Salmos 96:1-13
96 Jehova Diospaqyá musuq takita takiychik.+
¡Lliw runayá Jehova Diospaq takichun!+
2 Jehova Diospaqyá takiychik, sutintayá hatunchaychik.
Sapa punchawyá libraykuwaqninchik kasqanmanta allin willakuyta willakuychik.+
3 Ancha riqsisqa kasqanmantayá nacionkunapi willakuychik.
Tukuy imakuna ruwasqanmantayá lliw runakunaman willakuychik.+
4 Jehova Diosqa mayna hatunmi, chaymi hatunchananchik.
Payllam taytacha-mamachakunamantapas manchakuna Diosqa.
5 Jehova Diosmi hanaq pachata unancharqa.+
Runakunapa taytacha-mamachanmi ichaqa yanqa.+
6 Paypa kasqanqa sumaqllaña kancharichkaqmi.+
Paypa kasqanpiqa atiywan sumaq kayllam kachkan.+
7 Llaqtakunapi ayllukuna, Jehova Diostayá hatunchaychik.
Ancha riqsisqa atiyniyuq kasqanmantayá Jehova Diosta hatunchaychik.+
8 Jehova Diospa sutintayá hatunchaychik.+
Qunaykichikpaq kaqta apamuspayá wasinpa pationkunaman yaykuychik.
9 Yupaychanapaq pachakunawan churakuspayá Jehova Diosta yupaychaychik.
¡Diospa qayllanpiyá lliw runakuna katkatatachun!
10 Llapallan nacionkunapiyá willakuychik: “¡Jehova Diosmi kamachiqninchikqa!+
Kay allpa pachaqa sumaq takyachisqam kachkan, manam pipas kuyuchiytaqa atinmanchu.
Payqa pimanpas mana sayapakuspam juzganqa”, nispa.+
11 Hanaq pachapi kaqkunayá kusikuchun, kusikuchuntaqyá kay pachapi kaqkunapas.
Lamar quchawan chaypi kaqkunayá qaparichunku.+
12 Kusikuchuntaqyá chakrakunapas chaynataq chaypi kaqkunapas.+
Montepi sachakunapas kusikuymanta qaparichunku.+
13 Jehova Diospa ñawpaqninpiyá qaparichunku,Diosqa runakunapa jueznin kananpaqmi hamuchkan.
Kay allpa pachatam allin ruwayman hina juzganqa.+
Imam kaqta rimasqanman hinam runakunata juzganqa.+
