Jeremias 7:1-34
7 Jehova Diosmi Jeremiasta rimapayarqa:
2 “Ñuqa Jehova Diospa wasiy punkupi sayaykuspaykiyá willakuy: ‘Juda runakuna, Jehova Diospa nisqankunatayá uyariychik, Jehova Diosta yupaychanankupaq punkunta yaykuq Juda runakuna, uyariychikyá.
3 Angelkunata kamachiq Jehova Diosmi nin, Israelpa Diosninmi nin: “Allintañayá kawsaychik, allintañayá imatapas ruwaychik, allinña kaptikichikqa hinalla kaypi yachanaykichikpaqmi* saqisqaykichik.+
4 Amayá yanqa rimaykunapiqa hapipakuychikchu, amataqyá niychikchu: ‘¡Kayqa Jehova Diospa wasinmi*, Jehova Diospa wasinmi, Jehova Diospa wasinmi!’, nispaqa.+
5 Allintaña kawsaptikichikqa, allintaña imatapas ruwaptikichikqa, runakunapa sasachakuyninta allin ruwayman hinaña allichaptikichikqa,+
6 huklaw llaqtayuqkunapaq, mana taytayuqkunapaq hinaspa viudakunapaq allin kaqtaña ruwaptikichikqa,+ mana huchayuqkunapa yawarninta kay allpapi manaña chaqchuptikichikqa chaynataq kikikichikpa mana allinnikichikpaq taytacha-mamachakunata manaña yupaychaptikichikqa+
7 kay allpapi hinalla kawsanaykichikpaqmi saqisqaykichik, kay allpataqa ñawpaq abueloykichikkunamanmi wiñaypaq qurqani”’”, nispa.
8 “Qamkunam ichaqa yanqa rimaykunapi hapipakunkichik...+ Chayqa mana valeqmi.
9 ¿Suwakuchkaspaykichikchu,+ wañuchichkaspaykichikchu, hukwan pierdekuchkaspaykichikchu*, llullakuchkaspaykichikchu,+ Baal taytachapaq animalkunata kañapuchkaspaykichikchu,+ mana riqsisqaykichik taytacha-mamachakunata yupaychachkaspaykichikchu
10 hinaspa tukuy kay millakuypaq kaqkunata ruwachkaspaykichikchu sutiyta apaq wasiyman hamuspaykichik yanapasqa kaytaraq munankichik?
11 ¿Suwakunapa machayninñachu rikurirun sutiyta apaq wasiyqa?+ Kikiypunim qawarqani”, Jehova Diosmi chaynata nin.
12 “‘Silo llaqtapi+ kasqaymanyá riychik, sutiyta qallariypi churasqay sitiomanyá riychik,+ hinaspayá qawamuychik Israel runaykunapa huchanrayku ima ruwasqayta.+
13 Qamkunam ichaqa hinalla tukuy kaykunata ruwarqankichik, kuti-kutirispa rimapayaptiypas manam kasuwarqankichikchu.+ Qamkunata qayamuptiypas qamkunaqa manam rimarirqankichikchu,+ Jehova Diosmi chaynata nin.
14 Hapipakusqaykichik wasitapas+ chaynataq sutiyta apaq wasitapas Silo llaqtata hinam ruwasaq.+ Qamkunaman qusqay allpatapas chaynataq ñawpaq abueloykichikkunaman qusqay allpatapas Silo llaqtata hinam ruwasaq.+
15 Efrainpa mirayninkunata hinam, wawqikichikkunata hinam manaña qawarisqaykichikñachu’.+
16 Qamqa amayá mañakamuwaychu kay runakunapaqqa. Amayá qayakamuwaychu, amayá mañakamuwaychu paykunaraykuqa,+ ñuqaqa manam uyarimusqaykichu.+
17 ¿Manachu qawanki Judapi kaq llaqtakunapi imam ruwasqankuta? ¿Manachu qawanki Jerusalen llaqtapi imam ruwasqankuta?
18 Warmankum yantata pallan, taytankum ninata ratachin, mamankum mamachankupaq* tantata ruwananpaq harinata chapun.+ Paykunaqa piñachiwanankuraykum taytacha-mamachakunapaq vinota tallinku.+
19 Ñuqa Jehova Diosmi nini: ‘¿Ñuqatachu mana allinta ruwawachkanku? ¿Icha kikillanku pinqaypi kanankupaqchu mana allinta ruwachkanku?’, nispa.+
20 Llapallan kamachiq Jehova Diosqa chayraykum nichkan: ‘Llumpay piñakuyniytam kay allpaman kacharimusaq.+ Runakunamanmi kacharimusaq, animalkunamanmi kacharimusaq, sachakunamanmi kacharimusaq, kawsaykunamanmi kacharimusaq, piñakuyniyqa mana tanispam hinalla rawranqa’, nispa.+
21 Angelkunata kamachiq Jehova Diosmi nin, Israelpa Diosninmi nin: ‘Animalkuna kañasqaykichiktawan animalkuna nakasqaykichiktayá apakuychik, aychantapas mikuychikyá.+
22 Ñuqaqa ñawpaq abueloykichikkunata Egiptomanta hurqumusqay punchawpiqa manam imatapas nirqanichu, animalkunata kañanaykichikmantawan animalkunata nakanaykichikmantaqa.+
23 Paykunataqa nirqani: “Nisqaykunata kasukuptikichikqa ñuqam Diosnikichik kasaq, qamkunañataqmi runaykuna kankichik.+ Allin kanaykichikpaqqa nisqay ñannillantam haykapipas purinaykichik”’, nispallam.+
24 Paykunam ichaqa mana kasukurqakuchu, manam uyarikurqakuchu,+ paykunaqa munasqankutam ruwarqaku, rumi sunqu rikuriruspankum munasqankuta ruwarqaku.+ Ñawpaqman rinankumantaqa qipamanmi kutirqaku.
25 Ñawpaq abueloykichikkunaqa chaynam karqaku Egiptomanta lluqsisqanku punchawmanta kunan punchawkama.+ Ñuqaqa chayraykum llapallaykichikman willakuqkunata* kachamurqaykichik, sapa punchawmi kachamurqaykichik, kuti-kutirispam kachamurqaykichik.+
26 Qamkunam ichaqa mana uyariwarqankichikchu nitaq kasuwarqankichikchu,+ qamkunaqa rumi sunqum rikurirurqankichik. ¡Ñawpaq abueloykichikkunamantapas aswan rumi sunquraqmi rikurirurqankichik!
27 Tukuy kaykunata niptikipas+ paykunaqa manam uyarisunkichu, qayaptikipas paykunaqa manam rimarinqakuchu.
28 Hinaptinmi qamqa ninayki: ‘Kay nacionmi Jehova Diosninpa nisqanta mana kasukuq nacionqa, rimapayasqanta mana chaskikuq nacionqa. Allin ruwayqa chinkarunmi, chaymantaqa manam rimayllapas-rimankuñachu’, nispa.+
29 Chukchaykita rutukuspaykiyá wikapay, mana imapa kanan muqupiyá aya takita takiy, piñarachisqanraykum kay miraykunataqa Jehova Diosqa manaña qawarinqañachu, qalaypaqmi saqinqa.
30 Jehova Diosmi nin: ‘Juda runakunaqa chiqnisqay kaqtam ruwarunku, sutiy apaq wasiyta millakuypaqta ruwanankupaqmi taytacha-mamachakunata churarunku.+
31 Hinon wayqupi* kaq Tofetpim patakunata ruwarunku+ churi-wawankuta kañanankupaq,+ chaytaqa manam ñuqaqa kamachirqanichu, manam piensayllapas-piensarqanichu’, nispa.+
32 Jehova Diosmi nin: ‘Hamuchkanmi punchawkuna, chay punchawkunapiqa kay sitiotaqa manañam sutichankichikñachu Tofetwanqa nitaq Hinon wayquwanqa, aswanqa sutichankichik Wañuchinakuypa kanan wayquwanñam. Tofetpiqa wañuqkunatañam pampankichik, manam maypas puchunqachu.+
33 Kay llaqtapi wañuq runakunataqa alton pawaqkunawan purun animalkunam mikunqa, manam pipas manchachinqachu.+
34 Juda law llaqtakunapiwan Jerusalenpiqa manañam kanqañachu kusikuymanta qapariyqa, manañam kanqañachu kusikuyqa, manañam casarakuq warmipawan casarakuq qaripa rimasqanpas uyarikunqañachu,+ kay llaqtaqa raqayllañam kanqa’”, nispa.+
Willakuykuna
^ Utaq: “Tiyanaykichikpaqmi”.
^ Utaq: “Templonmi”.
^ Utaq: “Waqllikuchkaspaykichikchu”.
^ Hebreo rimaypiqa nichkan: “Hanaq pacha reinapaq”, nispam. Kay mamachataqa Diosta qipanchaq Israel runakunam yupaycharqaku, yaqachusmi niqku wawayuq kanankupaq yanapasqanmanta.
^ Utaq: “Profetakunata”.
