Proverbios 15:1-33
15 Llampu simillawan rimariq runaqa piñakuq runatam hawkayaykachin,+nanay simiwan rimaq runam ichaqa runamasinta aswanraq piñachin.+
2 Yachayniyuq runaqa imapas yachasqanwanmi allin kaqta ruwan,+mana yuyayniyuq runam ichaqa imapas hapisqanta riman.
3 Jehova Diosqa tukuytam qawamuchkan,allin ruwaqtawan mana allin ruwaqtapas qawamuchkanmi.+
4 Llampu simillawan* rimariq runaqa kawsay qukuq sacha hinam,+nina qallu runam ichaqa llumpayta llakichikun.
5 Ruqru uma runaqa taytanpa rimapayasqantam* mana kaqpaqpas hapinchu,+allin yuyayniyuq runam ichaqa chaskikun.+
6 Allin ruwaq runapa wasinpiqa valorniyuq tukuy imam kachkan,mana allin ruwaq runapam ichaqa ima chaskikusqanpas sasachakuyllaman apan.+
7 Yachayniyuq runapa rimasqanqa hukkunatam yanapan yachayniyuq kanankupaq,+mana yuyayniyuq runam ichaqa chaytaqa mana ruwanchu.+
8 Jehova Diosqa manam chaskinchu* mana allin ruwaqkunapa imapas qusqankutaqa,+allin ruwaqkunapa imapas mañakusqantam ichaqa kusikuywan chaskiykun.+
9 Jehova Diosqa millakunmi mana allin ruwaqkunapa imayna kawsasqankutaqa,+allin kaqta ruwananpaq kallpanchakuq runatam ichaqa kuyan.+
10 Mana allinllamanña qukuruq runaqa rimapayasqankutapas llumpay mana allinpaqmi hapin,+rimapayasqankuta* mana kasukuq runakunaqa wañunqakum.+
11 Wañuqkunapa kasqanpas* chaynataq wañuruspa maypi chinkasqankupas* Jehova Diospa yachasqallanmi kachkan.+
Chaynaqa, ¡aswanraqchiki runapa sunqun imayna kasqantaqa yachan!+
12 Burlakuq runaqa chiqninmi rimapayaqnin* runataqa,+payqa manam tapurikunchu yachayniyuq runakunataqa.+
13 Kusisqa sunquyuq runaqa kancharichkaq hinam kusisqa uyayuq,llakisqa sunquyuq runam ichaqa llumpay hukmanyasqallaña.+
14 Allin yuyayniyuq runaqa yachayniyuq kaytam maskan,+mana yuyayniyuq runakunam ichaqa yanqakuna rimayta anchallataña munanku.+
15 Sasachakuypi kaq* runapaqqa ima punchawpas mana allinllañam,+kusisqa* sunquyuq runam ichaqa sapa punchaw kusisqallaña*.+
16 Wakchaña kaspapas Jehova Diosta manchakuymi aswan allinqa+apu kaspa llakisqallaña kawsakuymantaqa.+
17 Aswan allinqa kuyanakuspa yuyullatapas mikuykuymi+chiqninakuspa puqusqa toropa aychanta mikuymantaqa.+
18 Chaylla piñakuruq runaqa piñanakuytam rikurichin,+chaylla mana piñanakuruq runam ichaqa hawkayayta maskan.+
19 Qilla runapa purinan ñanqa kichkasapallañam,+allin ruwaq runapa ñanninmi ichaqa allinlla.+
20 Yachayniyuq churiqa taytantam kusichin,+mana yuyayniyuq runam ichaqa mamanta waqachin.+
21 Mana yuyayniyuq runaqa yanqakuna ruwasqanwanmi kusikun,+allin yuyayniyuq runam ichaqa allin kaqta ruwaypi hinalla kallpanchakun.+
22 Imatapas sumaqta mana parlariykuspa* ruwayqa mana allinpim tukun,sumaqta tapurikuspa imatapas ruwaymi ichaqa allinpi tukun.+
23 ¡Mayna kusisqam tupaqninpi rimariq runaqa!+
¡Mayna sumaqtaqmi tiempollanpi rimarisqa rimaykunaqa!+
24 Yuyayniyuq runaqa wichayman riq ñanninta richkanmanpas hinam unay kawsakunqa,+hinaspanmi uraypi kaq wañuqkunapa kasqanman* riq ñanmanta karunchakunqa.+
25 Jehova Diosqa hatuntukuq runapa wasintam taqmarunqa,+viudapa chakranpa linderontam ichaqa mana kuyuchinqachu.+
26 Mana allin ruwaqkunapa imapas tantiasqankutaqa mana allinpaqmi Jehova Diosqa hapin,+sumaq rimaykunatam ichaqa allinpaq hapin.+
27 Mana allinkunata ruwaspa apuyaylla maskaq runaqa wasinpi kaqkunatam sasachakuyman* churan,+pimanpas sayapakunanpaq imatapas mana chaskikuykuq runam ichaqa hinalla kawsakunqa.+
28 Allin ruwaq runaqa sumaqta tantiaykuspam rimarin,+mana allin ruwaq runam ichaqa llutanpi mana allinkunata riman.
29 Jehova Diosqa mana allin ruwaqkunamantam karupi kachkan,allin ruwaq runapa mañakusqantam ichaqa uyariykun.+
30 Runamasinta rikuykuspan kusikuq runaqa* runamasinpa sunquntam kusichin.
Sumaq willakuyqa anchatam kallpanchakun.+
31 Pitapas rimapayaykuyqa hinalla kawsakunanpaqmi yanapan,rimapayasqankuta uyariq runaqa yachayniyuqkunawan kuskam kawsakun.+
32 Rimapayasqankuta mana kasukuq runaqa kawsakuynintam yanqapaq hapin,+rimapayasqankuta kasukuq runam ichaqa yachayniyuq kanqa.+
33 Jehova Diosta manchakuyqa aswan yachayniyuq kanapaqmi yanapakun,+mana hatuntukuq runaqa ancha riqsisqam kanqa.+
Willakuykuna
^ Utaq: “Hampichkaq hina”.
^ Utaq: “Corregisqantam”.
^ Utaq: “Chiqninmi”.
^ Utaq: “Corregisqankuta”.
^ Hebreo rimaypiqa nichkan: “Seolpas”, nispam. Qaway kay palabrapa ima ninan kasqanta.
^ Hebreo rimaypiqa nichkan: “Abadonpas”, nispam.
^ Utaq: “Corregiqnin”.
^ Utaq: “Ancha kusisqallaña fiestapipas kachkanman hina”.
^ Utaq: “Allin”.
^ Utaq: “Hukmanyasqa”.
^ Utaq: “Tapurikuspa”.
^ Hebreo rimaypiqa nichkan: “Seolman”, nispam.
^ Utaq: “Pinqayman”.
^ Utaq: “Kusisqa ñawiyuq runaqa”.
