Proverbios 4:1-27
4 Churillaykuna, taytaykichikpa rimapayasusqaykichiktayá uyariychik,+allin yuyayniyuq kanaykichikpaqyá allinta uyariychik.
2 Ñuqaqa allintam yachachisqaykichik,amayá yachachikuyniykunataqa* qunqaychikchu.+
3 Ñuqaqa taytaypaqmi allin churi karqani,+ñuqaqa mamaypa ancha kuyasqan wawanmi karqani.+
4 Taytaymi yachachiwaspan niwarqa: “Nisqaykunatayá sunquykipi waqaychay.+
Kamachikuyniykunata kasukuspaqa unaymi kawsakunki.+
5 Yachayniyuq kanaykipaqyá kallpanchakuy, yuyayniyuq kaytayá haypay.+
Amayá qunqaychu nisqaykunataqa, amayá yanqapaqqa hapiychu nisqaykunataqa.
6 Amayá yachayniyuq kaytaqa saqiychu, yachayniyuq kaymi imamantapas waqaychasunki.
Yachayniyuq kaytayá kuyay, yachayniyuq kaymi imamantapas harkasunki.
7 Yachayniyuq kanaykipaqyá kallpanchakuy, yachayniyuq kaymi imamantapas aswan allinqa.+
Tukuy imayuqña kaspapas amayá allin yuyayniyuq kaytaqa saqiychu.+
8 Yachayniyuq kaytaqa ancha chaninniyuq kasqanpaqyá hapiy, hinaspaqa ancha riqsisqam kanki.+
Yachayniyuq kaytaqa anchatam kuyanayki, hinaspaqa respetasqam kanki.+
9 Yachayniyuq kaspaqa umaykipi sumaq coronayuq hinam kanki,yachayniyuq kaspaqa kuyayllapaq coronayuq hinam kanki”, nispa.
10 Churilláy, nisqaykunatayá uyariy,hinaspaqa unaytam kawsakunki.+
11 Ñuqam yachayniyuq kanaykipaq yanapasqayki,+ñuqam allin ruwaq kanaykipaq yanapasqayki.+
12 Purispapas manam imawanpas arwitakunkichu,kallpaspapas* manam imawanpas urmankichu.
13 Pipas rimapayasuptikiqa* uyarikuyá, amayá yanqapaqqa hapiychu.+
Unay kawsakunaykipaqyá chaykunataqa ama qunqaychu.+
14 Amayá mana allin ruwaqkunapa ruwasqantaqa qatipakuychu,amayá paykuna hinaqa kawsakuychu.+
15 Mana allinkuna ruwasqankutaqa qipanchayá, amayá paykunapa ruwasqantaqa qatipakuychu.+
Amayá qawayllapas-qawaychu mana allinkuna ruwasqankutaqa.+
16 Paykunaqa mana allinta ruwaruspañam puñuykunkupas,pitapas pantarachispañam paykunaqa puñuykunkupas.
17 Mana allin ruwayqa tantanku hinam,llumpay maqakuqllaña kayninkupas vinonku hinam.
18 Allin ruwaqkunapa imapas ruwasqanmi ichaqa achikyaqta kanchariq achki hina,inti qispiramuspan punchawyanankama aswan-aswan kanchariq hinam.+
19 Mana allin ruwaqkunapa imayna kawsasqankuqa tutayay hinam,paykunaqa manam yachankuchu imawan urmasqankutapas.
20 Churilláy, imam nisqaytayá allinta uyariy,lliw nisqaytayá suma-sumaqta uyariy.
21 Chaykunataqa amayá qunqaychu,sunquykipiyá waqaychay.+
22 Nisqaykunata yachaqkunaqa hinallam kawsakunqaku,+chaykunaqa hampi hinaraqmi paykunapaqqa kanqa.
23 Imamantapas astawanqa sunquykitayá waqaychay,+sunquykipi ima kasqanman hinam imayna kawsakuynikiqa kanqa.
24 Amayá sakriqa kaychu,+amayá pantachikuq rimaykunataqa rimaychu.
25 Ñawpaqllamanyá qaway,ama huklawkunata qawaspayá ñawpaqllaman qaway.+
26 Purinayki ñantayá sumaqta allichay*,+hinaspaqa maymi purinaykipiqa manam urmankichu.
27 Amayá alliqmanpas* nitaq ichuqmanpas* muyuychu,+mana allin ruwaymantayá karunchakuy.
Willakuykuna
^ Utaq: “Kamachikuyniykunataqa”.
^ Utaq: “Raskispapas”.
^ Utaq: “Corregisuptikiqa”.
^ Ichapas kanman: “Sumaqta qaway”, niqpas.
^ Utaq: “Pañamanpas”.
^ Utaq: “Lluqimanpas”.
