Judas 1:1-25
1 Jesucristopa serviqnin hinaspa Santiagopa+ wawqin ñuqa Judasmi qillqamuchkaykichik Dios taytanchikpa qayasqan+ hinaspa kuyasqan runakunaman, qamkunaqa Jesucristowan huklla kanaykichikpaqmi waqaychasqa karqankichik.+
2 Diostam mañakuchkani astawan llakipayasunaykichikpaq, kuyasunaykichikpaq hinaspa hawkayayninta qusunaykichikpaq.
3 Kuyasqallaykuna, ñawpaqtaqa ancha-anchatam munarqani Dios imayna salvawananchikmanta qillqamuyta,+ kunanmi ichaqa qillqamuchkaykichik iñiynikichikrayku hinalla kallpanchakunaykichikpaq,+ chay iñiytaqa runankunamanmi huk kutillata wiña-wiñaypaq Diosqa qurqa.
4 Qillqamuchkaykichikqa qamkuna ukuman mana musyachikuspalla wakin runakuna yaykuramusqanraykum, paykunamantaqa Diospa qillqanmi ñawpaqmantaraq willakurqaña juzgasqa kanankumanta, paykunaqa kanku mana allin ruwaq runakunam, Diosninchikpa ancha kuyakuq* kasqanta yachaspankum mana pinqakuspa mana allinkunata ruwanku*,+ qipanchankutaqmi sapallan dueñonchik hinaspa señorninchik Jesucristotapas.+
5 Allinta yachachkaptikichikpas kaykunatam yuyarichiyta munachkani: Jehova* Diosqa runankunata Egipto nacionmanta salvaykuspanpas+ paypi mana hapipakuqkunataqa wañurachirqam.+
6 Chaymantapas Diosqa wakin angelkunatam hatun juicio punchawpaq yanay-yanay tutayaypi wiñaypaq cadenarun,+ chay angelkunaqa imam ruwanankuta mana kaqpaqpas hapispankum* yachananku* sitiota saqirurqaku.+
7 Chaynallataqmi Sodoma llaqtapi, Gomorra llaqtapi hinaspa hichpan llaqtakunapi runakunapas huchapakuyllapiña* karqaku, hinaspapas aychapa munasqankunawan aysachikuspankum mana ruwana kaqkunata ruwarqaku.+ Chay llaqtakunaqa ninawanmi wiñaypaq chinkachisqa karqa, chaynapi chaykunata yachaspa ñuqanchikpas chay llaqtakunapi runakuna hina mana kananchikpaq.+
8 Chayna kaptinpas mana musyachikuspalla yaykuramuq chay runakunaqa yuyayninkupi mana allinkunallata piensaspankum qacha ruwaykunata ruwanku, kamachiqkunatapas manam respetankuchu, chaynallataqmi Diospa hatunchasqan runakunamantapas mana allinkunata rimanku.+
9 Angelkunata+ kamachiq Miguelmi+ ichaqa Moisespa cuerponmanta diablowan atipanakuspan+ mana juzgarqachu nitaq kamirqachu,+ aswanqa kaynallatam nirqa: “Jehova Diosyá qamtaqa qaqchasunki”, nispan.+
10 Chay runakunaqa mana entiendesqanku kaqkunamantam mana allinkunata rimachkanku.+ Paykunaqa animalkuna hina mana piensaq kaspankum tukuy imatapas animalkuna hina ruwanku,+ chaymi aswan mana allinraq kanku.
11 ¡Imapiraq rikukunqaku! Paykunaqa Cainpa ruwasqantam qatipakuchkanku,+ Balaam+ hinam pagonta chaskikuyta munaspanku Balaampa pantaruspan ruwasqanman hina ruwachkanku. Hinaspam Corey+ hina hukkunapa contranpi rimasqankurayku wañurunku.+
12 Chay runakunaqa iñiqkunata kuyaspaykichik convidokuna ruwasqaykichikpim qamkunawan kachkanku, ichaqa paykunaqa kanku yaku ukupi mana rikuylla rumikuna hinam,+ kikillankuta cuidakuspa mana pinqakuq michiqkunam,+ kayman-wakman wayrapa apaykachasqan mana paramuq puyukuna hinam+ chaynataq sapinmanta pilasqa, pasaypaq wañusqa hinaspa tiemponpi mana ruruq sachakuna hinam.
13 Paykunaqa kanku millakuypaq kaqkunata wischumuq lamar quchapa olankuna hinam, chay millakuypaq kaqkunaqa kikillanku pinqaypi kanankupaqmi.+ Chaymantapas kanku maymi rinanta mana riq lucerokuna hinam, paykunaqa yanay-yanay tutayaypim wiñaypaq kanqaku.+
14 Paykunamantam Adanpa qanchis kaq miraynin Enocpas+ ñawpaqmantaraq kaynata willakurqa: “Qawaychik, Jehova* Diosmi hamurqa chunka wara-waranqantin chuya angelninkunawan.+
15 Payqa hamurqa tukuy mana allinkunata ruwaq hinaspa contranpi mana allinkunata rimaq llapallan runakunata juzgananpaqmi+ hinaspa mana respetaqnin llapallan huchasapakunapa huchanta qawachinanpaqmi”, nispa.+
16 Paykunaqa rimapakuspankum+ imayna tarikusqankumanta ñakakunku, kikillankupa munasqankuman hinam imatapas ruwanku,+ imamantañapas alabakunkum, hinaspam imatapas chaskikunankurayku hukkunata alabanku.+
17 Kuyasqallaykuna, qamkunaqa yuyariychikyá señorninchik Jesucristopa apostolninkunapa* ñawpaqmantaraq willakusqankuta,
18 paykunaqa kaynatam nisurqankichik: “Tukupay tiempokunapiqa kanqam burlakuqkuna, paykunam ruwanqaku mana allin ruway munasqallankuta”, nispa.+
19 Burlakuq runakunaqa rakinakuykunatam hatarichinku,+ paykunaqa kanku animalkuna hina ruwaqkunam, paykunapiqa manam kanchu Diospa atiyninpas.
20 Kuyasqallaykuna, Diospi ancha-anchata hapipakuspaykichikyá kikikichikmanta kallpanchasqa kaychik*, hinaspapas Diospa atiyninpa* yanapakuyninwanyá payta mañakuychik,+
21 chaynapi Diosninchik hinalla kuyasunaykichikpaq,+ chaynayá kaychik señorninchik Jesucristopa llakipayakuyninta suyaspa, chaynata suyaspaykichikqa wiñay kawsaytam chaskinkichik.+
22 Chaynallataqyá iskayrayaqkunatapas+ llakipayaychik,+
23 chay iskayrayaqkunataqa salvaykuychikyá+ wañuymanta* libraykuspa. Ichaqa qachachakurunaykichikmanta cuidakuspayá hukkunatapas hinalla llakipayaychik, qacha pachata millakuchkaq hinayá chiqniychik mana allin ruwayninkutaqa.+
24 Diosqa mana urmanaykichikpaqmi yanapasunkichik, kancharichkaq qayllanpim mana huchayuqta ruwaykusunkichik,+ hinaspapas anchatam kusichisunkichik,
25 payqa salvaqninchik sapallan Diosmi. Payyá señorninchik Jesucristorayku kachun hatunchasqa, munayniyuq, atiyniyuq hinaspa kamachiq, wiña-wiñaymanta kunankama chaynataq wiña-wiñaypaqpas. Chaynayá kachun*.
Willakuykuna
^ Kaypiqa rimachkan mana kuyana kachkaspa kuyasqa kaymantam. Qaway “mana kuyana kachkaspa kuyasqa kay” niqpa ima ninan kasqanta.
^ Kaytam griego rimaypi “aselgueia” ninku. Qaway kay palabrapa ima ninan kasqanta.
^ Qaway A5 kaq yachachikuyta.
^ Utaq: “Tiyananku”.
^ Kaypiqa rimachkan hanaq pachapi ruwayninkuta saqiramusqankumantam.
^ Qaway kay palabrapa ima ninan kasqanta.
^ Qaway A5 kaq yachachikuyta.
^ Utaq: “Kachasqan runankunapa”.
^ Griego rimaypiqa nichkan: “Iñiynikichikpa hawanpiyá qispichisqa kaychik”, nispam.
^ Griego rimaypiqa nichkan: “Ninamanta”, nispam.
^ Utaq: “Amen”.
