Proverbios 7:1-27
7 Churilláy, rimapayasqaykunatayá kasukuy,kamachisqaykunatayá quri-qullqita hina waqaychay.+
2 Kamachikuyniykunata kasukuspayá hinalla kawsakuy,+yachachikuyniykunatayá* ñawi ruruykita hina waqaychay.
3 Dedoykikunapi watasqa kachkanmanpas hinayá sapa kuti yuyariy,tablapi qillqasqa hinayá sunquykipi kachun.+
4 Yachaytayá niy: “Qamqa paniymi kanki”, nispa.
Yuyayniyuq kaytañataqyá niy: “Qamqa aylluymi kanki”, nispa.
5 Chaynapi hukwan-hukwan kakuq warmimanta*+ harkasqa kanaykipaq.
Chaynapi sumaqllaña rimaq huchapakuq warmimanta harkasqa kanaykipaq.+
6 Huk kutipim wasiypa ventananmanta qawaspay,ventanaypa rejillanmanta qawaspay
7 rikurqani mana yuyayniyuq musukunata,hinaptinmi huknin kasqa pasaypaq mana yuyayniyuq.+
8 Paymi chay hukwan-hukwan kakuq warmipa wasin esquinata richkasqa,payqa chay warmipa wasin lawmanmi richkasqa.
9 Chayqa karqa yaqa inti siqaykuytañam,+ñam tutaykamuchkarqaña.
10 Hinaptinmi paywan tupaykunanpaq huk warmi lluqsiramurqa,chay warmiqa karqa chuchumika* warmipa pachanwan pachasqa sakrillaña warmim.+
11 Chay warmiqa rimaysapa mana pinqakuqmi,+wasinpipas mana takyaqmi.
12 Chay warmiqa callekunapim kachkan, chaymantam plazakunaman pasaspan chaypi kachkan.
Esquinakunapim qarita watiqachkan.+
13 Chay warmim chay musuta hapiruspan muchaykurqa,hinaspam mana pinqakuspan nirqa:
14 “Dioswan hawkalla kasqayraykum animalta ofreceramuniña.+
Imapas ruwanaypaq nisqaytam ruwaramuniña.
15 Chayraykum tupaykunanchikpaq lluqsimurqani.
Maskamuchkarqaykim ¡kayqaya tupaykunchik!
16 Camaytam suma-sumaqta mastaramuni,Egiptomanta apamusqanku linomanta ruwasqa kuyayllapaq colorniyuq qatakunawanmi mastaramuni.+
17 Sachapa miski asnaq wiqinmanta* ruwasqa, aloe sachamanta ruwasqa hinaspa canelamanta ruwasqa perfumekunawanmi camayta hinaramuni.+
18 ¡Hakuchikyá! Tukuy tuta kuyanakamusun*,achikyaykamayá kuyanakamusun.
19 Qusayqa manam wasiypichu,karu-karutam illarun.
20 Wayqapi qullqita aparikuspanmi illarun,killa puqusqa kachkaptinñam kutimunqa”, nispa.
21 Chayna suma-sumaqllataña rimaspanmi chay warmiqa musuta pantarachin,+suma-sumaqllataña rimaspanmi sunqunta suwarun.
22 Hinaptinmi chay musuqa nakanankupaq richkaq toro hina chay warmita qatirqa,maqanankupaq chaqnasqa ruqru uma runa hinam chay warmita qatirqa.+
23 Ichaqa kichpanninpi* flechawan tuksirusqa hinam tarikunqa,tuqllaman pawaykuq pichinku hinam mana yachakunchu wañurunanta.+
24 Chaynaqa churilláy*, uyariwayá,kay rimapayasqaykunatayá sumaqta uyariykuway.
25 Amayá chay warmiwanqa sunquykitaqa suwachikuychu pay hina kanaykipaqqa,amayá paytaqa qatiychu.+
26 Payqa achka runatam mana allinman wichiykachin,+payqa achka-achka runakunatam wañurachin.+
27 Pipas chay warmipa wasinman riqqa wañusqakunapa kasqanmanmi* uraykun,chay warmipa wasinqa pampakuna uchku hinañam rikurirun.
Willakuykuna
^ Utaq: “Kamachikuyniykunatayá”.
^ Kaypiqa yaqachusmi rimachkan Diospa kamachisqanta mana kasukuq warmimanta.
^ Utaq: “Qullqipaq piwanpas kakuq”.
^ Utaq: “Mirramanta”.
^ Utaq: “Kuyanakuypi sinkakamusun”.
^ Utaq: “Ñatinninpi”.
^ Hebreo rimaypiqa nichkan: “Churillaykuna”, nispam.
^ Hebreo rimaypiqa nichkan: “Seolmanmi”, nispam. Qaway kay palabrapa ima ninan kasqanta.
