Job 5:1-27
5 Elifazqa nirqataqmi: “¡Qayakuyá! ¿Yaqachu pipas uyariykusunkiman?
¿Mayqan angelpitaq* hapipakunki?
2 Mana yuyayniyuq runataqa chiqnikuq kayninmi wañuchin,upa runataqa hukpa kapuqninmanta chiqnikuq kayninmi wañuchin.
3 Rikurqanim mana yuyayniyuq runa apuyaqta,ichaqa qunqayllamantam tukuy iman chinkayta qallaykurqa.
4 Paypa churinkunaqa manam sasachakuymantaqa karupichu kanku,+paypa churinkunaqa juezpa qayllanpipas mana pipa yanapasqanmi ñakarichisqa kanku.
5 Cosechasqantapas yarqaymanta kaqkunam mikukurun,kichkapa chawpinpi kaqtapas pallapaspam mikukurun.
Tukuy imankunatapas hukkunam apakunku.
6 Ñakariyqa manam allpamantachu rikurimun,sasachakuykunapas manam pampamantachu wiñamun.
7 Imaynam ninapa chusyanpas altoman pawan,chaynam runapas ñakariypi kananpaq nacen.
8 Qam kaspayqa Diosmanmisasachakuyniykunata willakuyman,
9 payqa pipapas mana ruway atisqanta ruwaqmi,sumaqllaña tukuy ima ruwasqankunapas mana yupay atinam.
10 Paymi allpaman parachimun,paytaqmi chakrakunamanpas yakuta chayachin.
11 Payqa mana hatuntukuqkunatam hatunchaykun,paytaqmi hukmanyasqakunatapas yanapaykun.
12 Payqa mana allin ruway munaqkunapa tantiasqantam pantachin,chaynapi imapas ruwasqanku yanqa kananpaq.
13 Payqa yachaysapakunatam kikinkupa tuqllallanman wichiykachin,+chaynapi mana allin ruwaqkunapa tantiasqanta yanqacharunanpaq.
14 Hinaptinmi paykunaqa punchawpas tutayaypi hina tarikunku,chawpi punchawpas tutayaypi hinam purinku.
15 Diosqa runakunatam wañuymanta harkaykun,wakchakunatapas kallpasapakunamantam harkaykun.
16 Payqa hukmanyasqakunatam kallpanchaykun,mana allin ruwaqkunatam ichaqa upallachin.
17 ¡Mayna kusisqam pantasqanmanta Diospa rimapayaykusqan runaqa!
Chaynaqa, ¡amayá wischupakuychu pantasqaykimanta tukuy atiyniyuq Diospa imapas niykususqaykitaqa!
18 Payqa pitapas ñakarichispanqa kikillanmi llakipayaykun,imanaruspanpas kikillantaqmi hampiykun.
19 Payqa suqta sasachakuykunamantam harkaykusunki,qanchis kaqpas manam imanasunkichu.
20 Muchuy* tiempopim wañuymanta harkaykusunki,wañuchinakuy tiempopipas wañuymantam harkaykusunki.
21 Diosqa waqaychaykusunkim nanay simi runakunamantaqa,+ima sasachakuyña kaptinpas manam manchakunkichu.
22 Sasachakuyña utaq yarqayña chayamuptinpas qamqa asikunkim,manchakuypaq purun animalkunatapas manam manchakunkichu.
23 Tarpukunaykipaqqa chakraykipi rumikunapas manam sasachasunkichu*,manchakuypaq purun animalkunapas manam imanasunkichu.
24 Maymi yachasqaykipipas* hawkam kawsakunki,michinayki lawta qawarispapas animalnikitaqa lliwtam tarinki.
25 Churikikunapas achkallay-achkam kanqa,miraynikikunapas mana yupay atina qurakuna hinam achkallaña kanqa.
26 Qampaqa wañunaykikamam kallpaykipas mana pisinqachu,tiempollanpi huqarisqa gamillakuna hinam kanki.
27 Tukuy chaykunamantam chayna kasqanta allinta yacharuniku.
Uyarispaykiyá kasukuy”, nispa.
Willakuykuna
^ Hebreo rimaypiqa nichkan: “Chuya kaqkunapitaq”, nispam.
^ Utaq: “Yarqay”.
^ Utaq: “Harkasunkichu”.
^ Utaq: “Tiyasqaykipipas”.
