Isaias 60:1-22
60 “Yaw warmi,+ hatarispa kanchariy, achkikim hamurun.
Jehova Diosmi kanchasuchkanki.+
2 Tutayaymi kay allpa pachata pampanqa,yanayaymi nacionkunata pampanqa.
Qamtam ichaqa Jehova Dios achkisunki,hawaykipim kanchaynin kanqa.
3 Nacionkunam achkiynikiman hamunqa.+
Kamachiqkunam+ llipipipiq kanchaynikiman hamunqa.+
4 ¡Umaykita huqarispayá muyuriqnikita qawariy!
Paykunaqa llapallankum huñunakurunku, qanmanmi hamuchkanku.
Karu-karumantaraqmi qari warmaykikuna hamuchkanku,+warmi warmaykikunatapas marqayninkupim apamuchkanku.+
5 Chay punchawkunapiqa chayta qawaspaykim kusisqallaña kanki.+
Sunquykipas pawanqam, kusikuymantam pawanqa.
Lamar quchapi tukuy ima kaqkunatam qanman apamunqaku.
Nacionkunapa tukuy imantam qanman apamunqaku.+
6 Nana-nanaq camellokunam allpaykita pampaykunqa.
Madianmantawan Efamanta+ malta camellokunam allpaykita pampaykunqa.
Saba runakunam llapallanku hamunqaku,quritawan sachapa miski asnaq wiqintam* apamunqaku.
Jehova Diostam hatunchanqaku.+
7 Quedarpi+ llapallan ovejakunam qampaq kanqa.
Nebayotmanta+ carnerokunapas qampaqmi kanqa.
Altarmanmi apamunqaku, chaskisqam kanqa.+
Kuyayllapaq wasiytam astawan sumaqyachisaq.+
8 ¿Pikunataq kanku puyu hina pawaqkunaqa?
¿Pikunataq kanku urpikuna hina wasinkuman pawaqkunaqa?
9 Islapi yachaqkunaqa* ñuqapim hapipakunqaku.+
Tarsis botekunam ñawpachkan warmaykikunata karu-karumanta apamunanpaq.+
Qurintawan qullqintawan kuskatam apamunqa,Diosnikipa sutinpaqmi apamunqa,Jehova Diospaqmi apamunqa, Israelpa chuya Diosninpaqmi apamunqa.
Payqa hatunchasunkim.+
10 Murallaykikunatapas huklaw llaqtayuqkunam ruwanqa,kamachiqkunapas runaykikunañam kanqa.+
Ñuqaqa piñakuyniypim castigarqayki,ichaqa allin ruwaq kasqayraykum llakipayasqayki.+
11 Punkuykikunaqa haykapipas kichasqam kanqa.+
Tutapas punchawpas kichasqam kanqa.
Nacionkuna tukuy imanta apamusunaykipaqmi kichasqa kanqa,kamachiqkunam puntata apamusunki.+
12 Mana servisuqniki nacionqa chinkanqam,runayki kayta mana munaq llaqtaqa chinkanqam, nacionkunaqa qalaypaqmi chinkanqa.+
13 Libanopi allinnin kaqkunatam qanman apamunqaku,+cipres sachakunata, fresno sachakunata hinaspa pino sachakunata. Llapallantam qanman apamunqaku.+
Wasiy sumaq kananpaqmi apamunqaku,sarupakunay sitiotam ñuqaqa hatunchasaq.+
14 Ñakarichisuqnikikunapa churinkunapas qanman hamuspanmi ñawpaqnikipi qunqurakunqa.
Mana respetasuqnikikunam ñawpaqnikipi qunqurakunqa.
Paykunaqa llapallankum Jehova Diospa llaqtanwanña sutichasunki.
Israelpa chuya Diosninpa Sion llaqtanwanñam sutichasunki.+
15 Saqisqa kaptikipas, chiqnisqa kaptikipas hinaspa kasqayki ukunta mana puriptinkupas+wiñaypaq hatunchasqa kanaykipaqmi tukuyta ruwasaq,wiñaypaq ancha kusikusqa kanaykipaqmi tukuyta ruwasaq.+
16 Imaynam mamapas wawanta ñuñun,chaynam nacionkunapas chaynataq kamachiqkunapas imapas pisipusuqnikita qusunki.+
Qamqa chaynapim yachanki ñuqa Jehova Diosqa yanapaqniki kasqaytahinaspa Jacobpa atiyniyuq Diosninqa librasuqniki* kasqayta.+
17 Broncepa rantinpim qurita apamusaq,fierropa rantinpim qullqita apamusaq,kullupa rantinpim bronceta apamusaq,rumipa rantinpim fierrota apamusaq.
Hawkayaytam umalliqkunata hina qampaq churasaq.
Allin ruwaytam qanmanta nanachikuqkunata hina churasaq.+
18 Mana allin ruwaymantaqa manañam uyarikunqañachu allpaykipiqa.
Chinkachiymantawan tuñichiymantaqa manañam uyarikunqañachu allpayki ukupiqa.+
Murallaykikunatam sutichanki Waqaychaywan,+ punkuykikunatam sutichanki Hatunchaywan.
19 Punchawqa manam intiñachu achkisunki,tutanpas manam killañachu kanchasunki.
Jehova Diosmi wiñaypaq kanchasuqnikiqa kanqa.+
Diosnikim sumaq kaynikiqa kanqa.+
20 Intikiqa manañam siqaykunqañachu,killaykipas manañam wañunqañachu.
Jehova Diosmi qamtaqa wiñaypaq kanchasunki,+llakikikunapas tukunqam.+
21 Llaqtaykipi runaykikunaqa allin ruwaqñam kanqaku.
Paykunam kay allpapiqa wiñaypaq yachanqaku.
Paykunaqa plantasqay ikllim* kanku, makiywan ruwasqaymi paykunaqa kanku,+hatunchasqa kanaypaq ruwasqaymi kanku.+
22 Aschalla kaqmi waranqaman miranqa,mana kaqpaq hapisqankuqa atiyniyuq nacionmi kanqa.
Ñuqa Jehova Diosmi chaytaqa tiempollanpi ruwasaq”.
Willakuykuna
^ Utaq: “Olibanotam”.
^ Utaq: “Tiyaqkunaqa”.
^ Utaq: “Kaqmanta rantisuqniki”.
^ Utaq: “Chikllim”.
