Romanos 6:1-23
6 Chaynaqa, ¿hinallachu huchallikusun Diospa ancha kuyakuyninta* aswanraq chaskinapaq?
2 ¡Manapunim! Huchapa munaychakusqan manaña kachkaspaqa*,+ ¿imaynamá hinallaqa huchapiraqqa kawsakuchwan?+
3 ¿Manachu yachankichik bautizakuspaqa Jesucristowan+ kuskaña kasqaykichikta hinaspa llapallanchik Jesus hina wañukunanchikpaq bautizasqa kasqanchikta*?+
4 Paywanmi pampasqa karqanchik pay hina wañunanchikpaq bautizasqa kasqanchikwan,+ chaynapi wañusqakunapa kasqanmanta hanaq pacha taytapa atiyninwan Cristopa* kawsarimusqanman hina ñuqanchikpas musuq kawsakuypiña kawsakunanchikpaq.+
5 Sichu paypa wañusqanman hina wañuruspanchikqa+ ñuqanchikpas paypa kawsarimusqanman hinam kawsarisunchik,+ chaykunawanmi ñuqanchikqa paywan huklla kachkanchik.
6 Ñuqanchikqa yachanchikmi ñawpaqta imayna kasqanchik paywan kuska qirupi* clavowan takasqa kasqanta,+ chaynapi huchallikuq cuerponchik manaña munaychakuwananchikpaq+ hinaspa manaña huchapa serviqnin kananchikpaq.+
7 Pipas wañukuspanqa huchanmantam pampachasqaña* rikurin.
8 Chaymantapas, Cristowan wañuruspanchikqa paywan kawsananchikmantam mana iskayrayanchikchu.
9 Ñuqanchikqa yachanchikmi Cristoqa manaña haykapipas wañunanta, payqa wañusqakunapa kasqanmantam hatariramun,+ paytaqa manañam wañuyqa munaychakunchu.+
10 Payqa huchata chinkachinanpaqmi huk kutillata wañukurqa, chaymi manaña haykapipas yapatawanqa wañunqañachu,+ aswanqa Diosllapaqñam payqa kunanqa kawsakuchkan.
11 Chaynallataqyá qamkunapas huchallikuypaqqa wañusqa hinaña kaychik, Diospa munayninta ruwanaykichikpaqyá ichaqa Jesucristota qatipakuspa kawsakuychik.+
12 Chaynaqa, amañayá saqikuychikchu wañuruqlla cuerpoykichikpi hucha munaychakunantaqa,+ chaynapi cuerpoykichikpa munasqanta mana ruwanaykichikpaq.
13 Amataqyá cuerpoykichikqa mana allinkuna ruwanaykichikpaqchu kachun, aswanqa Diospa makinmanyá churakuychik wañusqakunapa kasqanmanta kawsarimuqkuna hina, cuerpoykichikqa kachun Diospa munasqanman hina allin kaqkunata ruwanaykichikpaqyá.+
14 Huchaqa manam munaychakusunaykichikchu, qamkunaqa manañam Moisespa chaskisqan kamachikuykunataqa kasukunaykichikchu,+ aswanqa Diospa ancha kuyakuynintam* qamkunaqa chaskirunkichik.+
15 Hinaptinqa, ¿Moisespa chaskisqan kamachikuykunata manaña kasukunapaq kamachisqa kaspachu Diospa ancha kuyakuyninta* chaskisqanchikrayku huchallikusun?+ ¡Manapunim!
16 ¿Manachu yachankichik? Pipapas serviqnin kanaykichikpaq kikikichikmanta “kasukusqaykim” nispaqa chay runapa serviqninñam rikurirunkichik.+ Chaynam huchallikuyllamanña qukuruspapas serviqnin hina rikuriruspaykichik+ wañuypi tukunkichik.+ Diosta kasukuspaykichik paypa serviqnin kaspaykichikmi ichaqa allin ruwaq runankuna kankichik.
17 Ichaqa Diostam agradecekuniku huk tiempopi huchapa serviqnin kachkaspaykichikpas chaskisqaykichik yachachikuykunata sunqumantapuni kasukuqña kasqaykichikmanta.
18 Arí, huchamanta librasqaña kaspaykichikmi+ Diospa serviqninña rikuriruspa allin kaqkunataña ruwachkankichik.+
19 Hucharayku mana kallpayuq kasqaykichikraykum ñuqaqa runakunapa rimasqankuman hinalla rimachkani. Ñawpaqtam huchapa serviqnin kaspaykichik cuerpoykichikwanpas millakuypaq mana allinkunata ruwarqankichik hinaspa huchallikurqankichik. Kunanñataqyá cuerpoykichikqa kachun allin kaqkunata ruwanaykichikpaq, chaynapi Diosllapaqña kawsakunaykichikpaq.+
20 Huchapa serviqnin kaspaykichikqa manam kamachisqachu karqankichik allin kaqkunata ruwanaykichikpaqqa.
21 Hinaptinqa, ¿imaynataq tarikunkichik ñawpaqta tukuy chay mana allinkuna ruwasqaykichikmanta? Tukuy chaykunamantam pinqakunkichik. Chay mana allin ruwaykunaqa wañuymanmi apakun.+
22 Kunanmi ichaqa huchamanta librasqaña kasqaykichikrayku Diospa serviqninña kaspa allintaña kawsakuchkankichik,+ chayta hinalla ruwaspaqa wiñaypaqmi kawsakunkichik.+
23 Huchapa pagonqa wañuymi,+ Diospa mana imallapaq quwasqanchikmi ichaqa señorninchik Jesucristorayku+ wiñaypaq kawsakuy.+
Willakuykuna
^ Kaypiqa rimachkan mana kuyana kachkaspa kuyasqa kaymantam.
^ Griego rimaypiqa nichkan: “Huchapaq wañuruchkaspaqa”, nispam.
^ Griego rimaypiqa nichkan: “Jesuspa wañukusqanpi bautizasqa kasqanchikta”, nispam.
^ Utaq: “Diospa akllasqanpa”.
^ Utaq: “Kaspipi”.
^ Utaq: “Librasqaña”.
^ Kaypiqa rimachkan mana kuyana kachkaspa kuyasqa kaymantam.
^ Kaypiqa rimachkan mana kuyana kachkaspa kuyasqa kaymantam.
