Hechos 5:1-42
-
Ananiasmantawan Safiramanta (1-11)
-
Apostolkuna milagrokunata ruwasqankumanta (12-16)
-
Presochasqa hinaspa librasqa kasqankumanta (17-21a)
-
Judiokunapa hatun cortenman kaqmanta pusasqa kasqankumanta (21b-32)
-
“Runakunamantaqa Diostam kasukunayku” (29)
-
-
Gamaliel sutiyuq runapa rimasqanmanta (33-40)
-
Wasin-wasin Diosmanta willakusqankumanta (41, 42)
5 Ananiasmi warmin Safirapiwan allpankuta rantikururqaku*.
2 Rantikusqankumanta wakin qullqitam ichaqa Ananias hapikururqa, chaytaqa warmillanmi yacharqa, apostolkunamanqa wakillantam aparqa.+
3 Hinaptinmi Pedro nirqa: “Ananias, ¿imanasqamá satanasqa kallpanchasurqanki chuya espirituta*+ llullakunaykipaq+ hinaspa allpaykimanta chaskisqayki wakin qullqita pakarunaykipaqqa?
4 Allpayki makikipiraq kaptinqa, ¿manachu qampa karqa? Rantikuruptikipas chay qullqiqa qampam karqa. Hinaptinqa, ¿imanasqamá chaynataqa tantiarurqanki? ¡Diostam llullakurunkiqa, manam runakunatachu!”, nispa.
5 Chayta uyariruspanmi Ananiasqa pampaman wichiykuspan wañururqa. Hinaptinmi wañukusqanta uyariqkuna llumpayta mancharikurqaku.
6 Chaymi musukuna hatarispanku telawan wankururqaku, hinaspam hurquspanku pampamurqaku.
7 Chaymanta yaqa kimsa horamantam Ananiaspa warmin yaykurqa, payqa manam yacharqachu ima pasasqanmantaqa.
8 Hinaptinmi Pedro nirqa: “Niykuway: ¿Kayna preciopichu allpaykichikta rantikururqankichik?”, nispa. Chaymi Safira nirqa: “Arí, chaynapim”, nispan.
9 Hinaptinmi Pedroñataq nirqa: “¿Imanasqataq qamkunaqa tantiarurqankichik Jehova* Diospa espiritunta pruebaman churanaykichikpaqqa? Waqaya punkupi kachkanku qusayki pampamuqkuna, paykunam qamtapas hawaman hurqusunki”, nispa.
10 Hinaptillanmi Safiraqa qunqayllamanta Pedropa ñawpaqninman wichiykuspan wañururqa. Chay musukunañataqmi yaykuruspanku wañusqataña tarirurqaku hinaspam hurquruspanku qusanpa waqtanpi pampamurqaku.
11 Chaymi llapallan iñiqkuna hinaspa lliw chayta uyariruqkuna llumpayta mancharikurqaku.
12 Runakuna rikuchkaptinmi apostolkunaqa achkallaña milagrokunatawan admirakuypaq kaqkunata hinalla ruwarqaku.+ Llapallankutaqmi Salomonpa purinan sutiyuq corredorpi huñunakurqaku.+
13 Wakin runakunaqa iñiqkunaman hukllawakuytaqa manam munarqakuchu, ichaqa llaqta runakunapa alabasqanmi karqaku.
14 Señorpi iñiqkunaqa achkallañam qarikunapas hinaspa warmikunapas hinalla yapakurqaku.+
15 Paykunaqa unquqkunatapas hatun callekunaman apaspankum taksa camakunapi hinaspa chakanakunapi churaqku, chayninta Pedro pasaspan mayqillantapas llantuyllanpas-llantuykunanpaq.+
16 Jerusalenpa muyuriqninpi llaqtakunamantapas hamuqkum unquqkunata hinaspa demoniokunapa ñakarichisqan runakunata qipikuykuspanku, hinaptinmi llapachallanku sanoyachisqa karqaku.
17 Chaymi sacerdotekunapa kamachiqnin hinaspa chaypi kaq saduceokunapa qatiqninkuna piñasqallaña lliw hatarirurqaku,
18 hinaspam apostolkunata hapiruspanku carcelman churarurqaku.+
19 Ichaqa chay tutam Jehova* Diospa angelnin carcelpa punkunta kicharuspan+ paykunata hurqururqa, hinaspam nirqa:
20 “Diospa wasinman* rispaykichikyá wiñay kawsaymanta runakunaman hinalla willakamuychik”, nispa.
21 Chayta uyariruspankum paykunaqa achikyaqta Diospa wasinman yaykuruspanku yachachiyta qallaykurqaku.
Sacerdotekunapa kamachiqninñataqmi paywan kaqkunapiwan chayaramuspanku judiokunapa cortenpi* kaqkunata huñuchimurqaku, huñuchimurqakutaqmi Israel kastamanta llapallan autoridadkunatapas, hinaspankum guardiakunata kamachirqaku carcelmanta apostolkunata qayllankuman pusamunankupaq.
22 Guardiakuna carcelman chayaruspankuñataqmi apostolkunataqa manaña tarirqakuchu, chaymi kutispanku willakurqaku
23 kaynata: “Carceltaqa llavewan sumaq wichqasqatam tariramuniku, guardiakunapas punkukunapim kachkasqaku, carcelta kichaykuptinkuñataqmi ukupiqa manaña pipas kasqachu”, nispa.
24 Chaymi templota cuidaq guardiakunapa kamachiqnin hinaspa riqsisqa sacerdotekuna chayta uyariruspanku nirqaku: “Imaraq kunanqa kanqa”, nispa.
25 Ichaqa huk runa chayaramuspanmi paykunata nirqa: “Chay presochasqaykichik runakunaqa Diospa wasinpim kachkanku, hinaspam runakunaman yachachichkanku”, nispan.
26 Hinaptinmi guardiakunapa kamachiqninqa soldadonkunawan pasaspan mana imanaspalla pusamurqaku runakuna rumiwan chuqaparunankuta manchakuspanku.+
27 Pusaramuspankum judiokunapa cortenpi sayaykachirqaku, hinaptinmi sacerdotekunapa kamachiqnin tapupayarqa,
28 hinaspam nirqa: “Ñuqaykuqa chunkay-chunkaytam nirqaykichik Jesuspa sutinpi runakunaman amaña yachachinaykichikpaq,+ ichaqa enteron Jerusalen llaqtapim yacharachinkichik, hinaspapas chay runapa wañusqanmanta huchayuq kanaykutaraqmi munachkankichik”, nispa.+
29 Hinaptinmi Pedrowan wakin apostolkuna nirqaku: “Diostam puntata kasukunayku runakunata kasukunaykumantaqa, paymi ñuqaykupa autoridadniykuqa.+
30 Qirupi* warkuspa wañuchisqaykichik Jesustaqa abuelonchikkunapa Diosninmi kawsarichimurqa.+
31 Paytam Diosqa hatunchaykurqa alliq* lawninpi tiyaykunanpaq.+ Hinaspam churarqa runakunata salvananpaq+ hinaspa librananpaq.+ Chaynataqa ruwarqa Israel runakuna wanakunankupaqmi hinaspa huchankumanta pampachasqa kanankupaqmi.+
32 Kaykunamantaqa ñuqaykum testigo kaniku,+ chuya espiritupas testigotaqmi.+ Chay atiynintaqa Diosmi qun llapallan kasukuqninkunaman”, nispa.
33 Chayta uyariruspankum piñakururqaku, hinaspam apostolkunata wañurachiyta munarqaku.
34 Hinaptinmi judiokunapa cortenpi Moisespa chaskisqan kamachikuykunamanta yachachiq Gamaliel sutiyuq fariseo* runa+ sayariykuspan apostolkunata nirqa hawaman huk ratolla lluqsichinankupaq. Gamalielqa karqa llapa runakunapa respetasqanmi.
35 Hinaspam paykunata nirqa: “Israel qarikuna, kay runakunawan imam ruwanaykichikmantaqa allinta tantiaychik.
36 Ñawpaqtam karqa Teudas sutiyuq riqsisqa runa, paypa qatiqninkunam yaqa 400 runakuna karqaku. Payta wañurachiptinkum ichaqa lliw qatiqninkuna chiqiruspanku chinkarurqaku.
37 Paypa qipanmanñataqmi rikurimurqa Galileamanta Judas sutiyuq runa. Paymi padronachikuy tiempopi runakunata umacharqa qatiqnin kanankupaq. Pay wañuruptinmi lliw qatiqninkunapas chiqirurqaku.
38 Chayraykum nikichik: Ama imanaychikchu kay runakunataqa aswanqa saqiykuychik. Sichu paykunapa yachachisqanku utaq imam ruwasqankupas runakunallamanta kaspanqa chinkarunqam,
39 Diosmanta kaptinmi ichaqa mana chinkachiyta atiwaqchikchu.+ Chaynaqa, yanqañataq Diospa contranpi peleachkawaqchik”, nispa.+
40 Chaymi Gamalielpa nisqanta kasukuspanku apostolkunata qayachirqaku, hinaspam azoteruspanku*+ nirqaku Jesuspa sutinpi amaña yachachinankupaq, hinaspam ripukunankupaq kachaykurqaku.
41 Apostolkunaqa judiokunapa cortenmantam kusisqallaña pasakurqaku+ Jesuspa sutinrayku pinqaypi churasqa kasqankumanta.
42 Hinaspam sapa punchaw Diospa wasinpi chaynataq wasin-wasin+ mana samaykuspa Jesucristomanta* sumaq willakuyta yachachirqaku hinaspa willakurqaku.+
Willakuykuna
^ Utaq: “Venderurqaku”.
^ Qaway “chuya espiritu” niqpa ima ninan kasqanta.
^ Qaway A5 kaq yachachikuyta.
^ Qaway A5 kaq yachachikuyta.
^ Utaq: “Temploman”.
^ Griego rimaypiqa nichkan: “Sanedrinpi”, nispam. Qaway kay palabrapa ima ninan kasqanta.
^ Utaq: “Kaspipi”.
^ Utaq: “Paña”.
^ Qaway kay palabrapa ima ninan kasqanta.
^ Utaq: “Maqaruspanku”.
^ Griego rimaypiqa nichkan: “Cristo Jesusmanta”, nispam.
