Romanos 3:1-31
3 Chaynaqa, ¿imakunapitaq yanapakun judio kayqa? ¿Imakunapitaq yanapakun qari kayninpi señalasqa kaypas?
2 Judio kaypas chaynataq señalachikuypas achkapim yanapakun. Puntataqa judiokunamanmi Diosqa chuya palabrankunata willarqa.+
3 Chaynaqa, ¿wakin judiokuna Diosta qipanchasqankuraykuchu nichwan Diosqa mana hapipakunapaq hina kasqanta?
4 Manapunim, Diosqa mana llullakuqmi+ llapallan runakuna llulla kaptinkupas,+ chayna kasqanmantam ñawpaq qillqakunapi nichkan: “Rimasqaykikunaqa allin ruwaq kasqaykitam qawachin, qanmanta mana allinkunata rimaptinkupas qamqa pantaypi kasqankutam qawachinki”, nispa.+
5 Wakin runakunam ninku: “Mana allinkunata ruwaptinchikmi runakuna yachanku Diosqa allin ruwaq kasqanta”, nispa. Ichaqa, ¿chayraykuchu nichwan Diosqa pitapas castigaspan mana allin ruwaq kasqanta?
6 Manapunim. Diosqa allin ruwaqmi. Mana chayna kaspanqa, ¿imaynatamá runakunataqa juzganqa?+
7 Ichaqa, sichu ñuqapa llullakusqaywan Diospa rimasqan chiqap kasqanta riqsichiptiyqa hinaspa Dios hatunchasqa kaptinqa, ¿imanasqataq Diosqa huchayuq kasqaypaq hapiwanman?
8 ¿Imanasqataq wakin runakuna yanqamanta tumpawasqanchikman hinaqa mana nichwanchu: “Mana allinkunatayá ruwasun allin ruwaykuna kananpaq”, nispaqa? Chayna runakunapa castigasqa kayninqa allinllam.+
9 Hinaptinqa, ¿ima nichwantaq? ¿Ñuqanchikqa aswan allinchu kachkanchik? Manapunim. Ñawpaqpi nisqanchikman hinam judiokunapas hinaspa mana judio* kaqkunapas llapallanchik huchayuq kanchik.+
10 Chayna kasqanmantam ñawpaq qillqakunapi nin: “Manam chullallapas kanchu allin ruwaq runaqa,+
11 manam pipas kanchu yuyaywan tantiaq runaqa, manam pipas kanchu Diosta maskaq runaqa.
12 Llapallankum pantaypi kachkanku, llapallankum mana imapaq valeq rikurirunku, manam kanchu allin sunquyuq runaqa, manamá chullapas chayna runaqa kanchu”, nispa.+
13 Nintaqmi: “Kicharayachkaq pampakuna uchku hinam rimasqankupas, paykunaqa llulla rimaqkunam kanku”, nispa.+ Nintaqmi: “Rimasqankupas kachukuq culebrapa hinam venenoyuq kachkan”, nispa.+
14 Nintaqmi: “Rimasqankupas mana allinllañam, paykunaqa piñakuqllañam kanku”, nispa.+
15 Nintaqmi: “Paykunapaqa chakinkupas utqaymanmi kallpan* runata wañuchimunankupaq”, nispa.+
16 Nintaqmi: “Mana allinkuna ruwasqankuwanmi runamasinkuta llumpayta ñakarichinku hinaspa waqachinku,
17 manataqmi runamasinkuwan hawka kawsakuytaqa yachankuchu”, nispa.+
18 Nintaqmi: “Manapunim Diostapas manchakunkuchu”, nispa.+
19 Ñuqanchikqa yachanchikmi Moisespa chaskisqan kamachikuypa tukuy ima nisqanqa chay kamachikuyta kasukuqkunapaq kasqanta, chaynapi llapallanku upallachisqa kanankupaq hinaspa llapallanku Diospa qayllanpi huchayuq kanankupaq.+
20 Chaynaqa, Diospa qusqan kamachikuykunapa nisqanta ruwaspaqa manam pipas allin ruwaqpaqqa chaskisqachu kanman,+ chay kamachikuy kasqanraykum allintapuni yachanchik hucha ima kasqanta.+
21 Kunanqa manam Moisespa chaskisqan kamachikuytaraqchu kasukuna Diospa qayllanpi allin ruwaq kanapaqqa,+ chaytam qawachin Moisespa chaskisqan kamachikuy hinaspa Diosmanta willakuqkunapa* qillqan.+
22 Arí, llapallan iñiqkunam Jesucristopi iñisqankurayku Diospa qayllanpi allin ruwaq kanku. Diospaqqa llapallan runakunam chaynalla kanku.+
23 Llapallankumiki huchallikuruspanku Diospa imayna kasqanta* mana haypankuchu.+
24 Diosqa allin ruwaqta hinañam+ paykunataqa chaskin Jesucristopa wañukusqanwan pagasqanrayku,+ chayqa ancha kuyakuyninta* Dios qawachisqanrayku mana imallapaq qusqan regalom.+
25 Diosmi Jesustaqa ñuqanchikrayku wañukunanpaq kachamurqa Dioswan kaqmanta hawkaña kananchikpaq,+ chaypaqqa huchanchik pampachasqa kananpaq yawarninta chaqchuspan Jesus wañukusqanmantam mana iskayrayanachu.+ Diosqa chaytam ruwarqa allin ruwaq kasqanta qawachinanpaq, payqa hawkalla suyaspanmi ñawpaq tiempopi huchakunatapas pampacharqa.
26 Chayqa karqa allin ruwaq kasqanta kay tiempopi qawachinanpaqmi,+ chaynapi Jesuspi iñiq runata allin ruwaqta hinaña chaskispanpas allin ruwaqqa Dios kananpaq.+
27 Hinaptinqa, ¿yaqachu pipas alabakunman? Manapunim. ¿Mayqin kamachikuytaq yanapanman pipas mana alabakunanpaq?+ Manam imatapas ruwanankupaq rimaq kamachikuychu, aswanqa Diospi iñinankupaq* rimaq kamachikuymi.
28 Yachanchikmi Diospi iñisqanrayku runaqa allin ruwaqpaq hapisqa kasqanta, manam kamachikuypa nisqanta ruwasqanraykuchu.+
29 Icha, ¿Diosqa judiokunapa Diosllanchu?+ ¿Manachu huklaw nacionniyuq runakunapapas Diosnin?+ Arí, payqa huklaw nacionniyuq runakunapapas Diosninmi.+
30 Diosqa chullallam,+ chaymi Diospi iñisqankurayku qari kayninpi señalasqakunaqa+ mana huchayuqña Diospaqqa kanqaku, paypi iñisqankuraykutaqmi mana señalasqakunapas+ mana huchayuqña Diospaqqa kanqaku.
31 Hinaptinqa, ¿Jesuspi iñisqanchikraykuchu Diospa qusqan kamachikuykunaqa mana allinña rikurirun? ¡Manapunim chaynachu! Aswanqa Diospa qusqan kamachikuy allinpuni kasqantam qawachinchik.+
Willakuykuna
^ Griego rimaypiqa nichkan: “Griego”, nispam. Paykunaqa huklaw nacionniyuq kaspapas griego rimayniyuqmi karqaku.
^ Utaq: “Raskin”.
^ Utaq: “Profetakunapa”.
^ Utaq: “Diospa sumaqlla kanchayninta”.
^ Kaypiqa rimachkan mana kuyana kachkaspa kuyasqa kaymantam.
^ Kaypiqa rimachkan runakuna salvasqa kanankupaq Jesusta Dios kachamusqanmanta mana iskayrayanamantam.
