Josuey 23:1-16
23 Jehova Dios yanapaptinmi Israelpa mirayninkunaqa chiqniqnin runakunapa mana imanasqan hawkaña kawsakurqaku.+ Josueyqa yuyaqyaruspanmi wañukunanpaq hinaña kachkarqa.+
2 Paymi Israelpa lliw mirayninkunata, punta apaqkunata, kamachiqkunata, juezkunata hinaspa akllasqa runakunata+ huñurachispan+ nirqa: “Yuyaqyaruniñam, wañukunaypaq hinañam kachkani.
3 Kikikichikmi qawarqankichik qamkunarayku lliw llaqtakunata Jehova Diospa ima ruwasqanta, Jehova Diosmá qamkunapa rantikichikpi pelearqa.+
4 Ñuqam sorteaspay qurqaykichik+ yaykusqay llaqtakunapa allpanta,+ chayqa kachkan Jordan mayumanta intipa siqaykunan lawpi Hatun lamar qucha* lawkamam. Qurqaykichiktaqmi manaraq yaykusqa llaqtakunapa allpantapas.+
5 Jehova Diosmi qamkunapa qayllaykichikmanta chay llaqtakunapi yachaq* runakunata qarqurqa,+ qamkunarayku qarquptinmá Jehova Diospa nisusqaykichikman hina chay allpapi yachachkankichik.+
6 Kunanqa mana manchakuqmi kanaykichik, chaynapi Moisespa qillqasqan kamachikuykunata+ lliwta kasukunaykichikpaq. Amamá alliqmanpas* nitaq ichuqmanpas* rakikunkichikchu.+
7 Amataqmá hukllawakunkichikchu qamkuna ukupi huklaw llaqtayuq runakunawanqa.+ Amataqmi taytacha-mamachankupa sutintaqa rimayllapas-rimankichikchu+ nitaq sutinpiqa imatapas ninkichikchu, amataqmi yupaychankichikchu nitaq ñawpaqninpiqa qunqurakunkichikchu.+
8 Aswanqa kunan punchawkama hinam Jehova Diosman sunqu haykapipas kanaykichik.+
9 Jehova Diosmi qamkunapa qayllaykichikmanta hatun llaqtayuq runakunata qarqunqa.+ Manamá pipas kunan punchawkamaqa qamkunawan peleaytaqa atirqachu.+
10 Nisusqaykichikman hinam+ Jehova Diosqa qamkunarayku peleanqa.+ Chaymi qamkunamanta huknillaykichik 1.000 runakunata qatikachanqa.+
11 Chaynaqa, Jehova Diosta kuyaspayá+ imayna kawsasqaykichikta tukuy tiempo qawakuychik.+
12 Sichum mana kasukuspa qamkuna ukupi yachaq huklaw llaqtayuq runakunawan hukllawakuspa+ paykunawan casarakuptikichikqa,+
13 manañam Jehova Diosqa qamkuna ukupi runakunataqa qarqunqañachu.+ Aswanqa paykunam qamkunapaq kanqa tuqlla hina, waqtasuqnikichik azote hina+ chaynataq ñawikichikpi kichka hina. Chaynaqa kanqaku Jehova Diospa qususqaykichik allin allpamanta chinkanaykichikkamam.
14 Ñuqaqa wañukunaypaq hinañam kachkani, qamkunaqa allintapunim tukuy sunquykichikwan hinaspa tukuy vidaykichikwan yachankichik Jehova Diospa nisqan sumaq willakuykunaqa nisqanman hina cumplikusqanmanta. Llapallanmi qamkunapa allinnikichikpaq Diospa nisqanman hina cumplikurqa. Manamá mayqanninpas yanqaqa karqachu.+
15 Imaynam Jehova Diosqa sumaq willakuykuna nisusqaykichikta qamkunapaq cumplirqa,+ chaynam sasachakuykuna kananmanta nisqantapas Jehova Diosqa cumplinqa. Jehova Diosqa qususqaykichik allin allpamantapas chinkarachisunkichikmi.+
16 Jehova Dioswan contrato* ruwasqaykichikta mana kasukuspa taytacha-mamachakunata yupaychaptikichikqa Jehova Diosmi qamkunapaq llumpayta piñakunqa,+ hinaptinmi qususqaykichik allin allpamantapas chaylla chinkarunkichik”, nispa.+
Willakuykuna
^ Kayqa Mediterraneo sutiyuq lamar qucham.
^ Utaq: “Tiyaq”.
^ Utaq: “Pañamanpas”.
^ Utaq: “Lluqimanpas”.
^ Utaq: “Pacto”. Qaway kay palabrapa ima ninan kasqanta.
