Jeremias 35:1-19
-
Recabpa ayllunkuna kasukusqanmanta (1-19)
35 Josiaspa churin Jeoyakim+ Juda nacionta kamachichkaptinmi Jehova Diosqa Jeremiasta rimapayaspan nirqa:
2 “Recabpa+ ayllunta watukuq rispaykiyá paykunawan rimamuy, hinaspayá ñuqa Jehova Diospa wasiypi huknin cuartoman pusaspayki vinota qumuy”, nispa.
3 Chaymi pusamurqani Jeremiaspa churin Jaazaniasta, wawqinkunata, churinkunata hinaspa Recabpa llapallan ayllunkunata. Jeremiasqa karqa Habaziniaspa churinmi.
4 Paykunatam Jehova Diospa wasinman pusarqani, pusarqaniqa Hananpa churinkunapa mikunan cuartomanmi, Hananqa karqa Igdaliaspa churinmi hinaspa Diosta serviq runam. Chay cuartoqa karqa kamachiqkunapa mikunan cuartopa waqtanpim hinaspa Salumpa churinpa mikunan cuartopa altusninpim, Salumqa karqa punkuta cuidaqmi.
5 Chaymantam Recabpa ayllunkunapa ñawpaqninman vaso hunta vinokunata tiyaykachispay nirqani: “Vinota tomaychik”, nispa.
6 Paykunam ichaqa nirqaku: “Ñuqaykuqa manam vinotaqa tomasaqkuchu, ñawpaq abueloyku Recabpa churin Jeonadabmi*+ niwarqaku: ‘Amam vinotaqa tomankichikchu qamkunapas nitaq churikichikpas.
7 Amam wasikunataqa ruwankichikchu, amam mugutapas tarpunkichikchu, amam uvastapas plantankichikchu nitaq uvas huertaykichikpas kanqachu, aswanqa carpakunallapiyá yachaychik*, chaynapi runapa allpanpi unay kawsakunaykichikpaq’, nispa.
8 Chaymi ñuqaykuqa ñawpaq abueloyku Recabpa churin Jeonadabpa niwasqankuta kasukuchkaniku, paypa tukuy ima kamachiwasqankutam kasukuchkaniku. Ñuqaykuqa manam vinotaqa tomanikuchu, manataqmi tomanchu warmiykupas nitaq churiykupas.
9 Manataqmi wasitapas ruwanikuchu chaypi yachanaykupaqqa, manataqmi kanchu uvas huertaykupas, chakraykupas nitaq tarpukusqaykupas.
10 Ñawpaq abueloyku Jeonadabpa* lliw kamachiwasqankuta kasukuspaykum carpakunallapi yachachkaniku.
11 Ichaqa Babiloniata kamachiq Nabucodonosor kay nacionwan peleaq hamuptinmi+ nirqaniku: ‘Caldea soldadokunamantawan Siria soldadokunamantayá Jerusalenman ayqikusun’, nispa. Chaymi kunanqa Jerusalenpi yachachkaniku”, nispa.
12 Jehova Diosmi Jeremiasta rimapayarqa:
13 “Angelkunata kamachiq Jehova Diosmi nin, Israelpa Diosninmi nin: ‘Juda runakunatawan Jerusalen runakunatayá nimuy: “¿Manachu qamkunataqa chunkay-chunkayta nirqaykichik nisqaykunata kasukunaykichikpaq?+ Ñuqa Jehova Diosmi chaynata nini.
14 Recabpa churin Jeonadabmi mirayninkunata kamachirqa vinota ama tomanankupaq, hinaptinmi mirayninkunaqa kamachisqanman hina vinotaqa mana kunankama tomankuchu, chaynatam ñawpaq abuelonkupa kamachisqanta kasukurqaku.+ Qamkunam ichaqa kuti-kutirispa rimapayachkaptiypas mana kasuwarqankichikchu.+
15 Willakuqniykunatapas* achka kutikamam kachamurqani+ kaynata nisunaykichikpaq: ‘¡Ama hina kaspayá mana allin ruwasqaykichikta saqispaykichik+ allin kaqtaña ruwaychik! Amayá taytacha-mamachakunataqa yupaychaychikchu, kasukuspaykichikqa ñawpaq abueloykichikkunamanwan qamkunaman qusqay allpapim hinalla yachankichik’, nispa.+ Qamkunam ichaqa mana kasuwarqankichikchu nitaq uyariwarqankichikchu.
16 Recabpa churin Jeonadabpa mirayninkunaqa ñawpaq abuelonkupa kamachisqantam kasukunku,+ qamkunam ichaqa mana kasuwankichikchu”’”, nispa.
17 Chaymi angelkunata kamachiq Jehova Dios nin, Israelpa Diosninmi nin: ‘Nisqayman hinam Juda runakunamanwan Jerusalen runakunaman ñakariyta kacharimusaq,+ paykunataqa rimapayarqanim ichaqa manam kasuwarqakuchu. Qayamurqanim ichaqa manam uyarimuwarqachu’, nispa.+
18 Jeremiasmi Recabpa ayllunkunata nirqa: “Angelkunata kamachiq Jehova Diosmi nin, Israelpa Diosninmi nin: ‘Qamkunaqa ñawpaq abueloykichik Jeonadabpa kamachisusqaykichiktam kasukurqankichik, qamkunaqa tukuy ima kamachisusqaykichiktam kunankama kasukuchkankichik.
19 Chaymi angelkunata kamachiq ñuqa Jehova Dios nini, Israelpa Diosninmi nini: “Recabpa churin Jeonadabpa* mirayninmantaqa kanqapunim ñuqata yupaychawaqniyqa”’”, nispa.
Willakuykuna
^ Hebreo rimaypiqa nichkan: “Jonadabmi”, nispam. “Jonadab” sutiqa “Jeonadab” sutimantam rikurirqa.
^ Utaq: “Tiyaychik”.
^ Hebreo rimaypiqa nichkan: “Jonadabpa”, nispam. “Jonadab” sutiqa “Jeonadab” sutimantam rikurirqa.
^ Utaq: “Profetaykunatapas”.
^ Hebreo rimaypiqa nichkan: “Jonadabpa”, nispam. “Jonadab” sutiqa “Jeonadab” sutimantam rikurirqa.
