Hebreos 7:1-28
7 Melquisedecqa Salem llaqtapi kamachiqmi hinaspa hanaq pacha Diospa sacerdotenmi karqa. Kamachiqkunata wañurachimusqanmanta Abrahan kutimuptinmi Melquisedecqa taripaspan bendeciykurqa.+
2 Abrahanñataqmi llapa qichumusqanmanta sapa chunkamanta hukninta payman qurqa. Melquisedec sutiqa “allin ruwayman hina kamachiq” ninanmi. Chaymantapas payqa Salem llaqtata kamachiqmi karqa, Salem ninanqa “hawkayay” ninanmi, chaymi Melquisedecqa “hawkayay qukuq kamachiq”.
3 Manam yachanchikchu Melquisedecpa pikuna tayta-maman kasqantaqa nitaq abuelonkunapa hinaspa mirayninkunapa sutintapas, manataqmi yachanchikchu haykapi nacesqantapas chaynataq haykapi wañukusqantapas. Ichaqa Diospa churin hina rikurirusqanraykum payqa wiñaypaq sacerdote.+
4 Qamkunaqa yuyaymanaychikyá Melquisedec ancha riqsisqa kasqanpi, paymanmi abuelonchik Abrahanqa llapa qichumusqankunamanta allinninkunata sapa chunkamanta hukninta qurqa.+
5 Yachasqanchikman hinapas Moisespa chaskisqan kamachikuykunaman hinaqa sacerdote kanankupaq akllasqa Leviypa+ mirayninkunam kamachisqa karqaku llaqtamasinkunamanta utaq wawqinkunamanta diezmota* mañanankupaq,+ llaqtamasinkuna Abrahanpa miraynin kachkaptinkupas.
6 Melquisedecmi ichaqa Leviypa mirayninmanta mana kachkaspanpas Diospa promesan chaskiq Abrahanmanta diezmota chaskirqa, hinaspam Diospa bendicionninta Abrahanpaq mañapurqa.+
7 Yachasqanchikpi hinapas mayor kaqmi sullka kaqtaqa bendecin.
8 Diezmo chaskiq Leviypa mirayninkunaqa wañuchkanmi, diezmo chaskiq Melquisedec hina kaq runamantam ichaqa Diospa qillqan willakun kawsasqanmanta.+
9 Chaymi nichwan diezmo chaskiq Leviypas Abrahannintakama Melquisedecman diezmokuna qusqanta.
10 Melquisedec taripaspan Abrahanwan tupaptinqa manaraqmi Leviyqa nacerqaraqchu, Leviyqa chayraqmi abuelon Abrahanpa mirayninmanta rikurimunan karqa.+
11 Israelpa mirayninkunapa chaskisqan kamachikuykunam nirqa Leviypa miraynillanmanta sacerdotekuna kanankuta. Sichu Leviypa mirayninmanta sacerdotekuna mana huchayuq kananchikpaq yanapawanchikman karqa hinaptinqa,+ ¿necesitachwanraqchu karqa Melquisedec+ hina sacerdoteta? ¿Manachu Aaron hina sacerdotellawanña kachwan karqa?
12 Chaynaqa, sacerdote kananpaq hukña churasqa kachkaptinqa, Moisespa chaskisqan kamachikuykunapa rantinpipas huktañataqmi churana.+
13 Rimasqanchik Melquisedecman rikchakuq runaqa manam Leviy ayllumantachu karqa, manataqmi paypa ayllunmantaqa pipas altarpiqa* servirqachu.+
14 Yachasqanchikpi hinapas señorninchikqa Judapa mirayninmantam karqa.+ Moisesqa manam imatapas rimarqachu Juda ayllumanta sacerdotekuna kananmantaqa.
15 Sacerdote kananpaq hukña churasqa kasqanqa Melquisedec+ hina huk sacerdote+ rikurimusqanwanmi aswan sutilla kachkan,
16 chay rikurimuq runaqa manam Leviypa mirayninmanta kasqanraykuchu sacerdote kachkan, aswanqa atiyta chaskisqanraykum mana pipa imananan wiñaypaq kawsakuchkan. Diospa kamachikuyninqa nirqa Leviypa mirayninmanta sacerdotekuna kanankupaqmi.+
17 Diospa qillqanpim paymanta rimaspan nin: “Qamqa wiña-wiñaypaqmi sacerdote kanki, Melquisedec hinam sacerdote kanki”, nispa.+
18 Chaymi ñawpaq kamachikuykunaqa mana valeqña rikurirun mana atiyniyuqña kasqanrayku hinaspa mana yanapawasqanchikrayku.+
19 Moisespa chaskisqan kamachikuykunaqa manam pitapas yanaparqachu mana pantaq runa kananpaqqa,+ Diospa rikurichimusqan allin kaqta suyasqanchikmi ichaqa yanaparqa,+ chaywanmi Diosman asuykunchik.+
20 Diosqa juraspanmi sacerdote kananpaq Jesusta churarqa.
21 Wakin sacerdotekunataqa manam juraspanchu Diosqa churarqa, Jesustam ichaqa juraspan Diosqa churarqa, paytam nirqa: “Jehova* Diosqa imapas nisqanmantaqa manam qipamanqa kutinchu, payqa ruwananmantapuni juraspanmi nirqa: ‘Qamqa wiña-wiñaypaqmi sacerdote kanki’”, nispa.+
22 Chayraykum Jesusqa rikurirun Diospa aswan allin contrato* ruwasqanmanta garantizaq.+
23 Chaymantapas sacerdotekunaqa wañuruqlla kasqankuraykum mana unaytachu servikurqaku, chaymi paykunapa rantinpiqa hukkunaña sacerdote karqaku.+
24 Jesuspa rantinpim ichaqa mana pipas sacerdoteqa kanmanchu,+ payqa wiñaypaq kawsakuqmi.
25 Chayraykum wiñaypaq salvanman paynintakama Diosman asuykuqkunataqa. Jesusqa wiñaypaqmi kawsachkan Diosman asuykuqkunapa rantinpi rimarinanpaq.+
26 Allinmi chayna sacerdotekunapa kamachiqnin ñuqanchikpaq kasqanqa. Payqa Diosman sunqum, mana huchayuqmi, mana qachachasqa hinam,+ huchasapakunamanta rakisqam hinaspa cielokunapa altonkama hatunchasqam.+
27 Payqa manam sacerdotekunapa kamachiqninkuna hinachu, sacerdotekunapa kamachiqninqa sapa punchawmi nakasqa animalkunata Diospaq quq,+ puntatam kikinpa huchanmantaraq, chaymantañam llaqtapa huchanmanta.+ Jesusmi ichaqa manaña chaynatachu ruwarqa huk kutillata wiñaypaq kikinpa vidanta qusqanrayku.+
28 Moisespa chaskisqan kamachikuykunaqa pantaq runakunatam churarqa sacerdotekunapa kamachiqnin kananpaq.+ Chay kamachikuypa kasqan qipaman rikurimuq juramentowan+ promesañataqmi sacerdotekunapa kamachiqnin kananpaq churarun wiñaypaq mana huchayuq+ churitaña.
Willakuykuna
^ Utaq: “Sapa chunkamanta hukninta”.
^ Qaway kay palabrapa ima ninan kasqanta.
^ Qaway A5 kaq yachachikuyta.
^ Utaq: “Pacto”. Qaway kay palabrapa ima ninan kasqanta.
