Hechos 19:1-41
19 Corinto llaqtapi Apolos+ kachkaptinmi Pabloqa urqunta rispan Efeso+ llaqtaman chayarurqa, chaypim wakin iñiqkunata tariruspan
2 nirqa: “¿Iñikuspaykichikqa chaskirqankichikchu chuya espirituta*?”, nispa.+ Paykunañataqmi nirqaku: “¡Manataq haykapipas uyarirqanikuchu chuya espiritu kasqanmantaqa!”, nispanku.
3 Chaymi Pablo nirqa: “Hinaptinqa, ¿imayna bautismowantaq bautizakurqankichik?”, nispa. Paykunañataqmi nirqaku: “Juanpa yachachisqanman hinam bautizakurqaniku”, nispa.+
4 Hinaptinmi Pablo nirqa: “‘Qipay hamuqpi utaq Jesuspi iñiychik’ nispanmi+ Juanqa bautizarqa, chaynapi huchankumanta wanakusqankuta+ runakuna yachanankupaq”, nispan.
5 Chayta uyariruspankum señor Jesuspa sutinpi bautizakurqaku.
6 Paykunapa hawanman makinta Pablo churaykuptinñataqmi Diospa atiynin* paykunaman huntaykurqa,+ hinaptinmi qallaykurqaku huklaw nacionniyuq runakunapa rimayninpi rimayta chaynataq Diosmanta willakuytapas.+
7 Llapanpiqa karqaku yaqa 12 qarikunam.
8 Huñunakuna wasiman*+ yaykuspanmi Pabloqa mana manchakuspa kimsa killa rimarqa, payqa Diospa gobiernonmantam* yachachiq, hinaspam yuyaymanachispan runakunata iñinankupaq hina allinta yachachiq.+
9 Wakin runakuna sunqunkuta rumiyachispa mana iñikuptinkum hinaspa Diospa ñanninmanta+ runakunapa qayllanpi mana allinta rimaptinkum Pabloqa chay runakunamanta sapaqchakururqa,+ iñiqkunatapas sapaqcharuspanmi escuelapi sapa punchaw yachachiq, chay escuelapa dueñonmi karqa Tirano sutiyuq runa.
10 Chaytam ruwaq iskay watapuni, chaymi Asia provinciapi yachaq* llapallan runakuna Diospa palabranta uyarirqaku, uyarirqakumá judiokunapas chaynataq mana judio kaqkunapas*.
11 Pabloqa Diospa yanapakuyninwanmi admirakuypaq milagrokunata hinalla ruwarqa,+
12 chaymi Pablopa pañuelonkunata hinaspa hawanpi pachankunata unquqkunaman aparqaku,+ hinaptinmi paykunaqa allinyaqku, demoniokunapas paykunamantam lluqsirqa.+
13 Demoniokunata qarqustin llaqtan-llaqtan puriq wakin judiokunapas señor Jesuspa sutinpim runakunapi kaq demoniokunata qarqunankupaq kaynata nirqaku: “Pablopa willakusqan Jesuspa sutinpim kamachikiku lluqsinaykipaq”, nispa.+
14 Chaynatam ruwarqaku Esceva sutiyuq riqsisqa sacerdotepa qanchis churinkuna, Escevaqa judiom karqa.
15 Chaymi demonio paykunata nirqa: “Jesustaqa riqsinim,+ yachanitaqmi Pablo pi kasqantapas,+ ichaqa ¿pikunataq qamkunaqa kankichik?”, nispa.
16 Hinaspam demonioyuq runaqa paykunaman hukllata pawaykuspan hukninta-hukninta hapiruspan llapachanta vencerurqa, chaymi paykunaqa heridasqallaña hinaspa qalallaña chay wasimanta lluptikurqaku.
17 Chay pasasqanmantaqa llapallankum yacharurqaku. Yacharurqakum Efeso llaqtapi yachaq judiokunapas chaynataq griego rimayniyuqkunapas, paykunaqa llapallankum mancharisqallaña karqaku. Señor Jesuspa sutinñataqmi hinalla hatunchasqa karqa.
18 Iñikuqkunamantam achkallaña hamuspanku hukkunapa qayllanpi huchankuta riqsikurqaku hinaspam imapas ruwasqankumanta willakurqaku.
19 Layqa ruwaqkunapas achkallañam libronkuta huñuruspanku llapankupa qayllanpi kañarurqaku,+ tantiasqankuman hinaqa chay llapan librokunam karqa 50.000 qullqipa chanin.
20 Hinaptinmi Jehova* Diospa palabranqa admirakuyllapaqña aswan willakusqa karqa, chaytaqa manamá imapas harkayta atirqachu.+
21 Chaykunamanta qipatam Pabloqa tantiarurqa Macedonia+ lawnintawan Acaya lawninta pasaruspan Jerusalenman+ rinanpaq. Paymi nirqa: “Jerusalenman riruspayñam Roma+ llaqtamanqa risaq”, nispa.
22 Chaymi Macedoniaman kacharqa iskay yanapaqninkunata, paykunaqa karqaku Timoteowan+ Erastom,+ payñataqmi Asia provinciapi unay qipakurqa.
23 Chay tiempollapim llumpay chaqwa karqa+ Señorpa ñanninmanta.+
24 Demetriom Artemis mamachapa capillachankunata qullqimanta ruwaq, chaywanmi achka qullqita ganachiq chay capillachakuna ruwaq runakunatapas.+
25 Chay runakunata hinaspa chayman rikchakuq oficioyuq runakunata huñuruspanmi nirqa: “Qarikuna, yachasqaykichikman hinaqa kay negocio ruwasqanchikraykum achka qullqiyuq kanchik.
26 Qawasqaykichikman hinaspa uyarisqaykichikman hinaqa kay Pablom Efeso+ llaqtapi hinaspa yaqa enteron Asia provinciapi nichkan ‘runakunapa ruwasqan taytacha-mamachakunaqa manam dioschu’ nispan. Chaynata nispanmi achkallaña runakunata umacharun nisqanta creenankupaq.+
27 Kay negocio ruwasqanchikmanta runakuna mana allintaña rimanankumantam chaynataq Artemis mamachapa templon mana allinpaq hinaña qawasqa kanantam manchakuni, manchakunitaqmi ancha riqsisqa kachkaspan mana kaqpaq hinaña qawasqa kanantapas. Artemis mamachaqa Asia provinciapi hinaspa enteron pachapi yupaychasqam”, nispa.
28 Chayta uyariruspankum llumpayta rabiarurqaku hinaspam qapariyta qallaykurqaku: “¡Efeso llaqtayuq runakunapa mamachan Artemisqa ancha riqsisqam!”, nispanku.
29 Hinaptinmi Efeso llaqtapi runakunaqa hatun chaqwapi rikurirurqaku, hinaspam llapallanku actuacion ruwananku wasiman apurawllamanña yaykururqaku Gayotawan Aristarcota+ pampanta aysaspanku, paykunaqa karqaku Macedonia lawmanta Pablopa viajaqmasinkunam.
30 Chayna kachkaptinmi Pabloqa chay runakunapa kasqanman yaykuyta munarqa, iñiqkunam ichaqa harkarurqaku.
31 Fiestakunamanta hinaspa pukllaykunamanta wakin encargakuqkunapas Pablomanmi ruegaspanku willachimurqaku actuacion ruwananku wasiman amapuni yaykunanpaq chaynapi peligropi ama kananpaq, chay encargakuqkunaqa Pablotam amistadninta hina qawaqku.
32 Chaypi huñunasqa runakunaqa hatun chaqwapi kaspankum qayaykachakurqaku, wakinmi hukta rimaspa qayaykachakurqa wakinñataq hukta, yaqa llapallankum mana yacharqakuchu imapaq huñunakusqankumanta.
33 Chaymi Alejandrota judiokuna hurquramurqaku llapa runapa chawpinmanta hinaspam ñawpaqman tanqarqaku, Alejandroñataqmi makinwan señaschaspan nirqa runakunapa qayllanpi rimananpaq.
34 Ichaqa judio kasqanta riqsiruspankum huk runa hinalla yaqa iskay hora kaynata qayaykachakurqaku: “¡Efeso llaqtayuq runakunapa mamachan Artemisqa ancha riqsisqam!”, nispanku.
35 Hinaptinmi llaqtapi alcalde llapa runakunata hawkayarachispan nirqa: “Efeso llaqtayuq qarikuna, ¿pitaq mana yachanchu Efeso llaqtaqa ancha riqsisqa Artemis mamachapa templonta chaynataq cielomanta uraykamuq ruwasqa imagenninta waqaychaq kasqanta?
36 Manam pipas kaykunataqa neganchu, chaynaqa hawkallam kanaykichik, amataqyá imatapas loco hinaqa ruwaychikchu.
37 Kay pusamusqaykichik runakunaqa manam templokuna suwakuqchu nitaq mamachanchiktapas insultaqchu.
38 Hinaptinqa, sichu Demetriowan+ llamkaqmasinkuna pitapas quejakuyta munaptinkuqa kanmi punchaw cortepi kaqkuna pipapas quejanta atiendenanpaq, kantaqmi provinciakunata kamachiqkunapas*, paykunam chaytaqa allichananku.
39 Ichaqa imapas kaptinqa autoridadkunapa qayachisqan asambleapiñam tantiakunan.
40 Kay pasasqanmantaqa autoridadkunapa contranpi hatarisqanchikmantam acusasqa kachwan, kay chaqwa imanasqa kasqanmantaqa manam ima niytapas atichwanchu”, nispa.
41 Chaykunata niruspanmi chaypi llapa runakunata ripukunankupaq nirqa.
Willakuykuna
^ Qaway “chuya espiritu” niqpa ima ninan kasqanta
^ Utaq: “Chuya espiritu”.
^ Qaway “Diospa gobiernon” niqpa ima ninan kasqanta.
^ Utaq: “Sinagogaman”.
^ Utaq: “Tiyaq”.
^ Griego rimaypiqa nichkan: “Griegokunapas”, nispam. Paykunaqa huklaw nacionniyuq kaspapas griego rimayniyuqmi karqaku.
^ Qaway A5 kaq yachachikuyta.
^ Utaq: “Provinciakunapi proconsulkunapas”. Qaway “provinciata kamachiq” niqpa ima ninan kasqanta.
