Job 2:1-13
2 Huk kutipipas Jehova Diospa qayllanman angelkunapa*+ huñunakunanku punchawmi chayaramurqa, hinaptinmi satanaspas chayman rirqa Jehova Diospa qayllanpi kananpaq.+
2 Chaymi Jehova Diosqa satanasta nirqa: “¿Maymantataq hamuchkanki?”, nispa. Satanasñataqmi Jehova Diosta nirqa: “Allpa pachapi tukuy hinastinpi purimusqaymantam”, nispa.+
3 Chaymi Jehova Diosqa satanasta nirqa: “¿Rikumurqankichu yupaychawaqniy Jobta? Pay hinaqa manam pipas allpa pachapiqa kanchu. Payqa mana huchallikuqmi, allin kaqkunata ruwaqmi,+ ñuqata* manchakuwaqniymi hinaspa mana allin ruwaykunamanta karunchakuqmi. Yanqamanta wañurachinaypaq hikutawaptikipas+ payqa hinallam mana huchayuq kachkan”, nispa.+
4 Chaymi satanasqa Jehova Diosta nirqa: “Runaqa kikinpa allinllantam maskan. Runaqa vidanraykum tukuy ima kapuqninta qunman.
5 Sichu kunan kikintaña ñakarichinki hinaspa pasaypaqta unqurachinki, hinaptinqa uyaykipipunim ñakasunki”, nispa.+
6 Chaymi Jehova Diosqa satanasta nirqa: “Makikipim payqa kachkan, munasqaykitayá ruwaramuy. Ichaqa, ¡amam wañuchinkichu!”, nispa.
7 Hinaptinmi satanasqa Jehova Diospa qayllanmanta lluqsirqa, hinaspam Jobpa cuerponta pusllurachispan qiyayarachirqa+ chaki pampanmanta uma puyuqninkama.
8 Chaymi Jobqa uchpapi+ tiyaykuspan pakisqa kallanawan siksikullaq.
9 Warminpas nirqam: “¿Chaynaña kachkaspapas hinallachu mana huchallikuspa kachkanki? ¡Diosta ñakaspaykiyá wañuy!”, nispa.
10 Hinaptinmi Jobqa nirqa: “Mana yuyayniyuq warmikuna hinam qampas rimachkanki. Allin kaqkunata Diosmanta chaskichkaspaqa, ¿manachu mana allin kaqtapas chaskikuchwan?”, nispa.+ Chaynata rimasqanwanpas Jobqa manam huchallikurqachu.+
11 Chaymantam Jobpa riqsinakusqan kimsa runakuna tukuywan ñakarisqanta yacharuspanku llaqtankumanta watukuq rirqaku. Paykunam karqaku Teman llaqtayuq Elifaz,+ Sua+ llaqtayuq Bildad+ hinaspa Naamat llaqtayuq* Zofar.+ Rirqakuqa llakipayanankupaqmi hinaspa llakisqa sunqunta tiyaykachinankupaqmi.
12 Hinaspankum Jobtaqa karullamantaraq rikururqaku, ichaqa manam riqsirqakuchu. Chaymi qaparispa waqarqaku, pachankutapas llikikuspankum allpatapas altoman maqchirqaku, hinaptinmi umankuman wichimurqa.+
13 Hinaspam Jobta kimsanku tuta-punchaw tiyaysirqaku qanchis punchawpuni. Llumpay nanaywan Job kasqanta qawaspankum mana ima niytapas atirqakuchu.+
Willakuykuna
^ Utaq: “Diospa churinkunapa”.
^ Utaq: “Ñuqa Diosta”.
^ Kay llaqtakunapa sutinqa kanmantaqmi ayllukunapa sutinpas.
