chayqa animalta nakapuspa Diosman quchkachwanpas hinam.+
16 Allin ruwaytawan kapuqnikichikwan yanapanakuytaqa amayá qunqaychikchu.+ Chay ruwasqaykichikqa Diospa munasqanman hinam, yaqapas animalta nakapuspa qusqaykichik hinam.+
17 Pusasuqnikichiktayá kasukuychik, hinaspayá paykunapa makinpi churakuychik+ cuidasuqnikichik kasqanrayku, chayna kaptikichikqa mana llakikuspam kusikuywan cuidasunkichik, manachayqa manam allinnikichikpaqchu kanman. Imayna cuidasusqaykichikmantam paykunaqa cuentata qunqaku.+
18 Ñuqaykupaqyá Diosta tukuy tiempo mañakuychik, ñuqaykuqa manam iskayrayanikuchu allin concienciayuq kasqaykumantaqa, ñuqaykuqa munachkaniku tukuy imapi mana llullakuspa* allinlla kawsakuytam.+
19 Chaywanpas astawanyá Diosta mañakuychik qamkunaman chaylla kutimunaypaq.
20 Hawkayaypi kaq hinaspa hawkayay qukuq Diosmi wiñaypaq musuq contrato* ruwana yawarwan señorninchik Jesusta wañusqakunapa kasqanmanta kawsarichirqa,+ Jesusqa alli-allin michiqmi.
21 Chaykuna ruwaq Diosyá munayninta ruwanaykichikpaq tukuy allin kaqkunata qusunkichik. Munachkanitaqmi Jesucristopa yanapakuyninwan munasqanman hina imatapas ruwananchikpaq Dios yanapawananchikta. ¡Diosyá wiña-wiñaypaq hatunchasqa kachun! Chaynayá kachun*.
22 Wawqi-panillaykuna, qamkunata kallpanchanaypaq iskay-kimsa rimayllapi carta qillqamusqayta pacienciawan uyariykunaykichikpaqmi ruegakamuykichik.
23 Munanim wawqinchik Timoteo manaña presochasqa kasqanta yachanaykichikta, chaylla hamuptinqa paywan kuskam watuykuqnikichik hamusaq.
24 Saludaykapullawaychik pusasuqnikichik llapallan runakunata hinaspa Diospa llapallan runankunata. Saludamusunkichiktaqmi Italiapi+ kaq iñiqmasinchikkunapas.
25 Diospa ancha kuyakuyninyá* llapallaykichikwan kachun.
Willakuykuna
^ Utaq: “Allin runa”. Kaypiqa rimachkan mana riqsisqa runakunata allinta chaskiykunamantam.
^ Griego rimaypiqa nichkan: “Cadenawan watasqa”, nispam.
^ Utaq: “Waqllikuchunkuchu”.
^ Huchapakuytam griego rimaypi “porneia” ninku. Qaway “huchapakuy” niq palabrapa ima ninan kasqanta.
^ Qaway A5 kaq yachachikuyta.
^ Kaypiqa rimachkan mana kuyana kachkaspa kuyasqa kaymantam.
^ Griego rimaypiqa nichkan: “Punkupa”, nispam.
^ Utaq: “Mana suwakuspa”.
^ Utaq: “Pacto”. Qaway kay palabrapa ima ninan kasqanta.
^ Utaq: “Amen”.
^ Kaypiqa rimachkan mana kuyana kachkaspa kuyasqa kaymantam.
