Romanos 5:1-21
5 Kunanqa Diospi iñisqanchikraykum* paypaqqa mana huchayuqña kanchik,+ chayraykuyá señorninchik Jesucristontakama Dioswan hawkayaypi kasqanchikmanta kusikusun*.+
2 Jesuspi iñisqanchikraykum Diosman asuykunchik hinaspa Diospa ancha kuyakuyninta* haypanchik,+ hinaptinqa kusikusunyá Dios hatunchawananchikta suyasqanchikwan.
3 Manam chayllachu, aswanqa llumpay ñakariykunapi kaspapas kusikusunyá,+ yachasqanchikman hinapas llumpayta ñakarispanchikmi aguantayta yachanchik,+
4 aguantaspañataqmi Diospa chaskisqan kanchik,+ Diospa chaskisqan kaspañataqmi chaskinanchik kaqta suyanchik,+
5 chayna suyasqanchikqa manam yanqapaqchu.+ Diosqa quwasqanchik atiyninwanmi* kuyawasqanchikta qawachiwanchik.+
6 Arí, huchasaparaq* kachkaptinchikmi+ akllasqa kaq tiempopi Cristoqa* huchasapa runakunarayku wañurqa.
7 Sasatamá pipas allin ruwaq runapa rantinpiqa wañuyta munanman, ichapas allin sunquyuq runapa rantinpiqa pipas wañuyta munanman.
8 Diosmi ichaqa kuyakuyninta qawachiwanchik huchasaparaq kachkaptinchik ñuqanchikpa rantinchikpi Cristopa wañukusqanwan.+
9 Hinaptinqa, Jesucristopa yawarninwan Diospaq mana huchayuqña kasqanchikraykuqa+ astawanraqchá paynintakama Diospa piñakuyninmanta salvasqa kasunchik.+
10 Enemigon kachkaspanchikraqmi Dioswan allinyanakurunchik churinpa wañukusqanwan,+ ñataq allinyasqaña kachkanchik hinaspaqa astawanraqchá churinpa vidanrayku salvasqa kasunchik.
11 Chaymantapas Diosraykum kusikuchkanchik señorninchik Jesucristontakama, paynintakamam kunanqa Dioswan allinyanakurunchik.+
12 Chullalla runapa huchanwanmi lliw runakuna huchayuq rikurirurqa, huchawantaqmi wañuypas rikurirurqa.+ Chaynapim wañuyqa lliw runakunaman mirarurqa lliw huchallikurusqankurayku...+
13 Diospa qusqan kamachikuykunata Moises manaraq chaskichkaptinmi huchaqa runakunapi karqaña, ichaqa kamachikuy mana kaptinqa manam pipas huchayuq kasqanpaqqa hapisqachu kanman.+
14 Chaywanpas wañuyqa Adanmanta Moiseskamam munaychakurqa Adanpa huchallikusqanman hina mana huchallikuqkunapipas, Adanqa rikchakun suyasqanchik hamuq runamanmi.+
15 Diospa mana imallapaq qusqanqa manam Adanpa huchallikusqan hinachu. Achkallaña runakunam wañunku chullalla runapa huchallikusqanwan, ichaqa achkallaña runakunam anchata yanapachikunku Diospa ancha kuyakuyninwan* hinaspa mana imallapaq Jesucristopa ancha kuyakuyninwan.+
16 Chaymantapas, chullalla runapa huchallikusqanmanta chaskisqanchikqa manam chaynallachu mana imallapaq chaskisqanchikwanqa.+ Chullalla runapa huchanraykum llapa runakuna huchayuqña rikurirurqaku,+ ichaqa achkallaña runakuna huchallikuptinkupas Diospa mana imallapaq qusqanwanmi achka runakuna mana huchayuqña rikurirunku.+
17 Sichu huk runapa huchallikusqallanwan wañuy munaychakurqa chay huchallikuq runantakama,+ hinaptinqa astawanraqchiki huk runantakamalla utaq Jesucristontakamalla+ kawsaqkunaqa kamachiqkuna kanqaku.+ Chaynaqa kanqaku Diospa ancha kuyakuyninta* chaskiq runakunam chaynataq mana huchayuqña kanankupaq+ mana imallapaq Diospa yanapasqan runakunam.
18 Chaynaqa, imaynam runapa huk kutilla huchallikusqanwan tukuy rikchaq runakuna huchayuqña rikurirurqaku,+ chaynallataqmi runapa huk kutilla allin ruwasqanwan tukuy rikchaq runakuna+ mana huchayuqña rikurirunku hinalla kawsanankupaq.+
19 Imaynam chullalla runapa mana kasukusqanwan achkallaña runakuna huchayuq rikurirurqaku,+ chaynallataqmi chullalla runapa kasukusqanwan achkallaña runakuna mana huchayuqña rikurinqaku.+
20 Moisespa chaskisqan kamachikuyqa qallarirqa runakuna huchayuq kasqankumanta astawan yachakunanpaqmi.+ Huchayuq kasqanku aswan sutilla kaptinñataqmi Diospa ancha kuyakuynin* aswan sutillaraq qawakun.
21 ¿Imapaq? Huchapa chaynataq wañuypa munaychakusqanman hina+ Diospa ancha kuyakuyninpas* munaychakunanpaqmi, chaynapi runakuna mana huchayuqña Diospaq kanankupaq, chayqa runakuna wiñay kawsayta señorninchik Jesucristontakama chaskinankupaqmi.+
Willakuykuna
^ Ichapas kanman: “Dioswan hawka kasun”, niqpas.
^ Kaypiqa rimachkan runakuna salvasqa kanankupaq Jesusta Dios kachamusqanmanta mana iskayrayanamantam.
^ Kaypiqa rimachkan mana kuyana kachkaspa kuyasqa kaymantam.
^ Griego rimaypiqa nichkan: “Mana kallpayuq”, nispam.
^ Utaq: “Diospa akllasqanqa”.
^ Kaypiqa rimachkan mana kuyana kachkaspa kuyasqa kaymantam.
^ Kaypiqa rimachkan mana kuyana kachkaspa kuyasqa kaymantam.
^ Kaypiqa rimachkan mana kuyana kachkaspa kuyasqa kaymantam.
^ Kaypiqa rimachkan mana kuyana kachkaspa kuyasqa kaymantam.
