Josuey 20:1-9
-
Amparakuna llaqtakunamanta (1-9)
20 Chaymantam Josueyta Jehova Dios nirqa:
2 “Israelpa mirayninkunata niy: ‘Moisesman willasqayman hinayá amparakuna llaqtakunata+ akllaychik.
3 Chaynapi imatapas ruwachkaspa qunqaymanta runamasinta pipas wañurachiqqa chay llaqtaman ayqikunanpaq. Chay llaqtakunam amparakunaykichikpaq kanqa wañukuqpa ayllun wañuchisunaykichikpaq maskasuptikichikqa.+
4 Runamasinta wañuchiq runaqa chay hukkaqnin amparakuna llaqtamanmi ayqikunan,+ hinaspam llaqtapa punkunman+ chayaruspan chay llaqtapi punta apaqkunaman ima ruwarusqanmanta willakunan. Chaymantam paykunaqa chaskiykuspanku samananpaq huk hawaqta qunanku paykunawan yachananpaq*.
5 Wañuchisqan runapa ayllun wañuchinanpaq qatimuptinqa manam paymanqa runamasin wañuchiqtaqa qunankuchu, payqa manam chiqnispanchu nitaq llullantachu runamasintaqa wañurachirqa.+
6 Wañuchiq runaqa chay llaqtallapim yachanan ima ruwasqanmanta juezkuna*+ allichanankama. Hinaspam chay amparakuna llaqtapi qipanqa sacerdotekunata kamachiq+ wañukunankama. Chaymantañam runamasinta wañuchiqqa kutinqa maymanta ayqikamusqan llaqtaman chaynataq wasinmanpas’”, nispa.+
7 Chaynapim wakin llaqtakunata chaypaq sapaqcharqaku*. Sapaqchasqanku llaqtakunam karqa Neftaliy ayllupa urqunkunapi kaq Galilea lawpi Kedes llaqta,+ Efrain ayllupa urqunkunapi kaq Sichem* llaqta+ hinaspa Juda ayllupa urqunkunapi kaq Kiryat-arba+ utaq Hebron llaqta.
8 Akllarqakutaqmi Jerico llaqtapa inti qispimunanpi utaq Jordan mayu law chunniqpi Bezer llaqtatapas,+ chay llaqtaqa karqa Ruben ayllupa allpanpa kasqan urqu law pampapim. Chaymantapas akllarqakum Gad ayllupa allpanpi kaq Galaad lawpi Ramot llaqtata+ chaynataq Manases ayllupa+ allpanpi Basan lawpi Golan llaqtatapas.+
9 Chay llaqtakunatam akllarqaku Israelpa mirayninkunapaq chaynataq paykunawan yachaq huklaw llaqtayuqkunapaq. Chay llaqtakunam karqa pipas qunqaymanta runamasinta wañurachispan ayqikunanpaq.+ Chaynapi ima ruwasqanmanta juezkuna* allichanankama wañukuqpa ayllun mana wañurachinanpaq.+
Willakuykuna
^ Utaq: “Tiyananpaq”.
^ Hebreo rimaypiqa nichkan: “Huñunasqa runakunapa qayllanpi juezkunawan”, nispam.
^ Utaq: “Siquem”.
^ Utaq: “Chuyancharqaku”.
^ Utaq: “Huñunasqa juezkuna”.
