Jeremias 23:1-40
23 Jehova Diosmi nin: “¡Imaynaraq kanqaku pastoypi kaq ovejaykunata chinkachiq michiqkunaqa! ¡Imaynaraq kanqaku ovejaykunata chiqichiq michiqkunaqa!”, nispa.+
2 Runankunata michiqkunamantam Israelpa Jehova Diosninqa nin: “Qamkunam ovejaykunataqa chiqirachinkichik, tukuy hinastinmanmi chiqirachinkichik, manam allintachu michirqankichik”, nispa.+
Jehova Diosqa ninraqmi: “Kay mana allinkunata ruwasqaykichikraykum castigasqaykichik”, nispa.
3 “Ñuqam puchuq ovejaykunataqa maymi chiqichisqaymanta+ huñumuspay pastonkuman kutichimusaq,+ hinaptinmi miraspanku achkallay-achka kanqaku.+
4 Paykunata michinanpaqmi allin michiqkunataña churasaq,+ manañam manchakuymantaqa kanqakuchu, manam ni hukpas chinkanqachu”, ñuqa Jehova Diosmi chaynata nini.
5 Jehova Diosmi nin: “Hamuchkanmi punchawkuna Davidmanta allin iklli* ikllimunanpaq*.+ Huk reymi kamachinqa,+ chay reyqa yachaywanmi kamachinqa, hinaspapas allin ruwayman hina kamachispanmi kay allpa pachapi allin kaqta ruwanqa.+
6 Chay punchawkunapim Juda llaqtaqa yanapasqa kanqa,+ Israel runakunaqa hawkañam kawsakunqaku,+ paykunaqa sutichakunqaku ‘Jehova Diosmi allin kaqta ruwaykapuwaqninchikqa’ nispañam”, nispa.+
7 Jehova Diosmi nin: “Hamuchkanmi punchawkuna ‘¡Israel runakunata Egipto allpamanta hurqumuqpa sutinpiyá, Jehova Diospa sutinpiyá!’ nispa manaña ninaykichikpaq.+
8 Qamkunaqa chayta ninaykichikmantaqa kaynatañam ninkichik: ‘Jehova Diosqa kawsachkanmi, payqa Israel runakunatam norte law allpamanta kutirachimun, chiqichisqan runakunatam tukuy hinastinmanta kutirachimun’, nispa. Hinaptinmi paykunaqa allpankupiña yachanqaku*”, nispa.+
9 Willakuqkunamantañataqmi*
sunquy nanan.
Tulluykunam katkatatan.
Sinka hinam kachkani,vino tomayllapi kaq runa hinam kachkani,chaynaqa kachkani Jehova Diosraykum hinaspa nisqankuna chuya kasqanraykum.
10 Kay allpaqa hukwan-hukwan kakuqkunapa kananñam rikurirun,+kay allpaqa ñakasqa kasqanraykum llakisqa kachkan,+chunniqpi pastokunapas lliwmi chakirun.+
Kaypiqa mana allinllatam ruwanku, atiyniyuq runakunapas munasqankutam ruwanku.
11 Jehova Diosmi nin: “Willakuqwan sacerdotepas millakuypaqñam* rikurirunku.+
Wasiypipunim mana allinta ruwanku”, nispa.+
12 Jehova Diosmi nin: “Chayraykum paykunapa ñanninkuqa lluchka kanqa, tutayaymi kanqa,+tanqaykuptinkum wichinqaku.
Ñuqaqa akllasqay watapim paykunamanqañakariyta kacharimusaq”, nispa.
13 “Samaria+ llaqtamanta kaq willakuqkunapa millakuypaq ruwasqantam qawarqani.
Baal taytachamantam willakunku,Israel runaykunatam pantachinku.
14 Jerusalen llaqtamanta kaq willakuqkunapa mana allin ruwasqantam qawarqani.
Paykunaqa hukwanmi pierdekunku*,+ llullakuyllapim kanku,+mana allin ruwaqkunamanmi sayapakunku,mana allin ruwasqankumantaqa manam wanakunkuchu.
Ñuqapaqqa llapallankum Sodoma llaqtayuq runakuna hina kanku,+llapallankum Gomorra llaqtayuq runakuna hina kanku”.+
15 Chayraykum angelkunata kamachiq Jehova Diosqa willakuqkunamanta nin:
“Kay willakuqkunamanqa ajenjotam mikuchisaq,venenoyuq yakutam wañunankupaq qusaq.+
Jerusalen llaqtamanta willakuqkunaqa pantay yachachikuytam llaqtaman chiqirachinku”, nispa.
16 Angelkunata kamachiq Jehova Diosmi nin:
“Willakuqkunapa nisusqaykichiktaqa amayá uyariychikchu.+
Paykunaqa pantayman wichinaykichiktam munachkanku.
‘Diosmi kaytaqa qawachiwarqaku’ nisqankuqa yanqam,+chayqa manam Jehova Diosmantachu.+
17 Mana respetawaqniykunatam sapa kutilla ninku:
‘Jehova Diosmi nin: “Hawkam kankichik”’, nispa.+
Munasqankuta ruwaqkunamanmi ninku:
‘Manam ima sasachakuypas chayamusunkichikchu’, nispa.+
18 ¿Pitaq Jehova Diospa ancha kuyasqan karqa nisqankunata uyarinanpaq?
¿Pitaq nisqankunata sumaqta uyarirqa?
19 Jehova Diospa piñakuyninqa llumpa-llumpay wayra hinam hamunqa,muyuq wayra hinam mana allin runakunapa hawanman chayamunqa.+
20 Imam munasqanta ruwanankamam hinaspa tantiasqanta ruwanankamamJehova Diospa piñakuyninqa hinalla kanqa.
Tukupay punchawkunapim kaymantaqa sumaqta yachankichik.
21 Ñuqaqa manam kacharqanichu willakuqkunataqa, kikillankum kallparqaku.
Ñuqaqa manam rimarqanichu paykunawanqa, ichaqa paykunam willakuyta qallaykurqaku.+
22 Ñuqapa ancha kuyasqay kaspankum ichaqanisqaykunata runaykuna kasukunankupaq yanapanmanku karqa,hinaptinqa mana allin ñanninkutawan mana allin ruwayninkutam saqinmanku karqa”, nispa.+
23 Ñuqaqa Diosmi kani qamkunapa hichpaykichikpi kaspaypas utaq qamkunamanta karupi kaspaypas. Ñuqa Jehova Diosmi chaynata nini.
24 Jehova Diosmi nin: “¿Yaqachu pipas ñuqamanta pakakuyta atinman?”, nispa.+
Jehova Diosmi nin: “Hanaq pachawan allpa pachaqa ñuqapa ñawillaypim kachkan”, nispa.+
25 “Sutiypi llullallata willakuqkunam nichkanku: ‘¡Sueñokurunim, sueñokurunim!’, nispanku.+
26 ¿Haykapikamataq kay willakuqkunaqa llullallata willakunqaku? Paykunaqa sunqunkupi llullallatam willakunku.+
27 Runaykuna sutiyta qunqanankupaqmi sueñoyninkuta willanakunku, Baal taytacharaykum taytankupas sutiyta qunqarurqaku.+
28 Ñuqamanta willakuqqa sueñokusqantayá willakuchun, nisqaykunata uyariqyá ichaqa imam kaqta willakuchun”.
Jehova Diosmi nin: “¿Chaynallachu trigowan pajaqa?”, nispa.
29 Jehova Diosmi nin: “¿Manachu ñuqapa nisqaykunaqa nina hina?+ ¿Manachu ñuqapa nisqaykunaqa rumita pakiq comba hina?”, nispa.+
30 Jehova Diosmi nin: “Nisqaykunata willakuqkuna suwanakusqanraykum kaypi kachkani”, nispa.+
31 Jehova Diosmi nin: “‘¡Paymi nin!’+ nispa willakuqkuna nisqankuraykum kaypi kachkani paykunapa contranpi”, nispa.
32 Jehova Diosmi nin: “Willakuqkuna sueñoyninkuta willakuspanku runaykunata pantachisqankuraykum hinaspa hatuntukuspa rimasqankuraykum kaypi kachkani”, nispa.+
Jehova Diosmi nin: “Ñuqaqa paykunataqa manam kacharqanichu, manataqmi kamachirqanichu, paykunaqa manam runakunapa allinninpaqqa imatapas ruwanqakuchu”, nispa.+
33 “Hukkaqnin willakuq, hukkaqnin sacerdote hinaspa llaqtapi hukkaqnin runa, ‘¿imataq Jehova Diosmanta hamuq llasaq qipiqa?’ nispa tapusuptikiqa kaynatam ninki ‘Jehova Diosmi nin: “¡Qamkunam kankichik chay llasaq qipiqa! Chayraykum qamkunataqa saqisqaykichik”’, nispa.+
34 Hukkaqnin willakuq, hukkaqnin sacerdote hinaspa llaqtapi hukkaqnin runa ‘¡kayqa Jehova Diosmanta hamuq llasaq qipim!’ niptinqa, chay runatawan wasinpi kaqkunatam castigasaq.
35 Qamkunaqa llapallaykichikmi runamasikichikkunamanwan wawqikichikkunaman nichkankichik: ‘¿Yaqachu Jehova Diosqa imallatapas nirqa? ¿Imallatapas nirqachu Jehova Diosqa?’, nispa.
36 Amaña niychikñachu ‘Jehova Diosmanta hamuq llasaq qipi’ nispaqa, llasaq qipi hinaqa sapakamapa rimasqaykichikmi, qamkunaqa kawsaq Diospa nisqanman hinaqa manam nirqankichikchu, angelkunata kamachiq Jehova Diosninchikpa nisqanman hinaqa manam nirqankichikchu.
37 Willakuqmanmi ninki: ‘¿Yaqachu Jehova Diosqa imallatapas nirqa? ¿Imallatapas nirqachu Jehova Diosqa?
38 Jehova Diosmi nin: “‘Kayqa Jehova Diosmanta hamuq llasaq qipim’ nispaqa amaña niychikñachu nichkaptiy, ‘Jehova Diosmanta hamuq willakuyqa llasaq qipi hinam’ nispa hinalla kuti-kutirispa niptikichikqa hinaspa ‘“kayqa Jehova Diosmanta hamuq llasaq qipim” nispa hinalla kuti-kutirispa niptikichikqa’
39 huqariykuspam qayllaymanta karuman wikapasqaykichik. Qamkunamanwan ñawpaq abueloykichikkunaman qusqay llaqtatapas qamkunatawan kuskatam wikapasaq.
40 Pinqaymanmi churasqaykichik, mana allin qawasqam kankichik, chaynam wiñaypaq kankichik”’”, nispa.+
Willakuykuna
^ Utaq: “Chiklli”.
^ Utaq: “Herencia chaskiq rikurimunanpaq”.
^ Utaq: “Tiyanqaku”.
^ Utaq: “Profetakunamantañataqmi”.
^ Utaq: “Diosta qipanchaqñam”.
^ Utaq: “Waqllikunku”.
