Hechos 15:1-41
-
Qari kayninkupi señalachikuymanta Antioquia llaqtapi atipanakusqankumanta (1, 2)
-
Rimaspa atipanakusqankumanta Jerusalenmanña risqanku (3-5)
-
Punta apaqkunawan apostolkuna huñunakusqankumanta (6-21)
-
Apostolkunapa hinaspa punta apaqkunapa cartanmanta (22-29)
-
Yawarta mana servichikunamanta (28, 29)
-
-
Iñiqkunata carta kallpanchasqanmanta (30-35)
-
Pablo hinaspa Bernabey rakinakusqankumanta (36-41)
15 Judeamanta runakuna hamuruspankum iñiqkunata yachachiyta qallaykurqaku: “Moisespa+ costumbrenman hina qari kaynikichikpi mana señalachikuspaykichikqa manam salvasqaqa kawaqchikchu”, nispanku.
2 Chayraykum paykunaqa Pablowan chaynataq Bernabeywan rimaspankuqa mana acuerdopichu karqaku hinaspam llumpayta atipanakurqaku, hinaptinmi iñiqkunaqa Pablotawan Bernabeyta hinaspa wakin iñiqkunatawan Jerusalenman+ kacharqaku, chaynapi apostolkunawan hinaspa iñiqkunapi punta apaqkunawan* señalachikuymanta rimamunankupaq.
3 Hinaptinmi iñiqkunaqa chawpi ñankama riysirqaku, chaymantam paykunaqa rirqaku Fenicia hinaspa Samaria lawninta huklaw nacionniyuq runakuna Diosman imayna kutirikusqankumanta tukuy imata willakustin, chaywanmi llapallan iñiqkuna anchallataña kusikurqaku.
4 Jerusalenman chayaruptinkum iñiqkuna, apostolkuna hinaspa iñiqkunapi punta apaqkuna* kuyakuywan chaskiykurqaku, hinaptinmi willakurqaku paykunawan Diospa tukuy ima ruwasqanmanta.
5 Ñawpaqta fariseo religionpi kaqkunamanta wakin iñiqkunam ichaqa sayarispanku nirqaku: “Huklaw nacionniyuqkunaqa qari kayninkupim señalachikunanku, Moisespa chaskisqan kamachikuykunata kasukunankupaqmi kamachinanchik”, nispanku.+
6 Chaymi apostolkunawan iñiqkunapi punta apaqkuna* huñunakururqaku señalachikuymanta rimanankupaq.
7 Sumaqta rimaruptinkum Pedroqa sayarispan nirqa: “Wawqillaykuna, yachasqaykichikman hinam ñawpaqmantaraq qamkunamanta Dios akllawarqa huklaw nacionniyuq runakunaman sumaq willakuyta willakunaypaq, chaynapi paykunapas iñikunankupaq.+
8 Runapa sunqunta+ riqsiq Diosmi huklaw nacionniyuq runakuna chaskisqanta qawachinanpaq atiyninta*+ paykunaman qurqa imaynam ñuqanchikmanpas quwasqanchikman hina.
9 Diosqa manam ñuqanchikmanpas nitaq paykunamanpas sayapakurqachu,+ aswanqa iñisqankuraykum sunqunkuta chuyanchaykurqa.+
10 Hinaptinqa, ¿imanasqamá qamkunaqa Diosta piñachichkankichik ñawpaq abuelonchikkunapapas chaynataq ñuqanchikpapas mana qipiy atisqanchik llasaq qipikunata iñiqkunaman churkuspaykichikqa?+
11 Ñuqanchikqa yachanchikpunim señor Jesuspa ancha kuyakuyninrayku*+ paykuna hina salvasqa kananchikmanta”, nispa.+
12 Chayna nisqanta uyariruspankum llapallanku upallarurqaku hinaspam Bernabeytawan Pablotaña uyariyta qallaykurqaku, paykunam willakurqaku Diospa yanapakuyninwan achkallaña milagrokunatawan admirakuypaq kaqkunata huklaw nacionkunapipas ruwasqankumanta.
13 Rimayta tukuruptinkuñataqmi Santiago nirqa: “Wawqillaykuna, uyariykullawaychik.
14 Simeonmi+ lliwta willakurun imaynam huklaw nacionniyuq runakunata Diosqa chayllaraq chaskiykusqanmanta, chaynapi kikin Dios chay nacionkunamanta sutin apaq llaqtata rikurichinanpaq.+
15 Kayqa tupan Diosmanta willakuqkunapa* rimasqanwanmi, qillqasqam kachkan:
16 ‘Kaykunamanta qipatam Davidpa tuñisqa wasinta hatarichiq kutisaq, purmasqa kasqanmantam musuqmanta ruwasaq hinaspa allichasaq.
17 Chaynapi qipaq runakuna llapallan nacionpi runakunawan kuska ñuqa Jehova* Diosta tukuy sunqunkuwan maskawanankupaq, paykunaqa sutiywan sutichasqam kanku, chaykunata ruwaq Jehova* Diosmi chaynata nini.+
18 Kaykunaqa ñawpaqmantaraq yachasqam’, nispa.+
19 Chayraykum ñuqaqa tantiaruni Diosman kutirikuq huklaw nacionniyuqkunata mana sasachanapaq,+
20 paykunamanyá qillqana kachun taytacha-mamachakunapaq kaqkunamanta karunchakunankupaq,+ ama huchapakunankupaq*,+ tiqukuruq* animalpa aychanta* ama mikunankupaq hinaspa yawarta ama servichikunankupaq.+
21 Ñawpaqmantaraqmi Moisespa qillqasqankunamantaqa llaqtakunapi runakuna willakurqaku, kunanpas chaykunataqa huñunakuna wasikunapim* sapa samana punchaw* kallpawan leenku”, nispa.+
22 Hinaptinmi apostolkunawan iñiqkunapi punta apaqkunaqa* llapallan iñiqkunapiwan tantiarurqaku paykunamanta qarikunata akllaruspa Pablotawan hinaspa Bernabeytawan kuskata Antioquiaman kachanankupaq, akllarqakuqa Barsabaswan sutichasqa Judastawan Silastam,+ kay wawqikunaqa iñiqkunapa respetasqanmi karqaku.
23 Paykunawanmi qillqasqankuta apachirqaku, qillqasqankum nirqa:
“Antioquia+ llaqtapi, Siria llaqtapi chaynataq Cilicia llaqtapi kaq huklaw nacionniyuq iñiqmasillayku, iñiqmasikichik apostolkuna hinaspa iñiqkunapi punta apaqkunam* saludamuykiku.
24 Ñuqaykum uyariruniku mana imatapas nichkaptiyku ñuqaykumanta wakin runakuna iñisqaykichikta yanqacharuyta munaspanku rimasqankuwan hukmanyarachisusqaykichikta.+
25 Llapallaykum tantiaruniku qarikunata akllaspayku kuyasqanchik Bernabeytawan hinaspa Pablotawan kuskata qamkunaman kachamunaykupaq.
26 Paykunaqa señorninchik Jesucristopa sutinraykum vidankutapas peligropi churarqaku.+
27 Chaymi Judastawan Silasta kachamuchkaniku paykunapas hina kaykunallamanta willasunaykichikpaq.+
28 Chuya espiritumanpas+ hinaspa ñuqaykumanpas allinmi rikchakuwanku llasaq qipikunata ama qipichinaykupaq, aswanqa imam ruwananchik kaqkunallatam nimuykiku.
29 Hinallayá qamkunaqa karunchakuychik taytacha-mamachakunaman qusqa kaqkunamanta+ hinaspa huchapakuymanta*,+ chaymantapas amayá yawartaqa servichikuychikchu,+ amataqyá tiqukuruq* animalkunapa aychantapas* mikuychikchu.+ Kaykunata kasukuspaykichikqa allinmi kankichik. Qamkunayá allinlla”, nispa.
30 Chaymantam kay runakunata aviarqaku, hinaptinmi paykunaqa Antioquiaman rispanku achkallaña iñiqkunata huñuruspanku cartata quykurqaku.
31 Leeruptinku sunqunku tiyaykuptinmi kusikurqaku.
32 Judaswan Silasmi Diosmanta willakuq kasqankurayku achka yachachikuykunawan iñiqkunata kallpancharqaku hinaspa allinta yanaparqaku.+
33 Chaypi huk tiempo karuptinkum iñiqkunaqa “qamkunayá allinlla” nispanku aviarurqaku chay kachamuqninkunaman.
34 *
35 Pablowan Bernabeymi ichaqa Antioquiapi qipakurqaku Jehova* Diospa palabranmanta sumaq willakuyta wakin iñiqmasinkunawan willakuspanku.
36 Iskay-kimsa punchawmantam Bernabeyta Pablo nirqa: “Kutisunñayá* Jehova* Diospa palabranta willakusqanchik llaqtakunaman, chaynapi iñiqmasinchikkunata watukuspa imayna kasqankuta qawaykamunanchikpaq”, nispa.+
37 Bernabeymi tantiarurqa Marcoswan sutichasqa Juanta pusananpaq.+
38 Pablom ichaqa pusayta mana munarqachu Panfilia lawpi kachkaptinku rakikuruspan ruwayninkupi yanapaq paykunawan mana risqanrayku.+
39 Chaymi llumpayta piñanakuruspanku rakinakururqaku, Bernabeymi+ Marcosta pusarikuspan Chipre islaman botepi pasakurqa.
40 Pabloñataqmi Silasta akllarurqa, hinaptinmi iñiqmasinkuna Jehova* Diosta Pablopaq mañaykapuptinku pasakurqa.+
41 Iñiqkunata kallpanchastinmi rirqa Siria llaqtanta hinaspa Cilicia llaqtanta.
Willakuykuna
^ Utaq: “Ancianokunawan”.
^ Utaq: “Ancianokuna”.
^ Utaq: “Ancianokuna”.
^ Kaypiqa rimachkan mana kuyana kachkaspa kuyasqa kaymantam.
^ Utaq: “Profetakunapa”.
^ Qaway A5 kaq yachachikuyta.
^ Qaway A5 kaq yachachikuyta.
^ Utaq: “Yawarpa pasasqan aychata”.
^ Utaq: “Tiqusqa”.
^ Huchapakuytam griego rimaypi “porneia” ninku. Qaway “huchapakuy” niq palabrapa ima ninan kasqanta.
^ Utaq: “Sinagogakunapim”.
^ Utaq: “Sabado”.
^ Utaq: “Ancianokunaqa”.
^ Utaq: “Ancianokunam”.
^ Utaq: “Yawarpa pasasqan aychatapas”.
^ Utaq: “Tiqusqa”.
^ Huchapakuytam griego rimaypi “porneia” ninku. Qaway “huchapakuy” niq palabrapa ima ninan kasqanta.
^ Qaway A3 kaq yachachikuyta.
^ Qaway A5 kaq yachachikuyta.
^ Ichapas kanman: “Imaynapas kutinanchikmi”, niqpas.
^ Qaway A5 kaq yachachikuyta.
^ Qaway A5 kaq yachachikuyta.
